الماتى اۋەجايىندا قىتاي مەن يران جولاۋشىلارىنا ارنالعان جاڭا ترانزيتتىك زال اشىلدى

الماتى. قازاقپارات - الماتىدا قالا اكىمىنىڭ ورىنباسارى ەرجان باباقۇماروۆتىڭ ءتوراعالىق ەتۋىمەن كوروناۆيرۋستىق ينفەكتسيانىڭ تارالۋىنىڭ الدىن الۋ جونىندەگى ايماقتىق شتابتىڭ وتىرىسى ءوتتى، دەپ حابارلايدى قازاقپارات.

جيىندا الماتىنىڭ قازىرگى جاعدايى پىسىقتالىپ، الەم بويىنشا كوروناۆيرۋس ينفەكتسياسىن جۇقتىرۋشىلار سانىنىڭ كۇرت ءوسۋى ەسكەرىلە وتىرىپ قابىلداناتىن سانيتارلىق-كارانتيندىك باقىلاۋدى كۇشەيتۋ تۋرالى شارالار بارىسى ءسوز ەتىلدى.

1- ناۋرىزىنان باستاپ قازاقستاننىڭ باس سانيتارلىق دارىگەرىنىڭ قازاقستانداعى كوروناۆيرۋس ينفەكتسياسىنىڭ الدىن الۋ شارالارىن ودان ءارى «كۇشەيتۋ تۋرالى» قاۋلىسى كۇشىنە ەندى. وسىلايشا وزگە ەلدەردەگى كوروناۆيرۋستىڭ تارالۋ دەڭگەيىن ەسكەرىپ، ەپيدەمياعا قارسى ءىس-شارالاردى جۇرگىزۋدىڭ ءۇش جىكتەمەسى انىقتالدى.

ءبىرىنشى ساناتقا سايكەس ق ح ر، يراندا 14 كۇنگە مەديتسينالىق باقىلاۋ ارقىلى ارنايى بولىنگەن ءۇي-جايلارعا وقشاۋلانادى. ول جەردەن شىعارىلعاننان كەيىن 10 كۇننىڭ ىشىندە باستاپقى مەديتسينالىق-سانيتارلىق كومەك ۇيىمدارىنىڭ باقىلاۋىندا بولماق. ال گونكونگ، ماكاو، تايۆان، وڭتۇستىك كورەيا، جاپونيا، يتاليادا كۇندەلىكتى مەديتسينالىق قىزمەتكەردىڭ باقىلاۋىندا ءارى 10 كۇن بويى ۇيىندە كارانتينگە جابىلادى.

2- سانات - سينگاپۋر، تايلاند، ازەربايجاندا - 14 كۇن بويى مەديتسينا قىزمەتكەرىنىڭ باقىلاۋىندا بولىپ، سودان كەيىن 10 كۇن قوڭىراۋ شالۋ ارقىلى قاداعالاۋعا الىنادى.

3- سانات - گەرمانيا، ا ق ش، ب ا ءا، ۇلى بريتانيا، فرانسيا، باحرەين، كۋۆەيت، يسپانيا، مالايزيا – ق ر شەكاراسىن كەسىپ وتكەن كۇننەن باستاپ 24 كۇن بويى قوڭىراۋ شالۋ ارقىلى مەديتسينا قىزمەتكەرىنىڭ باقىلاۋىنا الىنادى.

بۇگىندە الماتىداعى بارلىق ەمحانالاردا وقشاۋلاعىش، پروۆيزورلىق توسەكتەر دايىن. سۇزگىلەردىڭ جۇمىسى قالىپتى، رەسپيراتورلار مەن ۆيرۋستان قورعايتىن باسقا دا قۇرالدار سانى جەتكىلىكتى. كوروناۆيرۋستىق ينفەكتسياعا كۇدىكتى ادامداردى جەدەل تەكسەرۋ جۇرگىزىلەدى. قوسىمشا توسەك-ورىندار ۇيىمداستىرۋ بويىنشا شارالار قابىلدانۋدا.

«قالانىڭ مەديتسينالىق ۇيىمدارى كوروناۆيرۋستىق ينفەكتسيانىڭ تارالۋىنا جول بەرمەۋ ءۇشىن ءوزىنىڭ فۋنكتسيونالدىق مىندەتتەرىن ورىنداۋعا دايىن. قالانىڭ مەديتسينالىق كادرلارىمەن دايىندىق جۇمىستارى جۇرگىزىلدى. مەديتسينا قىزمەتكەرلەرى كوروناۆيرۋستىق ينفەكتسيانىڭ تارالۋىنا جول بەرمەۋ ءۇشىن ءىس-شارالاردى جۇزەگە اسىرۋعا تولىق دايىن»، - دەدى الماتى قالاسى قوعامدىق دەنساۋلىق باسقارماسىنىڭ باسشىسى تىلەۋحان ابىلدايەۆ.

مەگاپوليستەگى بارلىق كولىك باعىتتارى دا باقىلاۋعا الىندى. حالىقارالىق اۋەجاي اۋماعىندا پروفيلاكتيكالىق جانە ەپيدەمياعا قارسى ءىس-شارالاردى وتكىزۋگە ەرەكشە كوڭىل بولىنەدى. كوروناۆيرۋستىق ينفەكتسيا جاعدايلارى تىركەلگەن ەلدەردەن كەلگەن بارلىق ادامدار ەپيدەميولوگتاردىڭ باقىلاۋىنا الىندى.

الماتىعا 6- اقپاننان باستاپ 13 مىڭنان استام جولاۋشى كەلدى. 35 كە جۋىق ەپيدەميولوگ قالاعا كەلگەن بارلىق رەيستەردى تەكسەردى.

«كەلگەن ادامدارعا ءبىز تۇراقتى مەديتسينالىق باقىلاۋ جۇرگىزەمىز»، - دەدى قالالىق تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ايزات مولداعاسىموۆا.

الماتى قالاسىنىڭ اۋەجايىندا قوسىمشا 1- ساناتتاعى جولاۋشىلارعا ارنالعان جاڭا ترانزيتتىك زال اشىلدى.

وتىرىس قورىتىندىسى بويىنشا وڭىرلىك شتاب ءتوراعاسى ە. باباقۇماروۆ بارلىق مەملەكەتتىك مەكەمەلەرگە، ونىڭ ىشىندە مەكتەپتەرگە، جوعارى وقۋ ورىندارىنا جالپىعا ورتاق پايدالانۋعا قولجەتىمدى انتيسەپتيكالىق جانە دەزينفەكتسيالىق قۇرالداردىڭ بولۋىنا باقىلاۋدى كۇشەيتۋدى تاپسىردى. ۆيرۋستاردان قورعايتىن قۇرالدار ادامدار كوپ شوعىرلاناتىن جەرلەرگە دە قويىلۋى ءتيىس. ءتيىستى ۇسىنىم حاتتار ساۋدا ورتالىقتارىنىڭ، ح ق ك و جانە ت. ب. اكىمشىلىكتەرىنە جىبەرىلدى.

بۇدان باسقا تۇرعىندار اراسىندا دا ۆيرۋستىڭ الدىن الۋىن قامتاماسىز ەتۋ شارالارى تۋرالى اقپاراتتىق-ءتۇسىندىرۋ جۇمىستارىن كۇشەيتۋ كەرەكتىگى جۇكتەلدى.