ەلباسى: سيرياداعى جاعدايدى تۇراقتاندىرۋ ءۇشىن استانا پروتسەسىنىڭ جالعاسۋى ماڭىزدى

كەزدەسۋدە ەلباسى قازاقستان مەن رەسەي اراسىنداعى ىنتىماقتاستىقتىڭ بارلىق باعىتى بويىنشا ەكىجاقتى قارىم- قاتىناستىڭ دەڭگەيى جوعارى ەكەنىن اتاپ ءوتتى.

- ءبىز سىزبەن ۇزاق ۋاقىتتان بەرى جۇمىس ىستەپ كەلەمىز. ءارقاشان ءتىل تابىسىپ، ارامىزدا تۇسىنىستىك ورنادى. مەن پرەزيدەنت رەتىندە وكىلەتتىلىگىمدى توقتاتقانىمدى بىلەسىز. ەندى مەن زاڭ بويىنشا قاۋىپسىزدىك كەڭەسىنىڭ ءتوراعاسى مارتەبەسىنە يە بولدىم. ەكەۋمىز تاعى دا ارىپتەس بولدىق. سوندىقتان، جۇمىس ىستەيىك، سىرتقى ساياسات بويىنشا پىكىر الماسايىق، - دەدى نۇرسۇلتان نازاربايەۆ.

ءوز كەزەگىندە رەسەي قاۋىپسىزدىك كەڭەسى ءتوراعاسىنىڭ ورىنباسارى مەملەكەتارالىق ىنتىماقتاستىقتىڭ ماڭىزدىلىعىن ايتتى.

- مەنىڭ ءاربىر جاڭا مەملەكەتتىك قىزمەتىم سىرتقى ساياسات تۇرعىسىنان قازاقستانعا ساپارمەن باستالىپ كەلەدى. ول كەزدەيسوقتىق ەمەس. بۇل ءبىزدىڭ وداقتاستىق قاتىناسىمىزدى بىلدىرەدى، سونىمەن قاتار، سىزگە دەگەن قۇرمەتىمنىڭ بەلگىسى، - دەدى د. مەدۆەديەۆ.

اڭگىمە بارىسىندا قازاقستان رەسپۋبليكاسى قاۋىپسىزدىك كەڭەسىنىڭ ءتوراعاسى كەشە ماسكەۋدە وتكەن رەسەي مەن تۇركيا كوشباسشىلارىنىڭ سيريا ماسەلەسى بويىنشا كەلىسسوزدەرىنىڭ قورىتىندىسىن قولدايتىنىن ايتتى.

ەلباسى مۇددەلى تاراپتاردىڭ سيرياداعى جاعدايدى تۇراقتاندىرۋ ءۇشىن استانا پروتسەسىنىڭ جالعاسۋىنا بەيىلدىلىگى ايرىقشا ماڭىزدى ەكەنىن اتاپ ءوتتى.

كەزدەسۋ سوڭىندا نۇرسۇلتان نازاربايەۆ پەن دميتري مەدۆەديەۆ قازاقستان رەسپۋبليكاسى تۇڭعىش پرەزيدەنتى كىتاپحاناسى كورمەسىنىڭ ەكسپوزيسيالارىمەن تانىستى.