قازاقستاندا وقۋشىلاردىڭ مەكتەپتە سمارتفون پايدالانۋىنا تىيىم سالىنباق

نۇر- سۇلتان. قازاقپارات - ەلىمىزدە مەكتەپتە وقۋ كەزىندە سمارتفونداردى، پلانشەتتەردى پايدالانۋعا تىيىم سالۋ ەنگىزىلۋى مۇمكىن.

بۇل جايىندا ق ر پرەمەر-ءمينيسترى اسقار ماميننىڭ سەنات دەپۋتاتىنىڭ ساۋالىنا بەرگەن جاۋابىندا ايتىلعان، دەپ حابارلايدى قازاقپارات ءتىلشىسى.

«ءبىلىم بەرۋ ۇيىمدارىندا ءتۇرلى گادجەتتەردى (سمارتفونداردى، پلانشەتتەردى جانە ت. ب.) پايدالانۋعا تىيىم سالۋدى ەنگىزۋ مۇمكىندىگى تۋرالى ماسەلەنى پىسىقتاۋ بۇگىنگى كۇنى وسىنداي شارالاردى ىسكە اسىرۋ ءۇشىن قۇقىقتىق جاعدايلار ءىس جۇزىندە بار ەكەنىن (8 وڭىردە كادىمگى كنوپكالى تەلەفوندار پايدالانىلادى) كورسەتتى. سونىمەن قاتار، ءبىلىم بەرۋ سالاسىنداعى قولدانىستاعى زاڭناما بويىنشا ءبىلىم الۋشىلار مەن ولاردىڭ اتا-انالارىنىڭ سمارتفونداردى پايدالانۋىنا تىيىم سالۋدى جالپى ءبىلىم بەرەتىن مەكتەپتەردە وقۋ ورنىنىڭ ىشكى ءتارتىبىن رەتتەيتىن نورماتيۆتىك قۇقىقتىق اكتىلەر، ءبىلىم بەرۋ ۇيىمىنىڭ ىشكى ءتارتىپ ەرەجەلەرى جانە ءبىلىم بەرۋ قىزمەتىن كورسەتۋ شارتتارى اياسىندا رەتتەۋ جوسپارلانۋدا»، - دەپ اتاپ وتەدى اسقار مامين.

ايتا كەتەيىك، ءماجىلىس دەپۋتاتتارى ۇكىمەت باسشىسىنىڭ اتىنا جولداعان ساۋالدارىندا ۇلتتىق اقپاراتتىق كەڭىستىكتىڭ ۇيلەسىمدى دامۋىن قامتاماسىز ەتۋ جانە اقپاراتتىق ورتادا بالالاردىڭ قۇقىقتارىن قورعاۋ جونىندەگى شارالار كەشەنىن ىسكە اسىرۋ جونىندە ماسەلە كوتەرگەن بولاتىن.