كوروناۆيرۋس وڭتۇستىك افريكادا دا تىركەلدى

جاڭا ۆيرۋس جۇبايىمەن بىرگە يتالياعا بارىپ كەلگەن 38 جاستاعى ازاماتتان انىقتالدى.

وسىلايشا، افريكا قۇرلىعىندا كوروناۆيرۋس جۇقتىرعاندار سانى 27 ادامعا جەتتى. اۋرۋ جۇقتىرعانداردىڭ باسىم بولىگى الجيردە - 17 ادام، ودان كەيىن سەنەگالدا - 4 ادام.

وڭتۇستىك افريكا ەلىنىڭ دەنساۋلىق ساقتاۋ ءمينيسترى تسۆەلي محيزەنىڭ سوزىنشە، ەكى بالاسى بار وڭتۇستىكافريكالىق جۇپ 1- ناۋرىز كۇنى يتاليادان ورالعان 10 ادامنان تۇراتىن توپتىڭ مۇشەسى بولعان. قازىرگى تاڭدا ۆيرۋس جۇقتىرعان ادام مەن ونى قاراعان دارىگەر وقشاۋلاندىرىلدى، دەدى مينيستر.

ونىڭ سوزىنشە، ۆيرۋس جۇقتىرعان دارىگەرمەن بايلانىستى بولعان ادامداردى انىقتاۋ ءۇشىن ەلدىڭ شىعىس بولىگىندەگى پروۆينتسيا كۆازۋلۋ-ناتالعا ارنايى توپ جونەلتىلدى.

قازىرگى تاڭدا الەم بويىنشا ايتۆ ىندەتىنىڭ ورتالىعى سانالاتىن وڭتۇستىك افريكادا ميلليونداعان ادامداردىڭ يممۋندىق جۇيەسى السىرەگەن. بۇل جاعداي ولاردىڭ جاڭا ۆيرۋسقا قارسى تۇرۋىنا كەرى اسەرىن تيگىزەرى انىق. افريكادا قازىر وسىنداي الاڭداۋشىلىق بار.

BBC News سونىمەن قاتار جاپونيادا كوروناۆيرۋس جۇقتىرىپ، اۋرۋحاناعا جاتقىزىلعان ەكى وڭتۇستىك افريكالىق ازاماتتىڭ ساۋىعىپ، جاقىندا ۇيلەرىنە قايتاتىنىن حابارلادى. ولار وزدەرى جۇمىس ىستەيتىن Diamond Princess كرۋيزدىك لاينەرىنەن تۇسكەننەن كەيىن باقىلاۋعا الىنعان.

ايتا كەتەيىك، اتالمىش كەمەنىڭ بورتىنداعى ادامدار گونكونگتەن ءتۇسىپ قالعان جولاۋشىلاردىڭ بىرىنەن كوروناۆيرۋس انىقتالعان سوڭ عانا، ياعني العاش رەت قاڭتار ايىنان باستاپ كارانتينگە جاتقىزىلا باستادى.

وڭتۇستىك افريكا ۇكىمەتى قىتايدىڭ ۋحان قالاسىنان وزدەرىنىڭ ازاماتتارىن قايتارىپ العىلارى كەلەتىنىن مالىمدەگەن بولاتىن.

«قىتايدان بارلىعى 185 وڭتۇستىك افريكالىق ازامات ەلگە قايتۋعا نيەت بىلدىرىپ وتىر»، - دەلىنگەن ۇكىمەتتىڭ مالىمدەمەسىندە.