رەسەي مەن تۇركيا قارىم- قاتىناسى شيەلەنىسىپ بارادى

نۇر-سۇلتان. قازاقپارات - تۇركيا ي د ل ي ب پروۆينتسياسىنداعى سيريا اسكەرىنىڭ بەكىنىستەرىنە سوققى جاسادى. بۇل وسى ورىننان تۇرىك جاۋىنگەرلەرىنە جاسالعان اتىسقا جاۋاپ بولدى.

سوڭعى كۇندەرى تۇركيا يدليبتەگى بەكەتتەرىن كۇشەيتۋ ماقساتىمەن تەحنيكا مەن قوسىمشا اسكەري بولىمدەردى شوعىرلاندىرا باستادى. رەسەي سىرتقى مينيسترلىگى وتكەن اپتادا سيريادا رەسەيلىك جانە تۇرىك اسكەري ماماندارىنىڭ قازا بولعانىن حابارلاعان. استانا پروتسەسسىنە قاتىسۋشى بۇل ەكى ەل اراسىندا قاتىناستار شيەلەنىسىپ كەلەدى. تۇركيا بيلىگى رەسەي قاۋىپسىز ايماقتاردا اسكەري قيمىلداردى دوعارۋ جونىندە كەلىسىمدى ورىنداماي وتىر دەگەن ايىپ تاقتى. ال رەسەي ءوز جاعىنان تۇركيا ايماقتاعى تەررورلىق ۇيىمداردى قولداپ جۇرگەنىن العا تارتادى.

ۆلاديمير ەۆسەيەۆ، اسكەري ساراپشى:

- رەسەي ۇشاعىن تاعى دا اتىپ تۇسىرگەنى بىزگە قاجەت ەمەس. ەگەر تۇركيا سيريانىڭ اۋە كەڭىستىگىن بۇزسا، بۇل جولى تۇركيالىق ۇشاقتار نىسانعا الىنۋى مۇمكىن. اسكەري قاقتىعىستاردىڭ بولۋىن، اسىرەسە سيريا جەرىندە تۇركيامەن قارۋلى شيەلەنىستى قالامايمىز. بۇل تۇستا استانانىڭ ماڭىزى زور، ويتكەنى ول - كەلىسسوزدەر الاڭى. قازىر دە، بولاشاقتا دا بۇل الاڭ قاجەت بولادى.

رۋسلان مامەدوۆ، حالىقارالىق ىستەر جونىندەگى رەسەي كەڭەسىنىڭ ساراپشىسى:

- استانا فورماتىنا ماڭىزى ارتىپ جاتقان تاعى دا ءبىر ويىنشى قوسىلدى، ءبىراق كوبىسى مۇنى اڭعارماي وتىر. بۇل سيريا ۇكىمەتى. بىرنەشە جىل بۇرىن وسى فورمات قۇرىلعاننان بەرى داماسك ەداۋىر كۇشەيە ءتۇستى.

سيرياداعى ازاماتتىق سوعىس كوپتەگەن ەلدەر ارالاسقان ءىرى حالىقارالىق جانجالعا ۇلاسىپ كەتتى. قازىرگى كەزدە اسكەري قيمىلدار ەلدىڭ سولتۇستىگىندە ءجۇرىپ جاتىر. ۇكىمەتتىك اسكەر بۇل ايماقتا جاساقشىلاردى ىعىستىرىپ كەلەدى. تۇركيا دا بۇل ەلدەگى كونتينگەنتىن كۇشەيتىپ، يدليب ايماعىنا قوسىمشا اسكەري بولىمدەرىن جىبەردى. سيرياداعى ەڭ شيەلەنىسكەن ايماق - يدليب پروۆينتسياسى. قازىر وندا رەسەي قولداپ جۇرگەن ۇكىمەتتىك اسكەر تۇركيا جاقتايتىن جاساقتارمەن شايقاسىپ جاتىر. اۋەدەن بومبابالاپ، زەڭبىرەكتەردەن وق جاۋدىرعاننان كەيىن ۇكىمەتتىك اسكەر شابۋىلعا شىقتى. كوشەلەردە كەسكىلەسكەن شايقاستار جۇرگىزىپ، سەراكيب قالاسىن بوساتتى. بۇل ستراتەگيالىق جاعىنان ماڭىزدى ەلدى مەكەن جاساقشىلارىنىڭ ايماقتاعى سوڭعى تىرەگى. ەندى ۇكىمەتتىك اسكەر ماڭىزدى جولداردى ءوز باقىلاۋىنا الىپ، قارسىلاستارىنا قوسىمشا كۇشتەر مەن قارۋ- جاراق جەتكىزۋگە مۇمكىندىك بەرمەيدى.

