سولتۇستىك قازاقستاندا براكونەرلەر قابانداردى كالاشنيكوۆ اۆتوماتتارىمەن اتقان

بۇل جايىندا بريفينگتە ق ر سىبايلاس جەمقورلىققا قارسى ءىس-قيمىل اگەنتتىگىنىڭ س ق و بويىنشا دەپارتامەنت جەتەكشىسىنىڭ ءبىرىنشى ورىنباسارى نۇرلان جاحين ايتتى.

س ق و سىبايلاس جەمقورلىققا قارسى قىزمەت ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ سىبايلاس جەمقورلىق قاتەرىنە سىرتقى تالداۋ جۇرگىزدى.

«ينسپەكتسياعا ورمان قورىنىڭ ءتيىمدى پايدالانۋىنا مەملەكەتتىك باقىلاۋ جۇرگىزۋ مىندەتتەلگەن. 2019 -جىلى سىبايلاس جەمقورلىققا قارسى قىزمەتتىڭ وندىرىسىندە «قىزىلجار» ورمان شارۋاشىلىعىنىڭ قىزمەتكەرلەرىنە قاتىستى قىلمىستىق ءىس بولدى. ولار پايدا تابۋ ماقساتىندا سانيتارلىق كەسۋگە ساپالى، شىرىمەگەن ورماننان اعاشتاردى بەرىپ كەلگەن»، - دەدى نۇرلان جاحين.

وتكەن جىلدىڭ تامىز ايىندا وسى شارۋاشىلىقتىڭ ديرەكتورى التى جىلعا باس بوستاندىعىنان ايىرىلىپ، مەملەكەتتىك قىزمەتتە لاۋازىمدى يەلەنۋ قۇقىعىنان ءومىر بويىنا ايىرىلدى. سوتتىڭ ءىستى قاراۋى بارىسىندا ونىڭ اعاشتى كەسۋگە رۇقسات بەرۋ بارىسىندا بىرنەشە رەت پارا العانى انىقتالدى. جانۋارلار دۇنيەسىنە قاتىستى بىلتىر وبلىستا 12 قىلمىستىق قۇقىقبۇزۋشىلىق تىركەلگەن، كەلگەن شىعىن 28,2 ميلليون تەڭگە شاماسىندا. ونىڭ تەك 3,5 ميلليون تەڭگەسى عانا ءوندىرىلىپ الىنعان. «ينسپەكتسيا قىزمەتكەرلەرىنىڭ ايتۋىنشا، سوتقا دەيىنگى ءىس جۇرگىزۋ ورگاندارىمەن ءوزارا ارەكەتتىڭ بولماۋى نەگىزگى ماسەلەلەردىڭ ءبىرى. سونداي-اق قىلمىستىق قۇقىقبۇزۋشىلىققا جول بەرگەندەردى انىقتاۋدا دا قيىندىقتار تۋادى»، - دەيدى نۇرلان جاحين.

سونىڭ ءبىر مىسالى - 2018 -جىلى قاراشا ايىندا جامبىل اۋدانىندا بولعان براكونەرلىك دەرەگى. سول جولى بەلگىسىز بىرەۋلەر كالاشنيكوۆ اۆتوماتتارىنىڭ ءتۇرلى موديفيكاتسيالارىمەن بەس قاباندى اتىپ كەتكەن بولاتىن. ءالى كۇنگە دەيىن براكونەرلەر انىقتالعان جوق. كەلتىرىلگەن شىعىن مولشەرى - 4,5 ميلليون تەڭگە.