ەلىمىزدە باتىر بايان اتىنداعى شەكارا زاستاۆاسى بولادى
بۇل جايىندا ق ر پرەمەر- ءمينيسترى اسقار ءماميننىڭ ءماجىلىس دەپۋتاتىنىڭ ساۋالىنا بەرگەن جاۋابىندا ايتىلعان، دەپ حابارلايدى قازاقپارات ءتىلشىسى.
«سولتۇستىك قازاقستان وبلىسى م. جۇمابايەۆ اۋدانىندا ورنالاسقان «قاراقوعا» شەكارا زاستاۆاسىنىڭ اتاۋىن «باتىر بايان اتىنداعى شەكارا زاستاۆاسى» دەپ قايتا اتاۋ تۋرالى دەپۋتاتتىق ساۋالىڭىز ءتيىستى مەملەكەتتىك ورگاندارمەن جان- جاقتى پىسىقتالىپ، مىنانى حابارلايمىز. قازاقستان رەسپۋبليكاسىنىڭ ۇلتتىق قاۋىپسىزدىك كوميتەتى، ونوماستيكا سالاسىنداعى ۋاكىلەتتى مەملەكەتتىك ورگان مەن سولتۇستىك قازاقستان وبلىسىنىڭ اكىمدىگى ءسىزدىڭ ۇسىنىسىڭىزدى قولدايتىنىن ءبىلدىردى» ، - دەدى ۇكىمەت باسشىسى.
پرەمەر- ءمينيستردىڭ اتاپ وتۋىنشە، وسى ۇسىنىستى جۇزەگە اسىرۋ ماقساتىندا الداعى ۋاقىتتا ءتيىستى قۇجاتتار ازىرلەنىپ، قر پرەزيدەنتى اكىمشىلىگىنە جانە قر ۇكىمەتىنىڭ جانىنداعى رەسپۋبليكالىق ونوماستيكا كوميسسياسىنىڭ قاراۋىنا ۇسىنىلادى.
«اتالعان ماسەلە بويىنشا وڭ قورىتىندى الىنعان جاعدايدا، قازاقستان رەسپۋبليكاسى ۇكىمەتىنىڭ ءتيىستى شەشىمى قابىلداناتىن بولادى. سونىمەن قاتار، ەل تاريحىندا وزىندىك ورنى بار تاريحي تۇلعالارىمىزدىڭ ءبىرى باتىر باياننىڭ ەسىمىن ماڭگى ەستە قالدىرۋ ماقساتىندا، رەسپۋبليكا بويىنشا ءبىرقاتار شارالار جۇزەگە اسىرىلعان. ماسەلەن، اقمولا، قاراعاندى، سولتۇستىك قازاقستان وبلىستارىندا، نۇر- سۇلتان جانە الماتى قالالارىندا باتىرىمىزدىڭ ەسىمى بەرىلگەن كوشەلەردىڭ بار ەكەنىن قوسىمشا اتاپ وتەمىز» ، - دەدى اسقار مامين.
