تەرگەۋشى قىز: ەڭ العاشقى كەزەكشىلىگىمدە انام مۇلدە ۇيىقتامادى

بالا كۇنىنەن فورما كيگەن اكەسىن كورىپ وسكەن بۇرىمدىنىڭ ەس بىلگەلى ماقساتى - ءتارتىپ ساقشىسى اتانۋ ەدى. بۇگىندە سول مۇراتىنا جەتكەن پوليتسەي ۇنەمى قىراعىلىق تانىتىپ، قىلمىستىق ىستەردى جەدەل اشۋدا. قازاقپارات ءتىلشىسى بولاشاعىنان زور ءۇمىت كۇتتىرەتىن جاس تەرگەۋشىمەن سۇحباتتاسىپ قايتقان بولاتىن.

- اڭگىمەمىزدىڭ ءالقيسساسىن وسى سالاعا قالاي كەلگەنىڭىزدەن باستاساق.

- 1997 -جىلى 2- جەلتوقسان كۇنى سەمەي قالاسىندا دۇنيە ەسىگىن اشتىم. وتباسىندا جالعىز بالامىن. №32 ورتا مەكتەپتە ءبىلىم نارىمەن سۋسىندادىم. اكەم ۇزاق جىلدار قۇقىق قورعاۋ ورگاندارىندا قىزمەت ەتكەن. بالا كۇنىمنەن فورما كيگەن اكەمدى كورىپ ءوستىم. ونىڭ ارالاس- قۇرالاس بولىپ جۇرگەن دوستارى تۇگەل دەرلىك ءتارتىپ ساقشىلارى ەدى. ءتىپتى، اكەمنىڭ تەلەديداردان كورەتىن تەلەحيكايالارى دا پوليتسەيلەر تۋرالى- تۇعىن.

ءسويتىپ، مەنىڭ «وسكەندە كىم بولاسىڭ؟» دەپ سۇراعاندارعا جاۋابىم ءارقاشاندا بىرەۋ بولدى. باسقا سالاعا بارامىن دەپ ەش ويلاعان ەمەسپىن. دەسە دە اكەم «پوليتسيا قىزمەتكەرى ەمەس دارىگەر بولساڭشى. اۋىرعان جانداردى ەمدەيسىڭ» دەپ رايىمنان قايتارعىسى كەلدى. الايدا، بۇعان كونبەدىم. وسىلايشا، 2014 -جىلى بارىمبەك بەيسەنوۆ اتىنداعى قاراعاندى اكادەمياسىنا وقۋعا ءتۇستىم. 2018 -جىلى ونى ۇزدىك ءبىتىرىپ، سەمەي قالاسىنداعى اۋەزوۆ بولىمىنە تەرگەۋشى بولىپ جۇمىسقا ورنالاستىم.

باسىندا وڭاي بولعان جوق. جۇگى اۋىر، جاۋاپكەرشىلىگى زور سالانىڭ قيىنى دا قىزىعى دا مول. بىردەن قىلمىستىق ىستەردى تەرگەۋگە كىرىسىپ كەتتىك. ەڭ ءبىرىنشى سوتقا تاپسىرعان ءىسىم - كوپقاباتتى تۇرعىن ۇيدەگى ۇرلىق فاكتىسى. وقيعا ورنىنان ۇرىنىڭ ساۋساق ىزدەرىن الىپ، داكتيلوسكوپيالىق ساراپتاما جاسادىق. ءسويتىپ ونىڭ كىم ەكەنىن انىقتاپ، تەرگەۋ امالدارىن جۇرگىزدىم. جەدەلدەتىلگەن تۇردە، ياعني 4 كۇننەن كەيىن ءىستى جاپتىم.

- قىزمەت بارىسىندا تاعى قانداي قىلمىستىق ىستەردى تەرگەدىڭىز؟

- اي سايىن 4-5 قىلمىستىق ءىستى سوتقا جىبەرەمىن. كوبىنەسە ۇرلىق جاساعانداردى انىقتايمىز. ءبىراق بىردە ەكى باپپەن، ناقتى ايتساق، ق ر ق ك- ءنىڭ 200-بابى 1-بولىگىمەن (كولىكتى ايداپ كەتۋ) جانە 188-بابى 1-بولىگىمەن (ۇرلىق) قىلمىستىق ءىس قوزعادىم. سول ءىستىڭ ەگجەي- تەگجەيىن بايانداپ بەرەيىن: بۇرىن سوتتى بولعان ەر ادام شارۋا قوجالىعىنا جۇمىسقا تۇرادى. ءبىراق ءبىر كۇن وتكەننەن كەيىن قوجالىق يەسىنە تيەسىلى «Land Cruiser Prado 150» ماركالى كولىكتىڭ رۋلىنە رۇقساتسىز وتىرىپ، ايداپ كەتكەن. جولدا ەكى رەت اۋدارىلادى. كەيىن ماشينانى اياگوز اۋدانىندا قالدىرىپ، كولىك ىشىندەگى ءامياندى الىپ كەتەدى. جابىرلەنۋشى ارىز جازعاننان سوڭ، كوپ ۇزاماي كۇدىكتىنى قولعا تۇسىردىك. تەرگەۋ بارىسىندا ەر ادام ءوز كىناسىن مويىندادى. وسىلايشا، ءىس سوتقا جەتكىزىلدى.

