كوروناۆيرۋس: ا ق ش پرەزيدەنتى ەلدە توتەنشە جاعداي جاريالادى

بۇعان دەيىن د. ترامپ Twitter- دەگى پاراقشاسىندا جۇما كۇنى اقۇيدە ساعات 15:00-دە (نۇر- سۇلتان ۋاقىتىمەن 01:00) COVID-19-دىڭ ورشۋىنە بايلانىستى باسپا ءسوز ءماسليحاتىن وتكىزەتىنىن جازعان بولاتىن. ترامپتىڭ ايتۋىنشا، توتەنشە جاعدايدى ەنگىزۋ فەدەرالدى جانە جەرگىلىكتى بيلىك ورگاندارىنا ەپيدەميا جاعدايىندا بىرلەسكەن جۇمىستاردى اناعۇرلىم جاقسى ۇيلەستىرۋگە سەپتىگىن تيگىزەتىن بولادى.

سونداي-اق امەريكا باسشىسى كوروناۆيرۋستى انىقتايتىن دياگنوستيكالىق تەستىلەردىڭ قوسىمشا جارتى ميلليون جيىنتىعى الداعى اپتانىڭ باسىندا جانە ءبىر اي ىشىندە تاعى 5 ميلليونى دارىگەرلەرگە جەتكىزىلەتىنىن ءمالىم ەتتى. بۇل رەتتە ونىڭ پىكىرىنشە، ولاردى قولدانۋدىڭ قاجەتى بولمايدى. ا ق ش پرەزيدەنتى ءمالىم ەتكەندەي، ونىڭ بۇل جارلىعى دەنساۋلىق ساقتاۋ ءمينيسترىنىڭ قۇزىرەتىن كەڭەيتەدى. بۇدان بىلاي ونىڭ قابىلدايتىن شارالارى قولدانىستاعى كەيبىر زاڭدارمەن جانە ەرەجەلەرمەن شەكتەلمەيتىن بولادى. بۇل، دەنساۋلىق ساقتاۋ ورگاندارىنا اناعۇرلىم جەدەل ءارى يكەمدى ارەكەت ەتۋگە مۇمكىندىك بەرەدى.

«توتەنشە جاعداي ترامپقا ۇلتتىق اپاتتارعا قارسى قوردان كوروناۆيرۋسپەن كۇرەسكە 50 ميلليارد دوللارعا دەيىن بولۋگە، سونداي-اق فەدەرالدى بيلىككە شتاتتارمەن جانە جەرگىلىكتى ورگاندارمەن ءىس- قيمىلداردى اناعۇرلىم ءتيىمدى ۇيلەستىرۋگە مۇمكىندىك اشادى»، - دەپ جازادى bbc . بۇگىنگە دەيىن ا ق ش-تا COVID-19-عا شالدىعۋدىڭ 1700 جاعدايى تىركەلگەن. كوز جۇمعاندار سانى 40 تان اسادى.

اۆتور: ميرا تولەندى قىزى