ءماجىلىس كوپ بالالى وتباسىلارعا جاردەماقىنى كوتەرۋگە نەگىزدەلگەن زاڭ جوباسىن ماقۇلدادى

«زاڭ جوباسىنا پارلامەنت دەپۋتاتتارى باستاماشىلىق ەتتى. اتالعان قۇجات بالالاردىڭ قۇقىقتارى مەن زاڭدى مۇددەلەرىن قورعاۋدى قامتاماسىز ەتۋ جانە كوپبالالى وتباسىلارعا قولداۋ كورسەتۋ ماقساتىندا ازىرلەندى. وزدەرىڭىزگە ءمالىم، 2020 -جىلعى 1 - قاڭتاردان باستاپ كامىلەتكە تولماعان 4 جانە ودان كوپ بالالارى بار وتباسىلار ءۇشىن جاڭا جاردەماقى ەنگىزىلدى. ول وتباسىنىڭ كىرىسىنە قاراماستان 42496 تەڭگەدەن باستاپ 74388 تەڭگەگە دەيىنگى سومادا تاعايىندالادى. كوپبالالى وتباسىنداعى بالالاردىڭ جاردەماقى الۋ قۇقىقتارىنا نۇقسان كەلتىرۋدى بولعىزباۋ ماقساتىندا زاڭ جوباسىندا 8 جانە ودان كوپ بالالارعا ارنالعان جاردەماقىنىڭ مولشەرىن ءتورت ايلىق ەسەپتىك كورسەتكىشتەن، ءاربىر كەيىنگى بالاعا 10 مىڭ تەڭگەدەن استام بەلگىلەۋ ۇسىنىلىپ وتىر»، - دەدى زاڭ جوباسى بويىنشا بايانداما جاساعان ءماجىلىس دەپۋتاتى ايگۇل نۇركينا.

وسىلايشا، سەگىز بالاسى بار وتباسىلارعا بەرىلەتىن جاردەماقى مولشەرى 84832 تەڭگەنى، توعىز بالاعا - 95436 تەڭگەنى، ون بالاعا - 106 مىڭ تەڭگەنى، سونداي- اق ودان كەيىنگى ءار بالاعا ءتورت ايلىق ەسەپتىك كورسەتكىشتى قۇرايدى.

بۇگىندە ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتىنا قاراعاندا، ەلىمىزدە 8-15 بالاسى بار 2451 وتباسى تىركەلگەن.

بۇدان بۇرىن حابارلانعانداي، بيىل قاڭتار ايىنىڭ سوڭىندا ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ بالا سانى جەتىدەن اساتىن وتباسىلارعا جاردەماقى سوماسى ارتاتىنىن ايتقان ەدى.

اۆتور: رۋسلان عابباسوۆ