كوروناۆيرۋس الەمدەگى كولىك سالاسىنا جانە تۋريزمگە كەرى اسەرىن تيگىزۋدە

وتكەن اپتادا ىسكەرلىك ساياحات جاھاندىق قاۋىمداستىعى كوروناۆيرۋستىڭ «بيزنەس ساپارلاردىڭ بۇكىل الەمدىك يندۋسترياسىنا قاۋىپ ءتوندىرىپ وتىرعانىن»، بۇل سەكتور ايىنا 46,6 ميلليارد دوللار شىعىنعا ۇشىرايتىنىن بولجاعان. ەگەر جاعداي تۇزەلمەسە، شىعىندار 2020-جىلعا جالپى بولجانعان شىعىنداردىڭ 37 پايىزىن قۇراۋى مۇمكىن.

ىسكەرلىك تۋريزممەن اينالىساتىن 400 كومپانيادان سۇراۋ جۇرگىزۋ بارىسىندا فيرمالاردىڭ شامامەن ۇشتەن ەكى بولىگى كەم دەگەندە بىرنەشە كەزدەسۋ نەمەسە شارالاردى وتكىزبەي قويعانى انىقتالدى، ال 55 ءى ءوز تابىستارىنىڭ ايتارلىقتاي ازايعانى تۋرالى حابارلاعان.

كومپانيالار تەك قىتاي ەلىنە ەمەس، سونىمەن قاتار جاپونيا، وڭتۇستىك كورەيا، ءتىپتى ەۋروپاعا ساپارلاۋدى توقتاتتى. Amazon, Google جانە Apple سياقتى ءىرى كومپانيالار ساپارلاۋعا شەكتەۋ قويعانىن جاريالاپ، ازياداعى كەيبىر كەڭسەلەرىن جاۋىپ تاستادى.

ءوز كەزەگىندە، حالىقارالىق اۋە كولىگى قاۋىمداستىعى (IATA) اۋە كومپانيالارىنىڭ شىعىندارى ازيا-تىنىق مۇحيتى ايماعىندا جولاۋشىلار سانىنىڭ ازايۋى سالدارىنان 29 ميلليارد دوللاردى قۇرايتىنىن بولجاپ وتىر.

ۆيرۋستىڭ تارالۋى تەڭىزدەگى جولاۋشىلار تاسىمالىنا دا اسەرىن تيگىزگەن. سوڭعى اپتالاردا كريۋيزدىك لاينەرلەردە اۋرۋ تاراپ جاتقانى، ونداعى كارانتيندەر تۋرالى كوپ اقپارات تاراتىلدى.

حالىقارالىق كرۋيزدىك جەلىلەر قاۋىمداستىعى كرۋيزدىك لاينەرلەرگە يە كومپانيالاردىڭ قىتاي نەمەسە وڭتۇستىك كورەيادا بولعان، نەمەسە ۆيرۋستى جۇقتىرعاندارمەن بايلانىستا بولعان ادامداردى ءوز كەمەلەرىنە وتىرعىزباۋى ءتيىس ەكەنىن حابارلادى.

COVID-19 ۆيرۋسى كولىك يەلەرىنە دە كەرى اسەرىن تيگىزگەن. S&P Global Ratings رەيتينگ جۇرگىزۋ اگەنتتىگى كولىكتەردىڭ الەمدىك ساتىلۋى 3,6 پايىزعا تۇسەتىنىن بولجاعان. بۇعان نەگىزىنەن قىتاي ەلىندە كولىكتەرگە سۇرانىستىڭ 5 پايىزعا تومەندەيتىنى تۋرالى بولجام سەبەپ بولىپ وتىر.