قوردايدا ورتەنگەن عيماراتتان تابىلعان ءمايىتتىڭ كىم ەكەنى انىقتالدى

بۇل تۋرالى وبلىستىق پوليسيا دەپارتامەنتىنىڭ باسپا ءسوز قىزمەتى حابارلادى.

«اعىمداعى جىلدىڭ 11 -اقپانىندا ماسانچي اۋىلىنداعى ورتەنگەن ساۋدا عيماراتىنان تابىلعان ادام سۇيەكتەرىنە قاتىستى جۇرگىزىلگەن گەنەتيكالىق ساراپتاما ناتيجەلەرى بويىنشا كوز جۇمعان ادامنىڭ جەكە باسى انىقتالدى. ول حابار- وشارسىز كەتكەن 20 جاستاعى مۇرات ماسانوۆ بولىپ شىقتى. ونىڭ جوعالعانى تۋرالى پوليسياعا 9 - اقپان كۇنى اكەسى حابارلاعان»، - دەلىنگەن ۆەدومستۆو مالىمدەمەسىندە.

سونداي- اق، ادام ءولىمىنىڭ ءمان- جايى بۇگىنگى تاڭدا جۇرگىزىلىپ جاتقان سوتقا دەيىنگى تەرگەپ- تەكسەرۋ بارىسىندا انىقتالماق.

ەسكە سالا كەتسەك، بيىل 7 - اقپاندا قورداي اۋدانىنداعى ماسانچي اۋىلىندا جاپپاي توبەلەس بولعان. ال 8 - اقپاندا مەملەكەت باسشىسى جامبىل وبلىسىنداعى وقيعاعا بايلانىستى مالىمدەمە جاسادى. مەملەكەت باسشىسىنىڭ تاپسىرماسىمەن قورداي اۋدانىنداعى وقيعا سالدارىن جويۋ جونىندەگى ۇكىمەت كوميسسياسى قۇرىلدى.