كوندۋكتور گۇلنار مەيىرمانوۆا: ادام جۇزىندە جىلۋلىق، سوزدە - سىيلاستىق بولۋى كەرەك

اۆتوبۋسقا مىنگەن جولاۋشىلاردىڭ كوبى ونى تانىپ، جىلى شىرايمەن امانداسىپ جاتادى. سەبەبى ءار اداممەن ازىلدەسىپ، كۇلىمدەي سويلەسەتىن، قاجەت كەزدە قولداپ، دەمەۋ بىلدىرەتىن كوندۋكتور كوپتىڭ ريزاشىلىعىنا يە، دەپ حابارلايدى قازاقپارات.

ادەتتە، كوندۋكتوردىڭ جۇمىس كۇنى وتە ەرتە باستالادى. كەيبىر قالا تۇرعىندارى تاڭعى 7 دە ۇيقىدان ەندى ويانىپ جاتسا، كوندۋكتورلار ساعات

04.50 دە جۇمىس ورنىندا بولادى.

- بۇل اۆتوبۋستىڭ ءجۇرۋ كەستەسىنە قاراماستان، بارلىعى ءۇشىن ورتاق تالاپ. كەيبىر كوندۋكتورلاردا العاشقى تاسىمال 5.30 دا، ەندى بىرەۋلەردە 5.45 تە نەمەسە 6.00 دە. قالاي بولعاندا دا ساعات بەسكە ون قالعاندا تۇگەلدەي بازاعا جەتۋگە ءتيىسپىز دەيدى گۇلنار مەيىرمانوۆا..

اۆتوبۋسى جولعا ەرتە شىققاندار كەشكى ساعات 20.00 دەن كەيىن ۇيلەرىنە قايتادى. ال جۇمىستى كەش باستاعاندار 22.45 كە تامان عانا بوسايدى. جاس كوندۋكتورلار وزىنەن ۇلكەن، تاجىريبەلى اپايلارعا «جۇمىس تىم اۋىر. كۇنى كەشكە دەيىن اياقتا تىك تۇرامىز» دەپ شاعىمدانىپ جاتادى.

- مەن ولارعا «بۇل دەگەن گيمناستيكا ەمەس پە؟ اياق پەن قولعا جاتتىعۋ دەپ قالجىڭداپ، كوڭىلدەرىن كوتەرۋگە تىرىسامىن»، - دەيدى گۇلنار ءادىلحان قىزى. - ونىڭ ۇستىنە ءبىزدىڭ مىندەتكە سالون ءىشىن جۋۋ دا كىرەدى. مىسالى ءوزىم اۆتوبۋستىڭ ەدەنىن كۇنىنە ەكى- ءۇش رەت جۋىپ شىعامىن. ءبىر سوزبەن ايتقاندا، كوندۋكتور - كۇندەلىكتى قوزعالىستا.

اپايلارىنىڭ ءسوزىن ەستىگەن قىزدار تاڭدانىپ تا قالاتىن كورىنەدى. راسىمەن دە ەگدە جاستاعى كىسىدەن وسىنداي كوزقاراستى ەشكىمنىڭ كۇتپەيتىندىگى انىق. گۇلنار مەيىرمانوۆا «مارات- م» كومپانياسىنداعى جاسى ەڭ ۇلكەن كوندۋكتور. زەينەتكەرلىككە شىققانىنا 6 جىل وتسە دە ءوز جۇمىسىن جالعاستىرۋدا. ارىپتەستەرىن دەمەۋدەن شارشامايدى. تەك ولارمەن عانا ەمەس، جولاۋشىلارمەن دە جاقسى ارالاسا بىلەدى.

جۇمىس بارىسىندا ءارتۇرلى جاعدايلاردىڭ دا كەزدەسەتىنى بار.

بىردە قاڭتاردىڭ قاقاعان ايازىندا قوعامدىق كولىككە كىرىپ كەلگەن ايەل بىردەن ءوز نارازىلىعىن بىلدىرگەن: «ءاي، مىنا اۆتوبۋستارىڭىز نەگە سۋىق؟».

- «ءيا، ىستىق ەمەس»، - دەپ كەلىسكەن گۇلنار مەيىرمانوۆا ارى قاراي ءوز ءسوزىن كۇلىمسىرەي جالعاستىرادى. «ءبىراق وسىدان 5 مينۋت بۇرىن ودان دا سۋىق ەدى. ءسىز كىرگەننەن كەيىن بىردەن جىلىنىپ قالدى. جۇمىسىمىزعا تۇسىنىستىكپەن قاراعانىڭىز ءۇشىن راقمەت».

مۇنى ەستىگەن جولاۋشى اشۋلى كەيپىن جوعالتىپ، جۇزىنە كۇلكى ۇيىرىلەدى. ءبىر قىزىعى، اراعا ءبىرشاما ۋاقىتتان كەيىن اۆتوبۋسقا ەكى قاريا مىنگەن. سول كەزدە گۇلنار اپاي: «قۇرمەتتى جولاۋشىلار! ءبىزدىڭ ارامىزعا ورتا جاستاعى ەكى ادام قوسىلدى»، - دەيدى داۋىستاپ. جاپىرىلا قاراعاندارعا، «جو-جوق، قاتە ەستىمەدىڭىزدەر، ەگدە جاستاعى ەمەس، ورتا جاستاعىلار» دەمەس پە. اۆتوبۋس ءىشى كۇلكىگە كومىلگەن. جاستار جاعى اتىپ تۇرىپ ورىن بەرگەن.

