قوردايدا حالىققا جۇمىس تاۋىپ بەرەتىن ورتالىق اشىلدى
جوبانى ۇلتتىق كاسىپكەرلەر پالاتاسى جانە ق ر ەڭبەك جانە حالىقتى الەۋمەتتىك قورعاۋ مينيسترلىگى قولداعان، دەپ حابارلايدى قازاقپارات وڭىرلىك كاسىپكەرلەر پالاتاسىنىڭ باسپا ءسوز قىزمەتىنە سىلتەمە جاساپ.
«اتامەكەن» قولداۋ ورتالىعىنىڭ ءدال وسى اۋداننان اشىلۋى تەگىن ەمەس. بۇل تۋرالى «اتامەكەن» ق ر ۇ ك پ باسقارما ءتوراعاسىنىڭ ورىنباسارى ەلدار جۇماعازيەۆ ورتالىقتىڭ اشىلۋ راسىمىندە سويلەگەن سوزىندە ايرىقشا ايتىپ ءوتتى.
«قورداي اۋدانىندا بولعان سوڭعى وقيعالاردان كەيىن وسى ورتالىق حالىق اراسىنداعى الەۋمەتتىك شيەلەنىستى جەڭىلدەتىپ، جۇمىسسىزدىق پەن كاسىپكەرلىك قىزمەتكە جۇمىلدىرۋ ماسەلەلەرىن ايتارلىقتاي شەشۋگە كومەكتەسۋى كەرەك. «اتامەكەن» قولداۋ ورتالىعىنىڭ بىرەگەيلىگى - لوكاتسياسىندا. قورداي اۋدانىندا جۇمىسپەن قامتۋدىڭ ءموبيلدى ورتالىقتارى - مادەنيەت ءۇيى جانە قاراكەمەر اۋىلىندا ورنالاسقان. «اتامەكەن» قولداۋ ورتالىعىنىڭ مىندەتى - حالىققا جاقىن بولۋ، جۇمىسسىز ادامدارمەن بايلانىس ورناتۋ ءارى ولاردى جۇمىسپەن قامتۋ»، - دەدى ەلدار جۇماعازيەۆ.
ال جامبىل وبلىسى وڭىرلىك كاسىپكەرلەر پالاتاسىنىڭ ديرەكتورى ولجاس قارجاۋوۆتىڭ ايتۋىنشا، ورتالىقتا بۇگىنگى تاڭدا قورداي اۋدانىندا جۇرگىزىلگەن ساۋالناما نەگىزىندە بوس جۇمىس ورىندارىنىڭ بازاسى قالىپتاسقان. جۇمىسسىزداردىڭ ءوتىنىشى بويىنشا كەڭەسشىلەر بازا ارقىلى ولارعا جۇمىس ۇسىنادى.
«اتامەكەن» قولداۋ ورتالىعى جۇمىسپەن قامتۋدىڭ ءموبيلدى ورتالىعىن اشپاس بۇرىن قورداي اۋدانىندا ساۋالناما جۇرگىزدى. ونىڭ قورىتىندىسى بويىنشا، جەرگىلىكتى كومپانيالارعا ساتۋشى، باقتاشى، جۇرگىزۋشى، ساتۋ جونىندەگى مەنەدجەر، تىگىنشىلەر، تراكتوريست- مەحانيزاتورلار، جۇمىسشىلار، ساۋىنشىلار، جانارماي قۇيۋ ستانسالارىنىڭ وپەراتورلارى قاجەتتىگى انىقتالدى. ولاردىڭ ورتاشا ايلىق ەڭبەكاقىسى - 42000-90000 تەڭگە ارالىعىندا»، - دەدى ولجاس قارجاۋوۆ.
جوبانىڭ تاعى ءبىر ەرەكشەلىگى - جۇمىس ىستەۋ فورماتىندا. ءار ورتالىقتا 3 مەنەدجەر جانە 1 جەكە قابىلەتتى دامىتۋ كەڭەسشىسى قىزمەت كورسەتەدى. جەكە قابىلەتتى دامىتۋ كەڭەسشىسى اناعۇرلىم لايىقتى ماماندىقتى انىقتاۋ ماقساتىندا تەستىلەۋ وتكىزەدى، قانداي داعدىلاردى دامىتۋ قاجەتتىگىن ايتادى.
وسى رەتتە «اتامەكەن» قولداۋ ورتالىعى كومانداسى ادامداردى قابىلداپ قانا قويماي، سونداي- اق تۇراقتى تۇردە حالىققا جاقىن بولىپ، اۋىلداردى ارالاپ، ءۇي- ۇيگە بارىپ، تۇرعىندارعا جۇمىسپەن قامتۋ شارالارى تۋرالى اقپارات بەرەدى.
