قازاقستاندىق بوكسشىلار امەريكالىق اتاقتى باپكەرگە شاپان سىيلادى
سپورتشىلار بەلگىلى تالىمگەرگە قازاقتىڭ شاپانىن سىيعا تارتتى.
«فرەدديدى تۋعان كۇنىمەن قۇتتىقتاپ كەلدىك»، - دەپ جازدى م. نۇرسۇلتانوۆ Instagram-پاراقشاسىندا.
ەسكە سالايىق، قازاقستاندىق بوكسشىلار فرەددي روۋچتىڭ زالىندا كەلەسى جەكپە-جەكتەرىنە ۇزاق ۋاقىتتان بەرى دايىندالىپ كەلەدى.
فرەدەريك ستيۆەن روۋچ - امەريكالىق كاسىپقوي بوكسشى، باپكەر. الەمدىك بوكس تاريحىنداعى ەڭ مىقتى جاتتىقتىرۋشىلاردىڭ ءبىرى. بوكس تۋرالى جازاتىن جۋرناليستەر قاۋىمداستىعىنىڭ نۇسقاسى بويىنشا 7 رەت «جىلدىڭ ۇزدىك باپكەرى» اتانعان. روۋچ كوپتەگەن بەلگىلى سپورتشىلارمەن جۇمىس ىستەگەن. ۇلكەن جەتىستىككە ول فيليپپيندىك مەنني پاكياومەن جەتتى.
مەيىرىم نۇرسۇلتانوۆ سوڭعى ايقاسىن ا ق ش- تىڭ لاس-ۆەگاس قالاسىندا 2019-جىلدىڭ قاراشاسىندا وتكىزدى. WBC USNBC نۇسقاسى بويىنشا ورتا سالماقتاعى ا ق ش چەمپيونى اتاعى ءۇشىن جەكپە-جەكتەگى ونىڭ قارسىلاسى مەكسيكالىق كريستيان وليۆاس (16-6، 13 ك و) بولدى. تورەشىلەر ءبىراۋىزدى شەشىممەن جەڭىستى قازاقستاندىق بوكسشىعا بەردى. كەشتىڭ باستى ايقاسى رەسەيلىك سەرگەي كوۆاليەۆ پەن (34-4-1، 29 ك و) مەكسيكالىق ساۋل «كانەلو» الۆارەستىڭ (53-1-2، 36 ك و) اراسىندا ءوتتى.
ماديار اشكەيەۆ بولسا، وتكەن جىلدىڭ قاراشاسىندا امەريكانىڭ گاۆايان گاردەنس قالاسىندا 37 جاستاعى ارگەنتينالىق رودولفو ەزيكەل مارتينەستى (43-8-3, 16 ك و) جەڭىپ، العاشقى تيتۋلى - WBC UNSBC تۇجىرىمى بويىنشا جارتىلاي ورتا سالماقتا بوس تۇرعان ا ق ش چەمپيونى اتاعىنا يە بولدى.
