ءبىر ەلدى ەكى پرەزيدەنت قاتارىنان باسقارۋعا كىرىسكەنىن جاريالادى
نۇر-سۇلتان. قازاقپارات - كابۋل قالاسىندا ەكى كانديدات اۋعانستان پرەزيدەنتى قىزمەتىنە كىرىسكەنىن بىلدىرەتىن سالتاناتتى ءراسىمدى قاتار وتكىزدى.
قازىرگى ءىس باسىنداعى مەملەكەت باسشىسى اشراف عاني پرەزيدەنت سارايىندا انت قابىلدادى. ءدال سول ۋاقىتتا كورشىلەس سارايدا ءوزىن «پرەزيدەنت سايلاۋىندا جەڭدىم» دەپ جاريالاعان پرەمەر- مينيستر ابدۋللا ابدۋللانىڭ سالتاناتتى ۇلىقتاۋ ءراسىمى ءوتتى.
اۋعانستانداعى پرەزيدەنت سايلاۋى 2019 -جىلدىڭ 28 - قىركۇيەگىندە وتكەن. قورىتىندىسى بەس ايدان سوڭ، 2020 -جىلدىڭ 18 - اقپانىندا جاريالانعان. اۋعانستان سايلاۋ كوميسسياسىنىڭ قورىتىندىسى اشراف عاني 50,64 پايىز داۋىسپەن جەڭدى دەپ كورسەتكەن. ونىڭ جەڭىسىن الەم قاۋىمداستىعى مويىنداعان.
ابدۋللا ابدۋللا 39,52 داۋىسپەن ەكىنشى ورىنعا توقتادى. الايدا سايلاۋ قورىتىندىسىن مويىنداۋدان باس تارتقان ول ءوز ۇكىمەتىن قۇرۋدى جوسپارلاپ وتىر.
اۋعانستاندا قوس ۇكىمەت «تاليبان» قوزعالىسىمەن كەلىسسوز قارساڭىندا پايدا بولعالى تۇر. «تاليبان» وكىلدەرى 29 - اقپاندا ا ق ش- پەن بىتىمگە قول قويعان. ءبىتىم قۇجاتىندا حالىقارالىق كواليتسيا كۇشتەرىنىڭ اۋعانستاننان شىعارىلاتىنى كوزدەلگەن. تالىپتەر وزدەرى باقىلايتىن اۋماقتا تەرروريستەردى پانالاتپاي، اۋعانستان ۇكىمەتىمەن كەلىسە جۇمىس ىستەۋگە مىندەتتەنگەن.
NBC تەلەارناسى جوعارى لاۋازىمدى شەنەۋنىكتەرگە سىلتەي وتىرىپ، ا ق ش بارلاۋ مالىمەتتەرى «تالىپتەردىڭ ءبىتىم شارتىن ورىندامايتىنىن، شەتەل اسكەرى اۋعان جەرىنەن شىعىسىمەن ۇكىمەت اسكەرىنە شابۋىل جاساۋى مۇمكىن ەكەنىن» حابارلادى. قازىر تالىپتەر اۋعان جەرىنىڭ جارتىسىنا جۋىعىن باقىلاپ وتىر.
ال ۆاشينگتون اۋعانستاننىڭ «ءبىرتۇتاستىعى مەن ەگەمەندىگىن» قولدايدى جانە قوس ۇكىمەت قۇرۋعا باعىتتالعان كەز كەلگەن ارەكەتكە قارسىلىق بىلدىرەدى دەپ مالىمدەدى ا ق ش مەملەكەتتىك حاتشىسى مايك پومپەو.
«ءبىز قوس ۇكىمەت قۇرۋعا باعىتتالعان جانە ساياسي ماسەلەلەردى كۇشپەن شەشۋدى كوزدەيتىن كەز كەلگەن ارەكەتكە ءۇزىلدى- كەسىلدى قارسىمىز» دەپ مالىمدەدى پومپەو.
بۇعان قوسا ول 9 - ناۋرىزدا كابۋلدا جاسالعان تەررورلىق شابۋىلدى ايىپتادى. Khaama Press اقپارات اگەنتتىگى جەكسەنبى كۇنى اشراف عانيدىڭ يناۋگۋراتسياسى ءوتىپ جاتقان كەزدە پرەزيدەنت سارايى ماڭىنا ءتورت سنارياد تۇسكەنىن حابارلاعان. شابۋىلعا جاۋاپكەرشىلىكتى «يسلام مەملەكەتى» ەكسترەميستىك توبى العان.
كورشى ورنالاسقان ەكى سارايداعى سالتاناتتى شارالارعا جۇزدەگەن ادام قاتىسقان.
اشراف عانيدىڭ يناۋگۋراتسياسىنا قاتىسۋشىلار اراسىندا ا ق ش- تىڭ اۋعانستان بويىنشا ارنايى وكىلى زالماي حاليلزاد پەن اۋعانستانداعى حالىقارالىق كواليتسيا كۇشتەرىنىڭ باسشىسى، ا ق ش گەنەرالى سكوتت ميللەر دە بولدى.
www.azattyq.org
