التاي كولگىنوۆ كوممۋنالدىق قىزمەتكەرلەرگە ەرەن ەڭبەگى ءۇشىن العىس ايتتى

نۇر-سۇلتان. قازاقپارات - ەلوردا اكىمى التاي كولگىنوۆ كوممۋنالدىق قىزمەتكەرلەردى العىس كۇنىمەن قۇتتىقتاپ، ولاردىڭ ادال ءارى قاجىرلى ەڭبەگىنىڭ ماڭىزىن اتاپ ءوتتى، دەپ حابارلايدى قازاقپارات قالا اكىمىنىڭ رەسمي سايتىنا سىلتەمە جاساپ.

«ءسىز اۋا رايىنىڭ قولايسىزدىعىنا قاراماستان كۇندىز-ءتۇنى ەڭبەكتەنىپ جاتىرسىز. ءوز تاراپىمىزدان قولداۋ كورسەتىپ، ەڭبەك جاعدايىن جاقسارتۋعا تىرىسامىز: كوممۋنالدىق قىزمەت پاركىن جاڭارتامىز. ەڭبەگىڭىزدى جوعارى باعالايمىز. اتقارىپ جاتقان ادال جۇمىسىڭىز ءۇشىن العىس ايتامىن»، - دەدى قالا اكىمى التاي كولگىنوۆ.

ەلوردا اكىمى التاي كولگىنوۆتىڭ تاپسىرماسىنا سايكەس 2020-جىلدىڭ باسىنان بەرى كوممۋنالدىق قىزمەتكەرلەردىڭ ەڭبەكاقىسى كوتەرىلىپ، سىياقى بەرىلدى. الپىسباي حامىتبەك كوممۋنالدىق قىزمەتتە 6 جىل جۇمىس ىستەپ كەلەدى.

«مەن شەتكەرى ايماقتىڭ تۇرعىنىمىن. جۇمىسقا 3:30 دا تۇرامىن. اۆتوبۋس الىپ كەتەدى. تاڭعى ساعات 6 دا ءبىز جۇمىسقا كىرىسەمىز. جۇمىس وتە كوپ. ءتىپتى اۋا رايىنىڭ قولايسىزدىعىنا بايلانىستى 2-3 كۇن ۇيگە بارماي، جۇمىس جاساعانىمىز بار. كوممۋنالدىق قىزمەتتە مىنە، التىنشى جىل جۇمىس جاساپ كەلەمىن. وسى ۋاقىت ىشىندە بيىلعىداي قار كورمەپپىن. ءبىزدىڭ جۇمىسىمىزدى ءبارى كورە بەرمەيدى، سەبەبى قاردى تازالاعان سوڭ قايتا قالىڭ قار جاۋادى. ءبىز كۇشىمىزدى اياماي، قالانىڭ تازا بولۋى ءۇشىن جۇمىس ىستەيمىز»، - دەيدى الپىسباي حامىتبەك.

قالانىڭ كوممۋنالدىق قىزمەتكەرلەرى كۇشەيتىلگەن تارتىپتە جۇمىس ىستەيدى. قىسقى كەزەڭدە 5 ميلليون 28 مىڭ تەكشە مەتر قار شىعارىلدى، وتكەن جىلى 1 ميلليون 900 مىڭ تەكشە مەتر قار شىعارىلعان.

«قازگيدرومەت» ر م ك مالىمەتىنشە، اقپاندا جاۋعان قار مولشەرى نورمادان ءۇش ەسە جوعارى بولدى (نورما - 15 م م، 45 م م ءتۇستى) . قاڭتاردا - 53 م م (نورما 16 م م)، جەلتوقساندا - 39 م م (نورما - 22 م م ) قار ءتۇستى. بىلتىر قاراشا ايىنان ناۋرىز ايىنا دەيىن 99 م م قار ءتۇستى، بيىل قاراشا ايىنان اقپان ايىنا دەيىن 184 م م قار ءتۇستى. بۇل نورمادان ەكى ەسە جوعارى.