پوليتسيا پولكوۆنيگى اتانامىن دەپ ويلاعان جوق ەدىم - ءتانزيليا داۋلەتوۆا

ب ق و پوليتسيا دەپارتامەنتى شتاب باسقارماسىنىڭ باستىعى، پوليتسيا پولكوۆنيگى ءتانزيليا داۋلەتوۆا وسىلاي ايتتى، دەپ حابارلايدى قازاقپارات ءتىلشىسى.

ونىڭ ايتۋىنشا، ءوزىنىڭ نەگىزگى ماماندىعى ماتەماتيكا جانە ينفورماتيكا ءپانىنىڭ مۇعالىمى ەدى.

دارىندى بالالارعا ارنالعان مەكتەپتە ۇستازدىق ەتىپ جۇرگەن ءتانزيليا تۇرسىنعالي قىزى بۇل سالاعا جۇبايىنىڭ شاقىرۋىمەن اۋىسقان ەكەن. ول كەزدە ەرى ورال قالالىق ىشكى ىستەر باسقارماسىندا ينسپەكتور- كريميناليست قىزمەتىن اتقاراتىن.

وسىلايشا ءتانزيليا ىشكى ىستەر ورگاندارىنداعى قىزمەت جولىن 1996 -جىلى ەسەپكە الۋ جونىندەگى تەحنيك بولىپ باستادى. كەيىن ورال قالالىق ىشكى ىستەر باسقارماسىنىڭ اقپارات ورتالىعىندا جۇمىس ىستەدى.

- باستاپقىدا مىندەتىم تاۋلىكتىك مالىمەتتەردى ەسەپكە الۋ بولاتىن. قازىر سالىستىرىپ قاراسام، سول ۋاقىتتاعى جۇمىس پەن قازىرگى قىزمەتتىڭ اراسىنداعى ايىرماشىلىق جەر مەن كوكتەي دەۋگە بولادى. توقسانىنشى جىلدارى اقپارات قىزمەتكەرلەرى بارلىق ەسەپتەر مەن مالىمەتتەردى قولمەن جازىپ، ءار ءتۇرلى رەكۆيزيتتەر بويىنشا كارتوچكالاردى قايتا-قايتا ەسەپتەپ، جۋرنالدارعا جازىپ، تولتىرىپ ءجۇردى. العاش دەربەس كومپيۋتەرلەر پايدا بولعاننان كەيىن اقپاراتتار سوعان ەنگىزىلىپ، ديسكەتامەن جۇمىس جاسادىق. ال اۋداندىق بولىنىستەر اقپاراتتى قاعازعا جازىپ، قولمەن اكەلەتىن، ءبىز سونى كومپيۋتەرگە ەنگىزەتىنبىز. قازىر ونداي ديسكەتالار شىعارىلمايدى دا. بۇگىندە قالالىق جانە اۋداندىق بولىنىستەر وزدەرىنىڭ جۇمىس ورىندارىندا وتىرىپ، اقپاراتتى جۇكتەپ جىبەرە الادى. زاماناۋي تەحنولوگيانىڭ كومەگىمەن مينيسترلىك پەن پوليتسيا دەپارتامەنتى اپپاراتىنىڭ قىزمەتكەرلەرى ول مالىمەتتەردى سول بويدا قابىلدايدى، - دەيدى ءتانزيليا تۇرسىنعالي قىزى.

كەيىن اقپارات بايلانىس بولىمىنە قوسىلدى. 2008 -جىلى ت. داۋلەتوۆا سول ءبولىم باستىعىنىڭ ورىنباسارى بولدى. 2017 -جىلدىڭ اقپان ايىندا دەپارتامەنت اقپاراتتىق تالداۋ ورتالىعىنىڭ باستىعى بولىپ بەكىتىلدى. ال 2019 -جىلدىڭ مامىر ايىنان شتاب باسقارماسىنىڭ باستىعى قىزمەتىن اتقارىپ كەلەدى.

