تەڭگە باعامىن ۇستاپ تۇرۋدىڭ ارتى نەگە سوعاتىن ەدى - ۇلتتىق بانك
«مۇناي نارىعى قۇلادى. ونىڭ ارتىنان قارجى نارىعى دا قۇلادى. مۇنىڭ بارلىعىنا كوروناۆيرۋس جۇقپاسى اسەر ەتتى. سوڭعى 30 جىلدا وپەك+ كىرەتىن ەلدەردىڭ اراسىندا قارا التىندى ءوندىرۋ تۋرالى ءوزارا كەلىسىمنىڭ بولماۋى دا ىقپالىن تيگىزدى. مۇناي باعاسىنىڭ بىردەن ءتۇسۋى ۇلتتىق ۆاليۋتانىڭ السىرەۋىنە اكەلدى. سىرتقى سىن- قاتەرلەرگە جاۋاپ رەتىندە ۇلتتىق بانك 10-ناۋرىزدا بازالىق ستاۆكانى 12 پايىزعا دەيىن تۇسىرگەن بولاتىن. بۇگىن ۇلتتىق بانك بازالىق ستاۆكانى 12 پايىز دارەجەسىندە ۇستاپ، تەڭگەنى جاڭا ماكروەكونوميكالىق احۋالعا بەيىمدەيتىندىگىن مالىمدەدى»،- دەدى ءا. مولدابەكوۆا.
لاۋازىمدى تۇلعا ۇلتتىق بانكتىڭ ۆاليۋتالىق نارىققا نەگە قاتىسپايتىندىعىن، بۇدان ءارى ينتەرۆەنتسيا جاسامايتىن سەبەبىن ءتۇسىندىردى. «وتكەن اپتادا سىرتقى نارىقتاعى احۋالدى مۇقيات باقىلادىق. تەرىس تەندەنتسيالار قانشالىقتى تۇراقتى بولاتىنىن باقىلادىق. نارىقتىڭ قۇلدىراۋ پروتسەسى توقتار ەمەس»،- دەدى ول. بۇگىندە مۇناي باررەلىنىڭ باعاسى 31 دوللارعا جەتكەن. كوروناۆيرۋس پاندەمياسى، قازاقستانداعى توتەنشە جاعداي رەجىمى، وپەك+ ەلدەرى اراسىنداعى ۋاعدالاستىقتىڭ جوقتىعى، دامۋشى جانە مۇناي ەكسپورتتاۋشى ەلدەر ۆاليۋتاسىنىڭ قۇلدىراۋى جاعدايدى تەك ناشارلاتا ءتۇستى.
«مەملەكەت باسشىسى ايتقانداي، ماسەلە بۇكىل الەمنىڭ ەكونوميكاسىنىڭ قايتا فورماتتالۋىندا بولىپ وتىر. بۇل تەك سىرتقى احۋال عانا ەمەس، ىشكى فۋندامەنتالدى فاكتورلاردىڭ ناشارلاۋى بولسا كەرەك. بۇل جاڭا ەكونوميكالىق احۋالعا قازاقستان بەيىمدەلۋى كەرەك. وتكەن اپتادا جۇرگىزگەن ينتەرۆەنتسيا بارىسىندا ەڭ الدىمەن ماكروەكونوميكالىق تۇراقتىلىق جايلى ويلادىق. نەگىزسىز الىپساتارلىقتىڭ الدىن الۋعا تىرىستىق»،-دەدى ءاليا مولدابەكوۆا.
