ەرالى توعجانوۆ : وڭتۇستىك كورەياداعى وتانداستارىمىزدى قايتۋعا مۇمكىندىك بەرۋىمىز كەرەك

نۇر- سۇلتان. قازاقپارات - پرەمەر- ءمينيستردىڭ ورىنباسارى ەرالى توعجانوۆ قىتاي مەن يران باعىتىنداعى اۋە رەيستەرى توقتاتىلعانىمەن، نەلىكتەن وڭتۇستىك كورەيا باعىتىندا تەك شەكتەلگەنىن ءتۇسىندىرىپ بەردى، دەپ حابارلايدى قازاقپارات ءتىلشىسى.

«البەتتە قىتاي سەكىلدى ەمەس، وڭتۇستىك كورەياعا اۋە رەيستەرى نەلىكتەن تەك شەكتەلگەنى جايلى سۇراقتار قويىلىپ جاتىر. ول جاقتا وسىعان دەيىن ايتىلعانىنداي 35 مىڭعا تارتا قازاقستان ازاماتى ءجۇر. ولارعا وتانىنا ورالۋعا مۇمكىندىك بەرۋىمىز كەرەك. ولار ءۇشىنشى مەملەكەت ارقىلى دا ەلىنە قايتا الادى» ، - دەدى ەرالى توعجانوۆ ۇكىمەتتىڭ باسپا ءسوز ورتالىعىندا تىلشىلەردىڭ سۇراعىنا جاۋاپ بەرە وتىرىپ.

ۇكىمەت باسشىسىنىڭ ورىنباسارىنىڭ ايتۋىنا قاراعاندا، وڭتۇستىك كورەيادا وقيتىن ستۋدەنتتەردىڭ كوبى قازىر كانيكۋلدا - قازاقستاندا ءجۇر.

«كانيكۋلدا جۇرگەن ستۋدەنتتەردىڭ جاعدايى جاقسى. كوبى قازاقستاندا. مىڭعا تارتا ستۋدەنتكە وڭتۇستىك كورەياعا بارماي- اق قويۋعا كەڭەس بەردىك. ءبىلىم جانە عىلىم مينيسترلىگىنە ستۋدەنتتەردىڭ وقۋ مەرزىمىن ۇزارتۋعا قاتىستى سونداعى جوو باسشىلارىمەن كەلىسۋ بويىنشا ناقتى تاپسىرما بەرىلدى» ، - دەدى ول.

ايتا كەتسەك، بۇعان دەيىن ق ر سىرتقى ىستەر ءمينيسترىنىڭ ءبىرىنشى ورىنباسارى شاحرات نۇرىشيەۆ قازاقستان ازاماتتارى كوروناۆيرۋس ينفەكتسياسى ۋشىققان يران مەن وڭتۇستىك كورەيا ەلدەرىنەن ازىرگە ەۆاكۋاتسيالانبايتىنىن حابارلاعان ەدى.