جاپونيادا سۋمودان يمپەراتور كۋبوگىنىڭ تۋرنيرى العاش رەت كورەرمەنسىز وتۋدە

توكيو. قازاقپارات - بۇگىن وساكا قالاسىندا سۋمودان جاپونيا يمپەراتورىنىڭ كۋبوگىنا ارنالعان كوكتەمگى تۋرنير باستالدى.

كوروناۆيرۋستىڭ تارالۋ قاۋپىنە بايلانىستى تۋرنير العاش رەت كورەرمەنسىز وتۋدە، دەپ حابارلايدى قازاقپارات حابار 24 كە سىلتەمە جاساپ.

كورەرمەندەردىڭ بولماعانىنا قاراماستان، ەلدىڭ قوعامدىق تەلەارناسى تىكەلەي ەفيردەن جارىستىڭ ترانسلياتسياسىن جۇرگىزدى. جاپونيانىڭ سۋمو فەدەراتسياسى ەگەر سپورتشىلاردىڭ بىرەۋى كوروناۆيرۋسپەن اۋىرسا، وندا كوكتەمگى تۋرنير بىردەن توقتاتىلاتىنىن اتاپ ءوتتى. جەرگىلىكتى تۇرعىن قىزىعۋشىلىعى جوعارى اتالمىش جارىس ناۋرىزدىڭ 8 ىنەن 22 سىنە دەيىن جالعاسادى.

سۋمو - جاپونياداعى ەڭ تانىمال سپورت ءتۇرى. تۋنيرگە مىڭداعان كورەرمەن جينالادى. ءتۋرنيردىڭ سوڭعى كۇنىندە ەكى ەكودزۋننىڭ (سۋمو بالۋانىنىڭ ەڭ جوعارعى دارەجەسى) جەكپە- جەگىندە ينە شانشار ورىن بولمايدى.

قازىرگى ۋاقىتتا جاپونيادا كوروناۆيرۋس جۇقتىرعاندار سانى 1150 ادامنان استى، 14 ى كوز جۇمدى. اۋرۋ جۇقتىرعانداردىڭ كوپشىلىگى (696 ادام) - Diamond Princess كرۋيز لاينەرىنىڭ جولاۋشىلارى مەن ەكيپاج مۇشەلەرى.