الي مايحۋب، سيريا اسكەرىنىڭ وكىلى:

- سوڭعى بىرنەشە كۇندە قارۋلى كۇشتەرىمىز ەلەۋلى تابىستارعا جەتتى. يدليبتىڭ شىعىس جاعىنان قوزعالعان اسكەرىمىز الەپپونىڭ وڭتۇستىك بولىگىنەن شىققان كۇشتەرىمىزدىڭ الدىڭعى قاتارىمەن كەزدەستى. وسىلاي 600 شارشى شاقىرىمنان اساتىن اۋدانعا ءوز باقىلاۋىن قالپىنا كەلتىرە باستادى.

ال وسى كەزدە تۇركيا دا سيرياداعى اسكەرىن كۇشەيتۋگە كىرىستى. شەكارالىق ايماقتاعى جولداردا تانكتەر مەن زەڭبىرەكتەر تاسىمالدانىپ جاتىر. وسى ايدىڭ باسىندا تۇركيا پرەزيدەنتى داماسكتان يدليب ايماعىنان اسكەرىن شىعارۋدى تالاپ ەتكەن بولاتىن.

ميەۆليۋت چاۆۋشوگلۋ، تۇركيانىڭ سىرتقى ىستەر ءمينيسترى:

- وكىنىشكە وراي سيريا بيلىگى ساياسي پروتسەسسكە سەنبەيدى جانە بەيبىتشىلىككە تەك اسكەري جولمەن جەتۋگە بولادى دەپ سانايدى. بۇل پىكىرى قاتە ەكەنىن ايتۋىم كەرەك. ولار شابۋىلدارىن ۇدەتە ءتۇستى. داماسكتىڭ اسكەري جەڭىستەرى سوعىستى توقتاتاتىن ءتۇرى جوق.

وسىدان ەكى جىل بۇرىن يراك پەن ليەۆانت تەررورلىق ۇيىمى تالقاندالعاننان كەيىن سيرياداعى جانجال اياقتالادى دەگەن ءۇمىت تۋعان ەدى. الايدا شيەلەنىس ءالى كۇنگە دەيىن جالعاسىپ كەلەدى.

ۆلاديمير يانكەليەۆيچ، اسكەري ساراپشى:

- بۇل جانجالدى رەتتەۋ وتە قيىن. قارۋدىڭ كۇشىمەن سيرياعا بەيبىتشىلىك اكەلۋگە بولمايتىنىن ءتۇسىنۋ كەرەك. ولاردىڭ وزدەرى بىتىمگە كەلۋى قاجەت. الايدا جاۋلاسقان تاراپتار جاقىن ارادا بىتىمگە جەتەتىن ءتۇرى جوق. سوعىس جالعاسىپ كەلەدى. جۋىردا سيريا مەن تۇركيا اسكەرلەرى اراسىندا العاشقى قاقتىعىستار بولدى.

ساراپشىلاردىڭ ايتۋىنشا، بۇل جاعدايدى ابدەن ۋشىقتىرىپ جىبەرۋى مۇمكىن.

www.24.kz