- ءوز سوزىڭىزدە جۇمىسقا تۇرعاندا باسىندا وڭاي بولماعانىن ايتىپ قالدىڭىز. سوندا ناقتى قانداي قيىنشىلىقتارمەن كەزدەستىڭىز؟

- اۋەلدە ماعان قىلمىستىق ىستەردى بەرگەندە ءسال- ءپال قورقىنىش بولدى. «قالاي بولادى ەكەن؟» دەپ ۋايىمداسام دا سىرتقا بىلدىرمەۋگە تىرىستىم. پوليتسياعا سان ءتۇرلى ماسەلەلەرىمەن كەلەتىن جاندارمەن سويلەسكەندە بارىنشا دۇرىس جول نۇسقاۋعا ۇمتىلدىق. مىنە وسى كەزدە وقۋ بارىسىندا ساناعا تۇيگەنىم، زاڭدى بۇگە- شۇگەسىنە دەيىن بىلەتىنىم كوپ سەپتىگىن تيگىزدى. ودان كەيىن تۇنگى كەزەكشىلىككە تۇسەمىز. ەڭ العاشقى اۋىسىمعا شىققانىمدا انام ءتۇنى بويى ۇيىقتاماي شىقتى. ءسات سايىن حابارلاسىپ، «قىزىم ءبارى جاقسى ما؟ « دەپ سۇراپ وتىردى. ۋاقىت وتە كەلە ۇيرەنە باستادى.

كەيدە قىلمىس ورنىنا بارعان كەزدە ادام مايىتتەرىن كورەمىز. قىز بالا بولعاننان كەيىن ارينە، وڭاي تيمەدى. الايدا، مەنىڭ ومىرلىك ۇستانىمىم - «العا ماقسات قويدىڭ ەكەن، مىندەتتى تۇردە سوعان جەتۋ». تەرگەۋشىگە جەدەل شەشىم قابىلداي ءبىلۋ شارت. كۇدىكتىلەرمەن، كۋاگەرلەرمەن، جابىرلەنۋشىلەرمەن سويلەسكەندە پسيحولوگ بولىپ كەتەمىز. شىندىقتى ءبىلۋ ءۇشىن ادامنىڭ ىشكى سىرىنا ءۇڭىلۋ كەرەك.

- اكەڭىز سىزگە قانداي اقىل- كەڭەستەرىن ايتادى؟

- تاجىريبەسى مول اكەم ماعان جول سىلتەپ، كورگەن- بىلگەنىن ايتىپ وتىرادى. ءبىراق تا ول كەڭەس داۋىرىندە جۇمىس ىستەگەن. ال قازىرگى جۇيە مۇلدە باسقا. بۇرىندارى قۇقىق قورعاۋشىلار كومپيۋتەر ەمەس، جازبا ماشيناسىن پايدالانعان. سول زاماندا سوتقا دەيىنگى تەرگەۋدىڭ ءبىرىڭعاي ءتىزىلىمى سياقتى بازا دا بولمادى. ودان كەيىن اكەمە جۇمىستا بولىپ جاتقان وقيعالاردى ايتا بەرمەيمىن. سەبەبى ەرتەڭ سارى ۋايىمعا سالىنادى.

- بوس ۋاقىتىڭىزدى قالاي وتكىزەسىز؟

- ءبىزدىڭ بوس ۋاقىتىمىز از عوي (كۇلدى). ءبىراق قولىمىز قالت ەتكەندە تازا اۋادا سەرۋەندەگەندى، سپورتپەن شۇعىلدانعاندى، كينوعا بارعاندى ۇناتامىن. ۆولەيبول ويناپ، سۋدا جۇزەمىن. ءۇي- جۇمىستارىمەن اينالىسىپ، قۇربىلارىممەن كەزدەسەمىن. ودان كەيىن تورت پىسىرگەندى جاقسى كورەمىن.

- كەيدە وسى سالاعا بەت بۇرعانىڭىزعا وكىنبەيسىز بە؟

- ەش ۋاقىتتا وكىنىپ كورگەن ەمەسپىن. كەرىسىنشە، قىلمىس جاساعان ادام انىقتالىپ، ءىستى جاپقان كەزدە اعا- اپكەلەر كەلىپ باتالارىن بەرىپ، رياسىز ريزاشىلىقتارىن ءبىلدىرىپ جاتقاندا وسى سالانى تاڭداعانىما قۋانامىن. ارينە، كەز كەلگەن ماماندىقتىڭ ءوز اۋىرتپالىقتارى بولادى. پوليتسەي جۇمىسىنىڭ جۇگىن ارقالاي الماي شىعىپ قالىپ جاتقاندار دا بار. ءبىراق اركەز شىدامدىلىق تانىتىپ، ەڭبەكتىڭ جالاۋىن جىقپاعان ءجون. قانداي قيىندىقتار كەزدەسسە دە العان باعىتتان تايماي، قويعان ماقساتقا جەتۋ كەرەك دەپ ەسەپتەيمىن.

- سۇحباتىڭىزعا راحمەت!

اۆتور تالعاتجان مۇحامەتبەك ۇلى