قىتايداعى قازاقستان ديپلوماتتارىنىڭ وتباسىلارى ەۆاكۋاتسيالاندى - مينيستر

نۇر-سۇلتان. قازاقپارات – ق ر سىرتقى ىستەر ءمينيسترى مۇحتار تىلەۋبەردى قىتاي اۋماعىندا قالعان قازاقستان ازاماتتارى تۋرالى ايتىپ بەردى، دەپ حابارلايدى قازاقپارات ءتىلشىسى.

«ەرتەڭ ۋحاننان ەكى ازامات ەلگە ورالادى. ۋكراينانىڭ ۇشاعى بار، ولار وزدەرىنىڭ ازاماتتارىن الىپ كەتۋگە بارعاندا، ءبىزدىڭ ەكى ازاماتىمىزدى دا قوسا الا كەلەدى. وسى ورايدا الماتىدا تەحنيكالىق ايالداپ، ءبىزدىڭ ازاماتتاردى ءتۇسىرىپ، ارى قاراي كيەۆكە ۇشادى»، - دەدى م. تىلەۋبەردى پارلامەنت ماجىلىسىندە تىلشىلەر ساۋالىنا جاۋاپ بەرە وتىرىپ.

سونىمەن قاتار مينيستر ق ح ر اۋماعىندا قىزمەت ەتىپ جۇرگەن قازاقستان ديپلوماتتارى تۋرالى ايتىپ بەردى.

«ولاردىڭ وتباسىلارىن ەۆاكۋاتسيالادىق. وندا تەك وتاعاسىمەن بىرگە قالۋعا نيەت بىلدىرگەن وتباسىلار عانا قالدى. اتاپ ايتقاندا، ديپلوماتتار، بارلىق مەكەمەلەر شتاتتىق رەجىمدە جۇمىس ىستەۋدە»، - دەپ ناقتىلادى ۆەدومستۆو باسشىسى.

اۆتور: رۋسلان عابباسوۆ