كىمگە بانان جەۋگە بولمايدى؟

باناندى دەسەرت قىلىپ بەرەتىندەر كوپ. ودان تورت، ءتاتتى تاعام جاسايدى، نان پىسىرەدى.

باناننىڭ پايداسى

باناننىڭ پايداسى مول. جەمىستىڭ قۇرامىندا كاليي، فوسفور، تەمىر مەن ۆيتاميندەر مول، اسىرەسە، ۆ توبىنداعى ۆيتاميندەرگە باي. تابەت مەن ۇيقى قاشقان كەزدە، دەنە ىسىنگەن كەزدە باناننىڭ پايداسى كوپ. قان قىسىمى جوعارى، باسپامەن، جۇرەك- قان تامىرى اۋرۋلارىمەن اۋىرعان ادامدارعا بانان جەۋ قاجەت. ەستە ساقتاۋ قابىلەتى ناشارلاعان، ۇمىتشاقتىق دەندەگەن كەزدە دە باناننىڭ پايداسى مول.

بانان كىمگە زيان؟

باناننىڭ پايداسى كوپ بولا تۇرا، ونىڭ كەيبىر ادامدارعا زيانى دا بار ەكەن. جالپى، بانان زياندى جەمىس ەمەس، تەك كەيبىر اۋرۋى بار ادامدارعا نە ناۋقاستارعا جەۋگە بولمايدى. بانان كوپ جەيتىندەردىڭ (كۇنىنە 5 ەۋدەن كوپ) باسى اۋىرىپ، ۇيقى باسۋى مۇمكىن. سوندىقتان نورمامەن جەگەن ءجون. بۇيرەگى اۋىراتىن ادامدارعا بانان كوپ جەۋگە بولمايدى. ويتكەنى بانان اعزاداعى سۋدى سىرتقا شىعارىپ جىبەرەتىن جەمىس. ال بۇيرەككە اعزادا سۋدىڭ جەتكىلىكتى بولعانى قاجەت. كوكتامىرى قابىنعان (ترومبوفلەبيت) ادامدارعا بانان از جەۋ كەرەك. جوعارىدا ايتقانىمىزداي، باناننىڭ اعزاداعى سۋدى سىرتقا ايدايتىن قاسيەتى بار. ال اعزادا سۋ ازايىپ قالسا، قان تامىرى سۋساپ، قويۋلانىپ كەتەدى. سودان قان اينالىمى ناشارلاۋى مۇمكىن. اسقازانى اۋىراتىن ادامدارعا دا بولمايدى. ويتكەنى بانان اسقازاندا ۇزاق قورتىلاتىن جەمىس. اس قورىتۋى بۇزىلعان جاعدايدا، باناندى قورىتۋ قيىن بولىپ قالادى. ودان بولەك، بانان قىجىلدى كوتەرۋى مۇمكىن.

ديابەتكە شالدىققانداردىڭ دا بانان جەمەگەنى ءجون. سەبەبى قانداعى گليۋكوزا كوتەرىپ جىبەرۋى مۇمكىن. سالماعى كوپ ادامدارعا دا باناندى ازداپ جەگەن دۇرىس. باناننىڭ كالورياسى كوپ، ونسىز دا تولىق ادامنىڭ ودان ءارى تولۋىنا سەبەپشى بولۋى مۇمكىن.

Massaget.kz