قازاقستان نارىعىندا شەتەلدىك ساپاسىز تاۋارلاردىڭ ۇلەسى ارتۋدا - سۇلتانوۆ
«بۇگىن ءبىز ىشكى نارىقتا شەتەلدىك تاۋارلاردىڭ ارتىپ بارا جاتقانىن كورىپ وتىرمىز. ولار نەگىزىنەن ساپاسى تومەن تاۋارلار. بۇل ءبىزدىڭ ازاماتتارىمىزدىڭ ءومىر ءسۇرۋ ساپاسىنىڭ دەڭگەيىنە دە اسەر ەتەرى ءسوزسىز. بۇگىنگى كۇردەلى پروبلەمالاردىڭ ءبىرى - قابىلدانعان 8800-دەن استام ۇلتتىق ستاندارتتىڭ جارتىسى قاجەتسىز دەگەن ويمەن بيزنەستە قولدانىلمايتىنى. وتاندىق ءونىمنىڭ قاۋىپسىزدىگىن قامتاماسىز ەتەتىن سىناق بازاسى دا جاڭعىرتۋدى قاجەت ەتەدى»، - دەدى مينيستر ۇكىمەت وتىرىسىندا.
باقىت سۇلتانوۆتىڭ ايتۋىنشا، سىرتقى نارىقتاعى وتاندىق تاۋاردىڭ باسەكەگە قابىلەتتىلىگى ەكسپورتتىق قورجىندى ءارتاراپتاندىرۋدىڭ تومەندىگىن كورسەتەدى.
«سونىمەن قاتار تاۋارلار مەن قىزمەتتەر ەكسپورتىن شەتەلدە ىلگەرىلەتۋ بويىنشا قالىپتاسقان ينفراقۇرىلىمنىڭ جوقتىعى مەن قويىلعان كەدەرگىلەر سىرتقى نارىقتارعا قول جەتكىزۋ پروتسەسىن الدەقايدا قيىنداتادى. بۇل رەتتە ءبىز ساۋدانىڭ سىرتقى جانە ىشكى كونتۋرلارىنا ىقپال ەتەتىن ترەندتەردى دە ۇمىتپاۋىمىز كەرەك. ىشكى نارىقتا شەتەلدىك بولشەك ساۋدا جەلىلەرىنىڭ ەكسپانسياسى بايقالۋدا. ولاردىڭ سورەلەرىندە كوبىنەسە ءوز ەلدەرىندە شىعارىلعان ونىمدەر ساتىلىپ جاتىر»، - دەدى ول.
ايتا كەتسەك، بۇگىن ۇكىمەت ساۋدانى دامىتۋدىڭ مەملەكەتتىك باعدارلاماسىنىڭ 2021-2025 -جىلدارعا ارنالعان تۇجىرىمداماسىن بەكىتكەن بولاتىن.
اۆتور ايان بەكەن ۇلى
