قازاقتىڭ ءتىلىن، ءدىلىن جەتە بىلمەي، ۇلتپەن ەتەنە بولا المايمىز - كيم فەديانين
ونىڭ ايتۋىنشا، قازاق حالقىنا دەگەن ادالدىق اتا قانىمەن، انا سۇتىمەن بەرىلگەن. اتاسى يۆاننىڭ قازاقتارمەن ەتەنە بولعانى سونداي، كۇنباتىس الاشورداسىنىڭ جەتەكشىلەرى جاھانشا، حالەل دوسمۇحامەدوۆتەردى قولداپ وتىرعان. الاش قوزعالىسىنىڭ كەزەكتەن تىس Ⅱسەزىن وتكىزۋ ءۇشىن يۆان فەديانين ءوزىنىڭ تراكتورىن بەرگەن. وسىندا ءۇش كۇنگە سوزىلعان جيىن ءوتىپ، الاش قايراتكەرلەرى ەلدىڭ، ۇلتتىڭ بولاشاعى جونىندە پىكىر الىسادى. سەزد اياقتالار تۇستا ي. فەديانين سىيلى قوناقتارىنا ارناپ سكريپكا تارتىپ بەرەدى. ول كىسى كلاسسيكالىق تۋىندىلارمەن قاتار «زاۋرەش» ، «اينامكوز» ، «ياپۋراي» اندەرىن دە شەبەر ورىنداي بىلگەن.
«كەيىن اتامىز الاش قايراتكەرلەرىمەن سىيلاس، سىرلاس بولعانى جونىندە بالالارىنا ءتىس جارماي كەتسە دە، ەلىمىز تاۋەلسىزدىك العاننان كەيىن ءبارى دە بىرتىندەپ ءوز ورنىنا كەلىپ جاتىر. سەزدىڭ وتكەنىنە دە ءبىر عاسىردان استى. سەكسەن جىلدان كەيىن سول سكريپكانى سىرىم دات ۇلى اتىنداعى اۋداندىق تاريحي- ولكەتانۋ مۋزەيىنە تاپسىردىم» ، - دەيدى كيم فەديانين.
كيم نيكولاي ۇلىنىڭ ارعى اتاسى سەرگەي دە جىمپيتىدا جەرلەنگەن. اكەسى نيكولاي ءوز اۋىلىمەن قاتار كورشىلەس قاراتوبە، شىڭعىرلاۋ اۋداندارىندا دا باسشىلىق قىزمەت اتقارىپ، 1950 -جىلى ومىردەن ءوتتى. اناسى، قاراتوبە اۋدانىندا تۋىپ- وسكەن كاريما داۋلەتباي قىزى 1990 -جىلى دۇنيەدەن وزدى.
«ءبىز وتباسىندا ءتورت بالا - بوريس، ۆلاديمير، نادەجدا جانە مەن ەدىم. انامىز سول كەزدە كەڭەستىك پارتيا مەكتەبىن بىتىرگەن، ەتى ءتىرى، كوزى اشىق ادام ەدى. ءبىزدىڭ قازاق ءتىلىن ەركىن مەڭگەرۋىمىز دە ەڭ الدىمەن سول انامىزدىڭ ارقاسى ەدى. قازاق بالالارىمەن بىرگە ويناپ وستىك. ەشقاشان بولىنگەن جوقپىز. قازىر قازاقتىڭ بارلىق سالت- ءداستۇرىن ساقتاپ وتىرامىز. مۇسىلمانشىلىقتى ۇستانىپ، مەشىتكە بارىپ، دۇعا ەتىپ تۇرامىن. انامدى، اعام ءبوريستى، ۇلىم رۋسلاندى قازاق زيراتىنا جەرلەدىك» ، دەيدى جاسى سەكسەننەن اسقان ارداگەر.
كيم فەديانين 1963 -جىلى ا. پۋشكين اتىنداعى ورال پەداگوگيكالىق ينستيتۋتىن بىتىرگەننەن كەيىن تۋعان اۋىلىنا ورالىپ، قىرىق جىلدان استام ۋاقىت بويى ۇستازدىق ەتتى. جۇبايى، تاتار قىزى سافۋرا دا سول ينستيتۋتتى ءتامامداعاننان كەيىن وتىز جىل شاكىرتتەرىنە ءدارىس بەردى. بەس بالا تاربيەلەپ وسىرگەن ەرلى- زايىپتى ارداگەردىڭ ۇستازدىق جولىن قىزدارى ايدا دا جالعاستىردى. بۇگىندە ۇستازدار اۋلەتىنىڭ باسى بولىپ وتىرعان ك. فەديانين - سىرىم اۋدانىنىڭ قۇرمەتتى ازاماتى. قادىر مىرزاليەۆ اتىنداعى ورتا مەكتەپتە ك. فەديانين اتىنداعى فيزيكا ءپانى كابينەتى دە بار.
«ۇرپاق بولاشاعى ەڭ الدىمەن تاربيەگە بايلانىستى. جاستار تاربيەسىن اقساتىپ الساق، مىنە، سودان وپىق جەيمىز. بۇل جونىندە كوپ ايتۋعا بولار ەدى. ەڭ باستىسى، ءبىر اتانىڭ بالاسىنداي، تاتۋلىق دىڭگەگىن بەرىك ۇستاي بىلسەك، ءبىزدى ەشبىر جاۋ الا المايدى. ول ءۇشىن قازاقتىڭ ءتىلىن ءبىلىپ، جۇرەگىن ءتۇسىنۋ كەرەك. سوندا عانا ءبىر- بىرىمىزبەن ەتەنە جاقىن بولامىز» ، دەدى ارداگەر ۇستاز.
