جاس قىزدىڭ ۇسىنىسى پۋتيندى ابدىراتىپ تاستادى
الماتى. قازاقپارات – پۋتيننىڭ يۆانوۆو قالاسىنا جاساعان جۇمىس ساپارى كەزىندە قىزىقتى وقيعا بولدى. رەسەيدىڭ يۆانوۆو قالاسىنىڭ تۇرعىنى پرەزيدەنت ۆلاديمير پۋتيننەن وزىنە ۇيلەنۋدى ءوتىندى، دەپ حابارلايدى ر ي ا نوۆوستي.
رەسەي باسشىسى ۆلاديمير پۋتين يۆانوۆوداعى بالالار ەمحاناسىن ارالاپ، قالا تۇرعىندارىمەن اڭگىمەلەستى. سول ساتتە ءبىر قىز وعان «ماعان ۇيلەنىڭىزشى» دەپ ايعايلاعان.
پۋتين ابدىراپ قالدى. ول ءبىرتۇرلى ۇسىنىس جاساعان قىزبەن سويلەستى، كەيىن قالا تۇرعىنى وعان العىسىن ايتتى.
كەيىنىرەك پۋتين جۇرتشىلىق وكىلدەرىمەن كەزدەسۋىندە يۆانوۆوعا جۇمىس ساپارى كەزىندە بولعان وقيعانى ەسكە الدى.
«بوس اڭگىمە ايتقىم كەلمەيدى، ءبىراق بۇدان قاشىپ قۇتىلا المايسىڭ. يۆانوۆو ءاردايىم قالىڭدىقتار قالاسى اتالىپ كەلدى، بۇگىن ماعان دا ۇسىنىس جاسادى»، - دەدى رەسەي پرەزيدەنتى.
پۋتين وزىنە ۇسىنىس جاساعان قىز ەندى بۇكىل ەلگە تانىمال بولاتىنىن اتاپ ءوتتى.