- شىنى كەرەك، بۇل قىزمەت وزگەشە، جاۋاپكەرشىلىگى دە ۇلكەن ەكەن. بارلىق قيىندىققا توتەپ بەرىپ، بەيىمدەلۋگە تۋرا كەلدى. ەندى بارلىق دەپارتامەنت قىزمەتى ءۇشىن جاۋاپ بەرەسىڭ. ءبىر سوزبەن ايتقاندا، شتاب دەپارتامەنتتىڭ ميى دەيدى، سول راس! - دەيدى پوليتسيا پولكوۆنيگى.

- ءتانزيليا تۇرسىنعالي قىزى، 8-ناۋرىز مەرەكەسى سىزگە نەسىمەن قىمبات، ودان نە كۇتەسىز؟

- ءبىز دە اتا-انا ۇلگىسىن كورىپ وستىك. ەرتەرەكتە اكەم پلاستماسسادان جاسالعان گۇلىن ارتىنا جاسىرىپ كەلىپ، اناما سىيلايتىن. بۇل - ەڭ الدىمەن انالار مەرەكەسى. قازىر انامدى اڭسايمىن، جوقتايمىن، اناعا جەتەتىن ەشكىم جوق قوي.

مەن جالپى مەرەكەنى جەك كورمەيمىن. تۋعان كۇنىمدە، باسقالاي مەيرامدا بالام مەنى سىيلاپ، شوق گۇلىن، تارتۋىن ۇسىنىپ جاتادى. سول بالا- كەلىنىمنىڭ قۋانتقانىنان ارتىق ەشتەڭە جوق. ال قىزمەت بابىندا ۇلكەن سىيلىق كۇتپەيمىز. ايەل زاتىنا كىشكەنە كوڭىل بولسە، سونىڭ ءوزى جەتىپ جاتىر.

- قىزمەت باسپالداعىمەن وسىلايشا كوتەرىلەمىن دەپ ويلادىڭىز با؟

- قاراپايىم قىزمەتكەردەن وسى لاۋازىمعا دەيىن جەتەمىن دەپ ويلاعان جوقپىن. ءبارى دە تىنىمسىز ەڭبەكپەن كەلدى.

نەگىزى ادام قانداي جۇمىس جاساماسىن، بارىنە اسا ۇقىپتىلىقپەن، جاۋاپكەرشىلىكپەن قاراۋ كەرەك. تالماي ەڭبەك ەتسەڭ، اتاق- داڭق، مارتەبە دەگەنىڭ وزدىگىنەن كەلەتىن دۇنيە ەكەن. سونىمەن قاتار ەشكىمگە قيانات جاساماي، ادامدارمەن جىلى قارىم- قاتىناستا بولۋ قاجەت. وزگەگە ىستەگەن جاقسىلىعىڭ ءتۇبى قايتادى ەكەن. بالاما دا وسى اقىلىمدى ايتىپ وتىرامىن.

- ۇلىڭىزدىڭ اتا-اناسىنىڭ جولىن قۋعانىن قالادىڭىز با؟

- بالام، شىنى كەرەك، ەسەيگەسىن ماماندىقتى ءوز ەركىمەن تاڭدادى. كۇنى بۇگىن ول اقتوبە قالاسىندا ءتىس دارىگەرى قىزمەتىندە، كەلىنىم دە سونداي ماماندىق الامىن دەپ، ءبىلىم الىپ جاتىر.

- حالىقارالىق ايەلدەر كۇنىنە وراي زامانداستارىڭىزعا نە تىلەك ايتار ەدىڭىز؟

- كوكتەم مەرەكەسىمەن بارلىق ارىپتەستەرىمدى جانە زامانداستارىمدى قۇتتىقتايمىن. ءبىز ەر ازاماتتارمەن بىرگە قىزمەت اتقارامىز، دەگەنمەن زاتىمىز ايەل بولعاندىقتان، نازىكتىگىمىزدى جوعالتپاساق ەكەن. قىزمەتپەن بايلانىستى ماسەلەنىڭ بارلىعى ءۇيدىڭ تابالدىرىعىندا قالىپ، وتباسىندا تىنىشتىق، باق- بەرەكە ورناپ، جاقىن ادامدارىڭ قۋانتا بەرسە ەكەن دەيمىن. ەڭ باستىسى، ەلىمىز امان، جۇرتىمىز تىنىش بولسىن!

اۆتور: ەلجان ەرالى