سپورتشى، ءبيشى، بايگەشى - قوستانايدا امبەباپ پوليتسەي جۇمىس ىستەيدى

ول «قازاقپارات» ح ا ا تىلشىسىنە قىزمەتىنىڭ قىزىعى مەن قيىندىعى تۋرالى ايتىپ بەردى.

اسەل ءجۇسىپ قىزى 1997 -جىلى ناۋىرزىم اۋدانىندا تۋعان. 2015 -جىلى م. ەسبولاتوۆ اتىنداعى ق ر ءى ءى م الماتى اكادەمياسىنا وقۋعا تۇسەدى. مۇندا اقپاراتتىق جۇيەلەر ماماندىعىن يگەرىپ شىقتى.

«بولاشاق ماماندىعىمدى بالا كەزىمدە انىقتادىم دەسە دە بولادى. باستاۋىش سىنىپتا «كىم بولعىم كەلەدى؟» دەگەن تاقىرىپتا ءبارىمىز شىعارما جازدىق قوي. سول كەزدەن- اق پوليتسيا ماماندىعى قىزىقتىراتىن. وتباسىمىزبەن ءتارتىپ ساقشىلارى تۋرالى شىتىرمان وقيعالى كوركەم فيلمدەردى كوپ كوردىك. مىنە، وسىلايشا ارمان جەتەگىنە ەرىپ كەتتىم»، - دەيدى جاس پوليتسەي.

اسەل مۇراتبەكتىڭ قۇقىق قورعاۋ سالاسىنا كەلۋىنىڭ باستى سەبەبى - سپورت. 2008 -جىلعى قىتايدىڭ بەيجىڭ قالاسىندا وتكەن جازعى وليمپيادا ويىندارىندا ەل سپورتشىلارىنا جانكۇيەر بولدى.

«سول دودادا قازاقستانعا ەڭبەك سىڭىرگەن سپورت شەبەرى ەلەنا شالىگينا «قولا» جۇلدەگەر اتاندى. وسى ساتتەن باستاپ، مەن كۇرەسپەن اينالىسۋعا بەل بۋدىم. 2008 -جىلى كۇرەس زالىنىڭ ەسىگىن اشتىم. باپكەردىڭ جاتتىقتىرۋىنىڭ ارقاسىندا سپورتتا جوعارى جەتىستىككە جەتە باستادىم. بالا كۇنگى ارمانىم مەن سپورتتاعى كورسەتكىشىم ماماندىعىما جەتەلەدى. الماتىداعى ق ر ءى ءى م اكادەمياسىنا تۇسكەندە قىزدار ۆزۆودىنىڭ كومانديرى ەتىپ تاعايىندادى. كەيىن كىشى سەرجانت اتاعىن الدىم»، - دەپ جالعادى اسەل ءجۇسىپ قىزى.

سپورتشى قىز وقۋ ورنىنىڭ اتىنان رەسپۋبليكالىق، حالىقارالىق جارىستارعا قاتىسىپ ءجۇردى. 2013 -جىلى ەركىن كۇرەستەن سپورت شەبەرلىگىن ورىندادى. امبەباپ اسەل پاراشيۋتتەن سەكىرۋ جانە «قىز قۋۋ» سپورتىنان جوعارعى جەتىستىكتەرگە جەتتى. سونىمەن قاتار ول كوركەم ءسوز وقۋ مەن بي سايىستارىنىڭ بىرنەشە مارتە جۇلدەگەرى.

«2019 -جىلى قوستاناي وبلىسى پوليتسيا دەپارتامەنتىنىڭ اقپاراتتاندىرۋ جانە بايلانىس باسقارماسىنا جۇمىسقا تۇردىم. ءبىر- ەكى جىلداعى ەڭبەگىم ەلەنىپ، ق ر ىشكى ىستەر ءمينيسترىنىڭ قولىنان ماراپات الدىم. دەگەنمەن پوليتسەيگە ەڭ جاقسى جوعارى باعانى حالىق بەرەدى»، - دەپ ءتۇيدى اسەل مۇراتبەك.

ۇرپاعىن كەز كەلگەن قاتەردەن قورعاي بىلگەن انالارىمىزدىڭ سارقىلماس سارقىتىنداي بولىپ، ەلىمىزدىڭ بولاشاعى ءۇشىن ەڭبەك ەتىپ كەلە جاتقان امبەباپ پوليتسەيدىڭ الار اسۋلارى ءالى الدا. بۇعان بەك سەندىك!

اۆتور: قاسقىرباي قويشىمانوۆ