قىستا سالماق قوسپاۋدىڭ امالى

نۇر-سۇلتان. قازاقپارات - قىس مەزگىلىندە كوپشىلىگى ارتىق سالماق قوسىپ الادى. ال ارتىق سالماقتىڭ وزىندىك ماشاقاتى مەن اۋرەسى بارى بەلگىلى. ەندەشە قىستىگۇنى ارتىق سالماق قوسپاۋدىڭ نەگىزگى جولىمەن تانىسا وتىرىڭىزدار.

ارتىق سالماقتان ارىلۋدىڭ ەڭ ءتيىمدى جولى - دۇرىس اشىعۋدى ۇيرەنۋ. ۇزاق ۋاقىت اشىعۋ - سەمىزدىكتى، تەرىنىڭ جانە شىرىشتى قاباتتىڭ ويىق جارالارىن، ەكزەمانى ەمدەۋگە قولدانىلادى. ونىڭ تۇك تە قيىندىعى جوق. تەك مىنا تومەندەگى جايلاردى ەستە ۇستاعان دۇرىس.

1. 3-7 نەمەسە 10 كۇن اشىعۋ - اعزانى قالدىقتاردان جانە توكسيندەردەن تازارتۋدىڭ تاماشا ءادىسى. قىسقا مەرزىم 1-3 كۇندىك اشىعۋ حيرۋرگيالىق وتالاردان سوڭ، اسىرەسە جوعارى تەمپەراتۋرامەن قاتار وتەتىن اسقازان- ىشەك جانە رەسپيراتورلىق جۇقپالاردان كەيىن تەز ساۋىعۋعا كومەكتەسەدى.

2. ءبىر كۇندىك اشىعۋ — بارلىق ساۋ ادامدارعا، كەز كەلگەن جاستاعىلارعا دا ۇسىنىلادى. اپتاسىنا ءبىر كۇندى تەك قايناتىلعان سۋ ءىشىپ وتكىزۋ كوپ ادامدار ءۇشىن قاجەتتىلىككە اينالادى. ول اسىرەسە ايەلدەرگە ءتيىمدى. مۇنداي اشىعۋ اسقازان- ىشەك جولىنا جاسالعان ۇلكەن جەڭىلدىك.

3. 3-14 كۇندىك اشىعۋلار تەك اسقازان- ىشەك جولىن تازارتۋعا كومەكتەسەدى، ال 3-30 كۇندىك ۇزاق اشىعۋلار اعزانى جىلدار بويى جيناقتالعان دەرتتەردەن ءدارىسىز ساۋىقتىرادى.

4. اعزاعا اس تۇسپەگەن كەزدە ول ءوز- ءوزىن قورىتا باستايدى. ەڭ الدىمەن ماي مەن جامان، اۋرۋ جاسۋشالار قورىتىلادى. ناتيجەسىندە ماي قاتپارلارى ازايادى، تەرى جاقسارادى، ويىق جارالار جازىلادى.

5. كوبىنە 3-7 كۇندىك اشىعۋلار اعزا ءتۇرلى قالدىقتارعا تولعاندا اسا پايدالى. اعزانىڭ لاستانۋى السىزدىكتەن، ەنجارلىقتان، باستىڭ اۋرۋىنان، دەنە جانە اقىل- وي پوتەنسيالىنىڭ تومەندەۋىنەن كورىنىس تابادى. اشىعۋدان سوڭ مۇنداي ادامعا «قانات ءبىتىپ» ، ءوزىن اسا سەرگەك سەزىنەدى.

6. كەيدە اشىعۋ ارىق ادامداردىڭ تولۋىنا دا كومەكتەسەدى. بۇل كەزدە اعزادا زات الماسۋ كۇشەيەدى جانە اشىعۋ اياقتالعان سوڭ ادامنىڭ اس قورىتۋ جانە قورەكتىك زاتتاردىڭ ءسىڭىرۋى ايتارلىقتاي جاقسارا تۇسەدى. ەسىڭىزدە بولسىن، اشىعۋ ءار ادامعا ءار ءتۇرلى اسەر ەتەدى جانە ناتيجەسى دە ءار ءتۇرلى بولادى. اشىعۋدىڭ اسەرى ادامنىڭ سالماعىنا، دەنە بىتىمىنە، جاسىنا، فيزيولوگيالىق احۋالىنا، ءومىر سالتىنا، قالىپتاسقان ادەتتەرىنە، ءتىپتى وتباسى جاعدايىنا دا بايلانىستى. سوندىقتان اعزانى مۇنداي سترەسكە ۇشىراتپاس بۇرىن، ول سىزگە قاجەت پە، وعان شىداي الاسىز با، سىزگە ول پايدا اكەلە مە، سونى وي سارابىنان وتكىزىپ الىڭىز. دارىگەرمەن اقىلداسىڭىز. سونىمەن قاتار اشىعۋ - ادامنىڭ ەرىك- جىگەرىن سىنايتىن ءادىس ەكەنىن ۇمىتپاڭىز.

Massaget.kz