ءبىرازدان سوڭ تاعى ءبىر ايەل سالونعا كوتەرىلەدى. بۇل كىسى دە سول ورتا جاستاعىلاردىڭ ساناتىنان سەكىلدى. ءبىراق ول جەكە كۋالىگىن كورسەتكىسى كەلمەيدى. ءتىپتى اشۋعا بۋلىعىپ: «مىنا تيىن- تەبەنىڭدى ال دا ارمەن ءجۇرشى»، - دەيدى كوندۋكتوردى جاقتىرماي.

ال گۇلنار مەيىرمانوۆا بولسا سابىرلى ۇنمەن: «ىڭعايسىزدىق تانىتقانىم ءۇشىن كەشىرىڭىز. بەت- الپەتىڭىزگە قاراسام، جاس كورىنەدى ەكەنسىز. سوندىقتان ناقتى نەشەدە ەكەنىڭىزدى انىقتاۋ قيىنعا سوعىپ تۇر»، - دەپ جاۋاپ بەرگەن.

وسى ارادا بىرەر ساۋال تاستاۋعا تۋرا كەلدى.

- ادامدارمەن جۇمىس ىستەگەن اۋىر ما؟

- جوق. كەرىسىنشە قىزىقتى.

- اشى سۋدان ۇرتتاپ العان جولاۋشىلار قيىندىق تۋدىرماي ما؟ مىسالى تالتىرەكتەپ ارەڭ تۇرعان ەر ادام اقشا تولەمەي قويسا، قايدا باراتىنىن دا ايتپاسا، نە ىستەيسىز؟

- ونى شەت شاققا قاراي جايعاستىرىپ، «تىنىش وتىر. ۇيىقتاپ الساڭ دا بولادى. تەك باسقا جولاۋشىلاردىڭ مازاسىن الما. ايتپەسە سەنى پوليتسيانىڭ بەكىنىس پۋنكتىنە اپارىپ تاستايمىز»، - دەپ قاتاڭ ەسكەرتەمىن.

- ال ەگەر تەكسەرۋشى كىرىپ قالسا شە؟ ونىڭ بيلەتى جوق قوي.

- جاعدايدى تۇسىندىرەمىن. تەكسەرۋشى دە ادام ەمەس پە؟ ونىڭ دا جانۇياسى بار. ماس كىسى - بىرەۋگە كۇيەۋ، بىرەۋگە اكە، بىرەۋگە اعا. سۋىقتا دالاعا قۋىپ شىقپايمىن عوي. دىتتەگەن جەرىنە جەتىپ السىن. توسىپ وتىرعان جاقىنى بار شىعار. ءتىپتى كوبىسى ايالدامادان تۇسەردە ەسىن جيىپ، اقشاسىن تولەپ كەتەدى.

- سوندا ءسىز ماس جانە اشۋشاڭ جولاۋشىلارعا رەنجىمەيسىز بە؟

- جوق. ولار قانداي دا ءبىر قيىندىققا تاپ بولعان نەمەسە كۇيبەڭ تىرلىكتىڭ قام- قارەكەتىنەن شارشاعان جاندار دەپ تۇسىنەمىن.

قوعامدىق كولىكتە ادام از بولعان كەزدە زەرىگىپ كەتەمىن. كەشكە قاراي جۇمىستان قايتقان جۇرت اۆتوبۋسقا مىنگەندە ۇيگە تەزىرەك جەتكىلەرى كەلىپ وتىرادى. قارىندارى اش. ءبىرقاتارىنىڭ باسى اۋىرىپ تۇرعاندىعىن دا بايقايمىن. وسى كەزدە بارىنە جاقسى- كوڭىل كۇي سىيلاۋ ءۇشىن ازىلدەپ، كوڭىلدەرىن كوتەرۋگە تىرىسۋعا دا تۋرا كەلەدى.

مەيرام دەمەكشى، جىل سايىن جەلتوقساننىڭ اياعىندا گۇلنار مەيىرمانوۆا اقشاقار بولىپ كيىنەدى. وسىلاي 30 جانە 31-جەلتوقسان كۇندەرى تاڭەرتەڭنەن كەشكە دەيىن جولاۋشىلاردى قۇتتىقتايدى.

«بۇل مەنىڭ ەمەس، باسشىلىعىمىزدىڭ باستاماسى. جۇرگىزۋشى مەن كوندۋكتورلاردىڭ ەرتەگى كەيىپكەرلەرىنە اينالىپ جۇرگەنىنە بىرنەشە جىل بولدى. ءار ءتۇرلى باعىتتاعى اۆتوبۋستارعا كىرىپ ولەڭ وقىپ، تۇرعىندارعا كامپيت بەرەمىز. كومپانيا يەلەرى ارنايى اقشا بولەدى. مۇنداعى نەگىزگى ماقسات - كوپشىلىككە ازداعان بولسا دا قۋانىش سىيلاۋ.

ءبىر قىزىعى، گۇلنار مەيىرمانوۆا اقشاقار بولۋعا ءوزى نيەت بىلدىرگەن. كوندۋكتورلار ۇجىمىنىڭ ىشىندە ەڭ ۇلكەنى بولسا دا كوڭىلى جاس. ونى كورگەن جولاۋشىلار ريزاشىلىقتارىن ءبىلدىرىپ، بىرگە فوتوسۋرەتكە ءتۇسىپ تە جاتادى.