قىرعىزستان ازاماتتارىنا شەتەلدىك ءتولقۇجاتسىز ەلگە كىرۋگە تىيىم سالىندى

ولار وسىلايشا، ەل تۇرعىندارىنىڭ كوروناۆيرۋس تىركەلگەن ەلدەرگە بارعان- بارماعانىن انىقتاعىسى كەلەدى. مينيسترلەر كابينەتى وكىلدەرىنىڭ مالىمدەۋىنشە، بۇل شەكتەۋ ۋاقىتشا قابىلدانعان. قىرعىزستان ازاماتتارىنا قازاقستان، بەلارۋس جانە رەسەيگە شەتەلدىك ءتولقۇجاتسىز، ID- كارتالارىمەن قاتىناۋىنا بولادى. الايدا، ودان ءارى وزگە ەلدەرگە بارسا، بۇل ساپارى كارتالارىندا تىركەلمەيدى.

ازيا جانە ەۋروپا ەلدەرىندە ۆيرۋس تەز تارالا باستاعاننان كەيىن قىرعىزستان ۇكىمەتى ەلگە ورالاتىن تۇرعىندارىنىڭ باقىلاۋىن كۇشەيتۋدى ۇيعاردى. ويتكەنى ەكى اپتالىق كارانتيننەن قۇتىلۋ ءۇشىن ۆيرۋس ءورشىپ تۇرعان ەلدەردە بولعانىن جاسىرۋى مۇمكىن.

چىنگىز ەسەنگۋلوۆ، ۇكىمەتتى اقپاراتپەن قامتاماسىز ەتۋ ءبولىمىنىڭ مەڭگەرۋشىسى:

- شەتەلدىك ءتولقۇجاتىنىڭ بار- جوقتىعى مەملەكەتتىك تىركەۋ جۇيەسىنىڭ ەلەكتروندى بازاسىندا تەكسەرىلەدى. بار بولسا، ازاماتتارىمىز قوسىمشا تەكسەرۋدەن وتۋگە ءتيىس. رەسەيدەن كەلگەن تۇرعىندارىمىز وعان دەيىن ىندەت تاراعان ەلدەردە بولعانىن جاسىرعان جاعدايلار انىقتالدى. سول سەبەپتەن شەكارانى ID- كارتامەن وتۋگە ۋاقىتشى تىيىم سالىندى.

ۇكىمەت قابىلداعان شارالار ءوز جەمىسىن بەرىپ، ەل اۋماعىندا COVID-19 ۆيرۋسى انىقتالعان جوق. قىرعىزستان ازاماتىنىڭ بۇل دەرتتى جۇقتىرۋى تەك جاپونياداعى Diamond Princess ساياحات كەمەسىندە تىركەلگەن. دەنساۋلىق ساقتاۋ مينيسترلىگىنىڭ مالىمەتىنشە، ونىڭ يممۋنيتەتى كۇشتى بولىپ، ول تولىق جازىلىپ، اۋرۋحانادان شىقتى. كوروناۆيرۋسقا بايلانىستى جاعدايدى تاۋلىك بويى ىستەيتىن ارنايى ۇكىمەتتىك شتاب قاداعالاپ وتىر.

مۋحاممەدكالىي ابىلگازيەۆ، قىرعىزستان پرەمەر- ءمينيسترى:

- ءبىز ارنايى كارانتين ورىندارىن اشىپ، اۋە مەن اۆتوكولىك قاتىناسىن باقىلاۋعا الدىق. وسى جۇمىسىمىزدى جالعاستىرىپ، بۇل جاعداي ەكونوميكامىزعا زيان كەلتىرمەۋىن مۇقيات اڭدۋعا ءتيىسپىز.

ەكونوميكانى ايتقاندا، پرەمەر- مينيستر قىتايمەن ساۋدانىڭ شەكتەلۋىن قاراستىرعان. جالپى ەلدىڭ ساۋدا اينالىمىنىڭ بەستەن ءبىر بولىگى وسى ەلدىڭ ۇلەسىنە ءتيىپ تۇر. بۇل تۇرعىدا ۇكىمەت باسشىسى قىتاي تاۋارلارىنىڭ قاي تۇرلەرىن وزگە ەلدەردەن اكەلۋگە بولاتىنىن ءبىلۋدى تاپسىردى.

www.24.kz