الماتىدا كوروناۆيرۋستى الدىن الۋ شارالارى ءوتتى
الماتى اۋەجايىندا قالا اكىمىنىڭ ورىنباسارى ەرجان باباقۇماروۆتىڭ ءتوراعالىق ەتۋىمەن وتكەن جيىندا اۋەجايعا كەلەتىن بارلىق حالىقارالىق رەيستەردى باقىلاۋدىڭ اعىمداعى ماسەلەلەرى تالقىلاندى.
سونداي-اق، اۋەجايدىڭ سانيتارلىق جانە شەكارا قىزمەتتەرىنىڭ كوروناۆيرۋستى ينفەكسيالاردىڭ تارالۋىنىڭ الدىن الۋى بويىنشا جۇمىس مەحانيزمى تەكسەرىلدى.
قوعامدىق دەنساۋلىق باسقارماسىنىڭ باسشىسى تىلەۋحان ابىلدايەۆ قالانىڭ ستاتسيونارلارىندا كوروناۆيرۋستى ينفەكسيانىڭ تارالۋ ءقاۋپى بار ايماقتاردان كەلگەن جرۆي مەن تۇماۋدىڭ بەلگىلەرى بار 8 ەمدەلۋشى بار ەكەنىن ايتتى.
«ەمدەلۋشىلەردىڭ جاعدايى الاڭداۋشىلىق تۋعىزبايدى. ديناميكادا ءبارى جاقسارىپ، قالپىنا كەلۋدە. ولاردىڭ التاۋى ەرەسەك، ءبىر بالا اتا-اناسىمەن بىرگە بالالار جۇقپالى اۋرۋلار اۋرۋحاناسىندا جاتىر»، - دەدى ت. ابىلدايەۆ.
ينفەكسيالىق باقىلاۋدىڭ بارلىق تالاپتارىنا سايكەس، رەزەرۆتىك ەمحانا دايىندالدى. قالانىڭ مەديتسينالىق مەكەمەلەرى قاجەتتى ءدارى- دارمەكتەرمەن، كەلۋشىلەرگە دە، مەديتسينا قىزمەتكەرلەرىنە دە جەكە قورعانۋ قۇرالدارىمەن قامتاماسىز ەتىلدى.
«الماتى قالاسىنىڭ حالىقارالىق اۋەجاي اۋماعىنا 150 دەن استام حالىقارالىق رەيس قوندى، 17 مىڭعا جۋىق جولاۋشى تەكسەرىلدى. ولاردىڭ 200 گە جۋىعى قىتاي ازاماتى»، - تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ايزات مولداعاسىموۆا.
وتىرىستىڭ قورىتىندىسى بويىنشا، وڭىرلىك شتابتىڭ ءتوراعاسى ە. باباقۇماروۆ جۇمىس قارقىنىن تومەندەتپەۋدى، بارلىق حالىقارالىق رەيستەرگە كۇشەيتىلگەن سانيتارلىق-كارانتيندىك باقىلاۋدى جالعاستىرۋدى تاپسىردى.
سونىمەن قاتار، سانيتارلىق جانە شەكارا مەن ەكيپاج، مەديتسينا قىزمەتكەرلەرىنىڭ، ونىڭ ىشىندە جەدەل جاردەم قىزمەتىنىڭ ءوزارا ءىس-قيمىلىن پىسىقتاۋ، ۆيرۋستىق ينفەكسيالاردىڭ الدىن-الۋ جانە دياگنوستيكا بويىنشا ەپيدەمياعا قارسى شارالاردى ساقتاۋ بويىنشا وقىتۋ وتكىزىلدى. ايقىن سيمپتومى بار ادامداردى تاسىمالداۋ ءۇشىن جەدەل جاردەم ىسكە قوسىلدى. ولار اۋەجاي اۋماعىندا تاۋلىك بويى كەزەكشىلىكپەن جۇمىس ىستەيدى.
سونداي-اق، وقۋ-جاتتىعۋلار اۋماقتىق ەمحانالاردا دا ءوتتى. الماتىدا كوروناۆيرۋستى جۇقتىرۋ جاعدايى تىركەلگەن جوق. قالانىڭ بارلىق قىزمەتتەرى بەكىتىلگەن الگوريتىمگە ساي جۇمىس ىستەيدى. مەگاپوليستەگى جاعداي بيلىكتىڭ باقىلاۋىندا.
