جاڭاوزەندە كوروناۆيرۋس تۋرالى جالعان حابار تاراتقان مەدبيكە جۇمىستان كەتەدى
بۇگىن جاڭاوزەن اۋرۋحاناسىندا كوروناۆيرۋس جۇقتىرعان ادام بار دەگەن حابار WhatsApp ارقىلى تەز تاراپ كەتتى. ماڭعىستاۋ وبلىستىق دەنساۋلىق ساقتاۋ باسقارماسى بۇل اقپاراتتى جوققا شىعارىپ، جاڭاوزەندە كوروناۆيرۋس ينفەكتسياسىن جۇقتىرۋ وقيعاسى تىركەلمەگەنىن جەتكىزدى.
كەيىننەن جالعان حاباردى تاراتقان ايەلدىڭ كىم ەكەنى انىقتالدى. ول - قالالىق اۋرۋحانانىڭ مەدبيكەسى ارۋحان شىراقبايەۆا بولىپ شىقتى.
ول بۇل ارەكەتىن تۋىستارىنا ارنالعان قالجىڭ دەپ ءتۇسىندىردى. ارۋحان شىراقبايەۆا مەسسەنجەردەگى حابارلاماسىندا وڭتۇستىك كورەيا استاناسى سەۋلدەن كەلگەن ستۋدەنت قىز كوروناۆيرۋس كۇدىگىمەن اۋرۋحانادا جاتقانىن ايتقان. ءبىراق ول اۋديوحابارلامانى وسىنشاما تەز جانە جان-جاققا تاراپ كەتەدى دەپ ويلاماعان.
ول جاڭاوزەن تۇرعىندارىنا ارناپ ۆيدەو ءتۇسىرىپ، كەشىرىم سۇرادى.
«حابارلامادا ايتىلعان مالىمەت شىندىققا جاناسپايدى. مەن جاڭاوزەن تۇرعىندارىنان كەشىرىم سۇرايمىن»، - دەيدى ارۋحان شىراقبايەۆا.
ماڭعىستاۋ وبلىستىق دەنساۋلىق ساقتاۋ باسقارماسىنىڭ مالىمەتىنشە، اتالعان مەدبيكە ءوز ەركىمەن جۇمىستان شىعۋ جونىندە ءوتىنىش جازعان.
