كوروناۆيرۋس: ترامپ ەۋروپادان كەلۋشىلەرگە ا ق ش- قا كىرۋگە تىيىم سالدى
نۇر- سۇلتان. قازاقپارات - پرەزيدەنت دونالد ترامپ كوروناۆيرۋستىڭ تارالۋىنا جول بەرمەۋ ءۇشىن ا ق ش- تىڭ ەۋروپامەن اراداعى كەز كەلگەن قاتىناسى، سونىمەن بىرگە تەڭىز جانە اۋە تاسىمالىنىڭ 30 كۇنگە جابىلاتىنىن جاريالادى. بۇل شارالار جۇما كۇنىنەن باستالادى.
ترامپ حالىققا كوروناۆيرۋستىڭ تارالۋىنا بايلانىستى ارناعان ۇندەۋىندە «قاتاڭ، ءبىراق قاجەتتى شەكتەۋلەر» كوروناۆيرۋستى جۇقتىرۋدىڭ 460 وقيعاسى تىركەلگەن ۇلى بريتانياعا قاتىستى قولدانىلمايتىنىن ايتتى.
سونداي- اق، ترامپ كونگرەستى كوروناۆيرۋستىڭ ا ق ش ەكونوميكاسىنا اسەرىمەن كۇرەس اياسىندا سالىق جۇكتەمەسىن جەڭىلدەتۋ شارالارىن قولدانۋعا شاقىردى.
سارسەنبىدە دۇنيەجۇزىلىك دەنساۋلىق ساقتاۋ ۇيىمى (د د س ۇ) جاڭا كوروناۆيرۋستىڭ تارالۋى پاندەميا رەجيمىنە جەتكەنىن جاريا ەتتى.
بۇگىندە ا ق ش- تا كوروناۆيرۋس ىندەتىن جۇقتىرۋدىڭ 1135 وقيعاسى تىركەلگەن، اۋرۋعا شالدىققان 38 ادام قايتىس بولدى.
ۆيرۋستىڭ وشاعى نيۋ- يورك قالاسىنان سولتۇستىككە قاراي ورنالاسقان نيۋ- روشەلدە انىقتالدى. جەرگىلىكتى تۇرعىندارعا كومەك كورسەتۋ ءۇشىن وندا اسكەريلەر جىبەرىلدى. ۇلتتىق گۆارديا ۇيلەرىندە قاماۋدا وتىرعان تۇرعىندارعا ازىق- تۇلىك جەتكىزۋدە.
ا ق ش استاناسى ۆاشينگتوندا سارسەنبى كۇنى توتەنشە جاعداي جاريالانعان. 1000 نان استام ادامنىڭ قاتىسۋىمەن بولاتىن جينالىستار وتكىزۋگە تىيىم سالىندى. مەريا جەكەلەگەن اۋداندار مەن كۆارتالداردا كارانتين جاريالاۋعا قۇقىلى. الداعى بولاتىن بارلىق مەرەكەلەر مەن فەستيۆالدار توقتاتىلدى. ت ج 31 - ناۋرىزعا دەيىن ەنگىزىلگەن. ازىرگە ەل استاناسىندا اۋرۋ جۇقتىرۋدىڭ 10 وقيعاسى تىركەلدى.
