تۇركىستاندىق جاستار اعىلشىن ءتىلىن تەگىن ۇيرەنۋدە
قوعامدىق دامۋ باسقارماسىنا قاراستى جاستار رەسۋرستىق ورتالىعى قولعا العان جوبانىڭ اياسىندا جاستار اعىلشىن ءتىلىن تەگىن ۇيرەنەتىن بولادى. ءتىل ۇيرەتەتىن ۇستاز دا ەرىكتى رەتىندە جۇمىس ىستەپ جاتىر.
جوبانىڭ اشىلۋىندا جاستار رەسۋرستىق ورتالىعى باسشىسىنىڭ مىندەتىن اتقارۋشى امالبەك ءومىرتاي باسەكەگە قابىلەتتى مامان بولۋ ءۇشىن شەت ءتىلىن مەڭگەرۋدىڭ ماڭىزدىلىعىن ءتۇسىندىردى.
«جاستار - ءبىزدىڭ بولاشاعىمىز. جاقسى مامان بولىپ قالىپتاسۋى ءۇشىن قولداۋ كورسەتىپ، كەڭ كولەمدە جاعداي جاساۋىمىز كەرەك. ەرىكتىلەر جىلىنداعى «ءبىلىم» جوباسى اياسىندا جاستارعا اعىلشىن ءتىلىن ۇيرەتىپ، كومپيۋتەرلىك ساۋاتتىلىقتى جەتىلدىرۋگە كومەكتەسۋ ماسەلەلەرىنە نازار اۋدارىپ وتىرمىز. جوباعا قاتىسۋعا نيەتتى جاستارعا ەسىگىمىز ءاردايىم اشىق»، - دەدى امالبەك داركەن ۇلى.
بىلىكتى وقىتۋشى ءالىمجان بەكبولاتوۆ اباي اتىنداعى قازاق ۇلتتىق پەداگوگيكالىق ۋنيۆەرسيتەتتىڭ تۇلەگى، ق. ا. ياساۋي اتىنداعى ح ق ت ۋ-دىڭ ماگيسترانتى. «اعىلشىن ءتىلى» ماماندىعىن مەڭگەرىپ، كەيىننەن ەۋروپادا، امەريكادا ءبىلىمىن جەتىلدىرىپ كەلگەن. قازىر ورتالىقتاعى ءتىل ۇيرەتۋ كۋرسىنىڭ جەتەكشىسى. ساپالى ءبىلىم بەرىپ، بىلىكتى ۇستاز اتانعان وقىتۋشىنى جاستار دا ارنايى ىزدەپ كەلەدى.
«مەن جاستار ورتالىعىندا اعىلشىن ءتىلىن ۇيرەتەتىن ورتالىقتىڭ بار ەكەندىگىن ەسىتىپ كەلدىم. مۇندا بارلىعى تەگىن ەكەن. قازىر ءبىلىمىمدى جەتىلدىرىپ جاتىرمىن. بولاشاقتا اۋدارماشى بولعىم كەلەدى»، - دەيدى نازەركە ەسمىرزا.
قازىر ورتالىقتاعى كۋرستا 30 وقۋشى ەكى كەزەڭگە ءبولىنىپ ءتىل ۇيرەنىپ جاتىر. بارشاسى دا جاستارعا قولداۋ ءبىلدىرىپ، ۇلكەن كومەك بەرىپ وتىرعان باسشىلارعا العىستارىن ايتۋدا.
