جاڭا زاڭ جوباسىندا جۋرناليستەردىڭ مارتەبەسى مەن قۇقىقتارى ەسكەرىلگەن - اسحات سادىرباي
بۇل پىكىردى «Team Qazaqstan» رەسپۋبليكالىق جاستار قوعامدىق بىرلەستىگىنىڭ ءتوراعاسى، تەلەجۋرناليست اسحات سادىرباي ايتتى، دەپ حابارلايدى قازاقپارات ءتىلشىسى.
«جاڭا زاڭ جوباسى قوعامدا قىزۋ تالقىلاۋدا بولدى. بۇل جاقسى ءۇردىس، سەبەبى تالقىلاۋ بولسا، قىزىعۋشىلىق تا ارتادى. وسى ورايدا قۇجات جوباسى قالىڭ كوپشىلىكتىڭ نازارىن اۋداردى. زاڭ جوباسىنا قاتىستى جيىندارعا بىرنەشە رەت قاتىستىم، سول كەزدە ەلەۋلى ۇسىنىستاردى، پىكىرتالاستاردى بايقادىق»، - دەدى ا. سادىرباي پارلامەنت ماجىلىسىندە تىلشىلەرگە بەرگەن سۇحباتىندا.
سونىمەن قاتار، ا. سادىرباي ميتينگىلەردە ب ا ق وكىلدەرىنىڭ قاۋىپسىزدىگى ماڭىزدى ەكەنىن اتاپ ءوتتى.
«زاڭ جوباسىندا جۋرناليستەردىڭ ميتينگىگە قاتىستى قۇقىقتارى مەن مىندەتتەرى كورسەتىلگەن. بارلىعىمىز بىلەمىز، بۇقارالىق اقپارات قۇرالدارى تۋرالى زاڭ بار ءارى وندا جۋرناليستەردىڭ قۇقىعى مەن مىندەتى جازىلعان. بەيبىت جينالىستار تۋرالى زاڭ جوباسىندا جۋرناليستەردىڭ قۇقىعى مەن مىندەتتەرى قاجەت پە؟! مەنىڭ ويىمشا، بۇل باپ قاجەت، سەبەبى ءداستۇرلى ب ا ق باسقا كورىنىس الدى. اتاپ ايتقاندا، عالامتور، الەۋمەتتىك جەلىلەر قارىشتاپ دامىپ كەتتى. قازىر ماقالا جاريالاۋ ءۇشىن قالتاداعى سمارتفوننىڭ ءوزى جەتكىلىكتى نەمەسە الەۋمەتتىك جەلى ارقىلى تىكەلەي ەفيرگە شىعۋ مۇمكىندىكتەرى پايدا بولدى. وسى تۇستا جۋرناليستەرگە قاتىستى زاڭناما وزگەرتۋلەر مەن تولىقتىرۋلار قاجەت دەپ ويلايمىن»، - دەدى جاستار قوعامدىق بىرلەستىگىنىڭ ءتوراعاسى.
ايتا كەتەيىك، بۇگىن ماجىلىستە «قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» زاڭ جوباسى تانىستىرىلدى.
ق ر اقپارات جانە قوعامدىق دامۋ ءمينيسترى داۋرەن ابايەۆتىڭ سوزىنە قاراعاندا، قۇجات جوباسىندا بەيبىت جينالىستاردى ۇيىمداستىرۋشىلاردىڭ، وعان قاتىسۋشىلاردىڭ قۇقىقتارى مەن مىندەتتەرى ناقتى ايقىندالادى.
«ۇيىمداستىرۋشىلاردىڭ، قاتىسۋشىلاردىڭ قۇقىقتارى مەن مىندەتتەرى ناقتى ايقىندالاتىن بولادى. ب ا ق سالاسىنداعى وكىلەتتى ورگان بەيبىت جينالىستارعا قاتىساتىن جۋرناليست قىزمەتىنىڭ ەرەجەسىن، جۋرناليستىك ايىرماشىلىق بەلگىسى ءپىشىنىن قابىلدايتىن بولادى. ۇيىمداستىرۋشىلار ءۇشىن بەيبىت جينالىستاردى وتكىزۋدىڭ ىڭعايلى بولۋى ماقساتىندا ۇيىمداستىرۋشىلاردىڭ ايىرماشىلىق بەلگىلەرىنىڭ ءپىشىنى قابىلدانادى»، - دەدى داۋرەن ابايەۆ.
