داۋرەن ابايەۆ: قازاقستان ۇكىمەتى دۇنيەجۇزىلىك دەنساۋلىق ساقتاۋ ۇيىمىمەن كۇندەلىكتى بايلانىستا وتىر
«كوروناۆيرۋس وسى ۋاقىتقا دەيىن ءبىزدىڭ ەلدە تىركەلگەن بولسا - ۇكىمەتكە ونى جاسىرۋدىڭ نە قاجەتى بار ەدى؟! تىركەلگەنى جاسىرىلسا - بۇل مۇلدە ورىنسىز ءارى ءتيىمسىز ستراتەگيا بولارى ءسوزسىز. فاكتىلەردى جاسىرۋ - اۋرۋدىڭ كەڭىنەن تاراۋىنا جول اشادى. ياعني بۇلاي بولسا پروبلەمانىڭ اۋقىمى ۇلكەن بولارى داۋسىز. الدە ۇكىمەت دۇربەلەڭنەن قورقىپ وتىر دەپ ويلايسىز با؟ ءبىراق دۇربەلەڭ قازىردىڭ وزىندە ءبىزدىڭ ەل تۇگىلى دۇنيەنى سىلكىندىرىپ تۇر. ا ق ش، ەۋروپا، ازيا، افريكا - بارلىق جەردە بار. بۇل البەتتە قالىپتى قۇبىلىس»، - دەدى داۋرەن ابايەۆ «اشىق ديالوگ» باعدارلاماسىندا.
ءمينيستردىڭ ايتۋىنشا قازىرگى تاڭدا قازاقستان ۇكىمەتى دۇنيەجۇزىلىك دەنساۋلىق ساقتاۋ ۇيىمىمەن كۇندەلىكتى بايلانىستا.
«الەمدىك قاۋىمداستىقتاردىڭ، دۇنيەجۇزىلىك دەنساۋلىق ساقتاۋ ۇيىمىنىڭ ءوزىنىڭ رەاكتسياسىن دا كورىپ وتىرسىزدار. ەگەر قازاقستان بۇل فاكتىنىڭ تىركەلگەنىن جاسىرىپ وتىرعان بولسا، الەمدەگى سەرىكتەستەرىمىزدىڭ سەنىمىن جوعالتىپ قانا قويماي، بىزگە قارسى سانكتسيالىق شارالار دا قابىلدانار ەدى»، - دەدى داۋرەن ابايەۆ.
ونىڭ ايتۋىنشا، كوروناۆيرۋس ينفەكتسياسىن زەرتحانالىق دياگنوستيكالاۋ ۇلتتىق ساراپتاما ورتالىعىندا جۇرگىزىلەدى.
«لابوراتوريالاردىڭ ءبارى دە رەسەي مەن قىتايدا شىعارىلاتىن تەست-جۇيەلەرىمەن قامتىلعان. سونىمەن قاتار بارلىق سىناما قوسىمشا ەكى ورتالىقتا - اسا قاۋىپتى ينفەكتسيالار بويىنشا ورتالىق پەن ساراپتامانىڭ سانيتارلىق-ەپيدەميولوگيالىق ورتالىعىندا تەكسەرىلەدى. بۇل تەكسەرۋدىڭ ءبارى بىزگە دۇنيەجۇزىلىك دەنساۋلىق ساقتاۋ ۇيىمى ۇسىنعان تەست-جۇيەسى ارقىلى جۇرگىزىلەدى»، - دەدى داۋرەن ابايەۆ «اشىق ديالوگ» باعدارلاماسىندا.
ەسكە سالا كەتسەك كوروناۆيرۋس ينفەكتسياسىنىڭ الدىن الۋ ءۇشىن مەملەكەت باسشىسى قاسىم-جومارت توقايەۆ ناۋرىز مەرەكەسىنە ارنالعان شارالاردى جانە اسكەري پارادتى وتكىزبەۋ جونىندە تاپسىرما بەرگەن بولاتىن.
