پاۆلوداردا ناۋرىز قارساڭىندا «كورشىڭمەن كوجە ءىش» جوباسى باستالدى
«JEBE « بىرلەستىگى ەلىمىزدەگى سوڭعى جاعدايلارعا بايلانىستى كوكتەمگى مەرەكەلەردى وتباسىلىق دەڭگەيدە تويلاۋدى ۇسىندى. «ەلىمىزدە مادەني شارالار توقتاتىلعانىمەن، ۇلىستىڭ ۇلى كۇنى وتباسىلىق دەڭگەيدە اتاپ ءوتىلۋى ءتيىس، - دەيدى «JEBE « ق ب ءتوراعاسى دانيار ءجۇمادىل.
- وسى ماقساتتا بىرلەستىك مۇشەلەرى وزدەرى تۇرىپ جاتقان تۇرعىن ۇيلەردەگى كورشىلەرىنە ناۋرىز كوجە تاراتىپ، مەرەكەلىك كوڭىل كۇي سىيلاۋدا. كوپشىلىك ورىندارعا شىقپاي- اق، كۇندە كورىپ جۇرگەن كورشىڭمەن دە ناۋرىزدى تويلاۋعا بولادى. سوندىقتان بۇل جوبامىزدى كورىسۋ كۇنىندە باستاپ وتىرمىز» . بىرلەستىك ءتوراعاسىنىڭ ايتۋىنشا، «كورشىڭمەن كوجە ءىش» جوباسى قازاقتىڭ قوناقجايلىق ءداستۇرىن، ء«بىز بىرگەمىز» ۇستانىمىن، ۇلتتىق قۇندىلىقتاردى ناسيحاتتايدى. العاشقى بولىپ بۇل جوبانى «JEBE « ق ب قۇرمەتتى ءتوراعاسى جۇمابەك سمانوۆتىڭ وتباسى باستادى. كورشى وتىرعان وزگە ۇلت وكىلدەرىنىڭ شاڭىراعىنا بارىپ، جۇبايى ازىرلەگەن ناۋرىز كوجەدەن ءدام تاتقىزدى. « ءبىزدىڭ نۇرسۇلتان نازاربايەۆ داڭعىلى، 35 مەكەنجايىندا نەمىس، ورىس، تاجىك، ۋكراين، بەلارۋس، قاباردا- بالقار، تاتارلار مەن باسقا دا ۇلت وكىلدەرى تۇرادى. كورشىلەر ءوزارا تاتۋ- ءتاتتى ءومىر سۇرۋدە. ءدىلى مەن دىنىنە قاراماي- اق ۇيىمشىلدىق تانىتىپ وتىرادى. سول سەبەپتى ۇلىستىڭ ۇلى كۇنى قارساڭىندا ناۋرىز كوجە جاساپ تاراتۋ تۋرالى ۇسىنىس تاستادىم. كورشىلەر بىردەن قولداۋ كورسەتتى. وزگە ۇلت وكىلدەرىنە ۇلتتىق داستارحانىمىزداعى تاعامداردىڭ دايىندالۋ ءادىسىن ءتۇسىندىرىپ، ءدام تاتقىزدىق» ، - دەيدى جوبا اۆتورى جانار سەرىكوۆا.
سونىمەن قاتار، «جەبەنىڭ جەڭگەلەرى» جوباسىنىڭ تۇساۋى كەسىلدى. ونىڭ اياسىندا قوعامدىق بىرلەستىك مۇشەلەرىنىڭ ۇيىندەگى جارلارى، بىرلەستىككە مۇشە نازىك جاندىلار الەۋمەتتىك جەلىلەر ارقىلى قازاقتىڭ ۇلتتىق سالت- داستۇرلەرىنەن كورىنىستەر سيكلىن باستادى. «ماقساتىمىز - ۇلتتىق قۇندىلىقتارىمىزدى ناسيحاتتاۋ، سالت- ءداستۇرىمىز بەن ۇلتتىق مەرەكەگە كوپشىلىك نازارىن اۋدارۋ. بۇل رەتتە ءبىز تۇساۋ كەسۋ، بەسىككە بولەۋ، ازان شاقىرۋ، قۇراق قۇراپ، ۇرشىق ءيىرۋ جانە ۇلتتىق تاعامدارىمىزدى دايىنداپ، بەينەروليك جاساپ، ونى كەڭىنەن تاراتپاقپىز» ، - دەيدى دانيار ءجۇمادىل.
ايتا كەتەيىك، مەملەكەت باسشىسىنىڭ جارلىعىمەن كوروناۆيرۋسقا بايلانىستى قازاقستان رەسپۋبليكاسىنىڭ بارلىق اۋماعىندا 2020 -جىلعى 16 ناۋرىزداعى 08 ساعات 00 مينۋت پەن 2020 -جىلعى 15 - ساۋىردەگى 07 ساعات 00 مينۋت كەزەڭىندە توتەنشە جاعداي ەنگىزىلدى. توتەنشە جاعداي كەزىندە ويىن- ساۋىق، سپورتتىق جانە باسقا دا بۇقارالىق ءىس- شارالاردى، سونداي- اق جاپپاي ادامداردىڭ جينالۋىمەن وتباسىلىق، سالت- ءداستۇر ءىس- شارالارىن وتكىزۋگە تىيىم سالىندى.
