تۋريزم «تاقتار ويىنى» سەريالى تۇسىرىلگەن ەلدەردە دامي باستادى - گۇلنار سارسەنوۆا

بۇل تۋرالى «ۇلتتىق كينونى قولداۋ ورتالىعى» كوممەرتسيالىق ەمەس اكسيونەرلىك قوعامىنىڭ قىزمەتى تۋرالى باسپا ءسوز ءماسليحاتىندا ايتىلدى، دەپ حابارلايدى قازاقپارات ءتىلشىسى.

«ۇلتتىق كينونى قولداۋ مەملەكەتتىك ورتالىعى» نۇر- سۇلتان قالاسىندا بىلتىر مامىر ايىنان جۇمىس ىستەي باستاسا، قىركۇيەك ايىندا الماتىدا فيليالى اشىلدى. كينەماتوگرافيا تۋرالى زاڭ جوباسى قابىلدانعانى - ەلىمىزدەگى كينو سالاسىن دامىتۋداعى ۇلكەن قادام بولدى»، - دەيدى «ۇلتتىق كينونى قولداۋ مەملەكەتتىك ورتالىعىنىڭ» باسقارما ءتوراعاسى گۇلنار سارسەنوۆا.

ول اتالعان ورتالىق بەس باعىتتاعى ماسەلەنى شەشۋمەن اينالىساتىنىن ايتتى.

«ءبىرىنشى ماسەلە، فيلمدەردى قارجىلاندىرۋ. مۇنىڭ ىشىنە كوركەم فيلمدەر عانا ەمەس، دەرەكتى فيلم، انيماتسيالىق فيلم، وزگە مەملەكەت تۇسىرەتىن فيلمدەر دە كىرەدى. ەكىنشى ماسەلە، ينۆەستيتسيا تارتىپ، ۇلتتىق كينو كوميسسياسىن قۇرۋ. ءبىز وزگە مەملەكەتتەردىڭ ەلىمىزدە فيلم ءتۇسىرۋىن قولدايمىز جانە كومەكتەسۋگە دايىنبىز. مىسالى، «تاقتار ويىنى« تەلەحيكاياسى يسلانديا، جاڭا زەلانديا، ماروككو سياقتى تانىمال ەمەس مەملەكەتتەردە تۇسىرىلگەن. كينوجوبا ءتۇسىرىلىپ، كورسەتىلە باستاعان سوڭ بۇل مەملەكەتتەردە تۋريزم سالاسى 300-800 ەسەگە وسكەن. دەمەك بۇل ەلدىڭ ەكونوميكاسىنا ۇلەس قوسۋ عانا ەمەس، كينو جانە تۋريزم سالاسىن دامىتۋعا دا ۇلەس قوسۋ دەسە بولادى»، - دەيدى ول.

اۆتور: زارينا قاھارمان