تۇرىك اسكەرى سيريالىق ەكى ۇشاقتى اتىپ ءتۇسىرىپ، الەپپوداعى اەرودرومدى قيراتتى
ولار بۇل كەزدە تۇرىك ۇشاقتارىنا شابۋىل جاساپ جاتقان بولاتىن، دەپ حابارلايدى انادولى اگەنتتىگى تۇركيانىڭ ۇلتتىق قورعانىس مينيسترلىگىنە سىلتەمە جاساپ.
حابارلاماعا سەنسەك، اساد كۇشتەرىنىڭ اۋەگە قارسى قورعانىسقا ارنالعان ءۇش قۇرىلعىسى دا جويىلعان. ونىڭ بىرەۋى جاقىندا تۇركيا اۋە كۇشتەرىنىڭ ۇشقىشسىز اپپاراتىن اتىپ تۇسىرگەن بولاتىن.
سونداي-اق، سەنبى كۇنى تۇركيا اۋە كۇشتەرى الەپپو پروۆينتسياسىنداعى نەيراب اۋدانىندا ورنالاسقان باشار اساد رەجيمىنە تيەسىلى اەرودرومدى قيراتتى. بۇل اسكەري نىساندى اساد كۇشتەرى بەلسەندى تۇردە پايدالانىپ كەلگەن ەدى.
ايتا كەتەيىك، الەپپونىڭ شىعىسىنداعى كۋۆەيراس اەرودرومىنا جاسالعان سوققىدان كەيىن اساد كۇشتەرى ءوزىنىڭ بۇكىل اۆياتسيالىق تەحنيكاسىن نەيراب اۋدانىنداعى اەرودرومعا كوشىرگەن ەدى. دەگەنمەن، ونى دا تۇرىك اسكەرى جارىپ جىبەردى.
جەرگىلىكتى اقپارات كوزىنىڭ مالىمەتىنشە، سيريانىڭ سولتۇستىك-باتىسىنداعى اەرودرومداردى جارامسىز ەتۋ اساد جاقتاستارىنىڭ ەلدىڭ وسى بولىگىندە مانيەۆر جاساۋ مۇمكىندىگىن ايتارلىقتاي شەكتەيدى.
تۇركيانىڭ ۇلتتىق قورعانىس ءمينيسترى حۋلۋسي اكار بۇعان دەيىن يدليب ايماعىندا «كوكتەمگى قالقان» وپەراتسياسى جۇرگىزىلىپ جاتقانىن مالىمدەگەن ەدى. قورعانىس ۆەدومستۆوسى باسشىسىنىڭ سوزىنە سەنسەك، بۇل وپەراتسيا 27- اقپاندا تۇركيالىق 36 اسكەري قىزمەتكەردىڭ ءومىرىن قيعان اۋە سوققىسىنا قارسى جاۋاپ رەتىندە ءجۇرىپ جاتىر.
ونىڭ ايتۋىنشا، تۇركيا سيريا اۋماعىندا رەسەيگە قارسى قارۋلى قاقتىعىستى كوزدەپ وتىرعان جوق.
