الەۋمەتتىك جەلىدە كوروناۆيرۋس تۋرالى تاراعان اقپارات جالعان - الماتى اكىمدىگى

«الەۋمەتتىك جەلىلەردە الماتىدا كوروناۆيرۋس ينفەكسياسى تىركەلسە، جوعارى دايىندىقتى قامتاماسىز ەتۋ شارالارى تۋرالى قالا اكىمىنىڭ بۇيرىعى بار دەگەن اقپارات تاراپ كەتتى. ءبىز تاراتىلعان اقپاراتتىڭ شىندىققا جاناسپايتىنىن رەسمي تۇردە حابارلايمىز. بۇل - جالعان. سونىمەن بىرگە، قالادا COVID-2019 كوروناۆيرۋستىق ينفەكسياسىنىڭ تارالۋىنا قارسى بەلسەندى جۇمىس ءجۇرىپ جاتقانىن ءمالىم ەتەمىز. قازىرگى ۋاقىتتا مەگاپوليستەگى جاعداي تۇراقتى. كوروناۆيرۋس تىركەلگەن جوق»، - دەپ جازدى اكىمىنىڭ باسپا ءسوز حاتشىسى اسەت مۇقاجانوۆ Instagram-دا.

سونىمەن قاتار، ول ازاماتتاردى رەسمي دەرەككوزدەردەگى اقپاراتتى پايدالانۋعا شاقىردى. انىقتاما ءۇشىن 1406 Call-ورتالىعى تاۋلىك بويى جۇمىس ىستەيدى.

«الماتى قالاسى اكىمدىگىنىڭ قوعاممەن بايلانىس قىزمەتى ۇنەمى كۇندەلىكتى جاعداي تۋرالى حابارلايدى. الماتىدا كوروناۆيرۋستىق ينفەكسيانىڭ الدىن الۋ جونىندەگى ايماقتىق شتاب جۇمىس ىستەيدى. كۇشەيتىلگەن سانيتارلىق- كارانتيندىك باقىلاۋ شارالارى جۇزەگە اسىرىلۋدا. قالاداعى جاعداي باقىلاۋدا»، - دەپ اتاپ وتكەن ول.