قورداي وقيعاسىنا قاتىستى قانداي قىلمىستىق ىستەر قوزعالدى؟
بۇل تۋرالى ىشكى ىستەر مينيسترلىگى تەرگەۋ دەپارتامەنتىنىڭ باستىعى سانجار ءادىلوۆ ءمالىم ەتتى، دەپ حابارلايدى قازاقپارات ءتىلشىسى.
«قىلمىستىق ىستەردى تەرگەۋگە توقتالساق، قازىرگى ۋاقىتتا جامبىل وبلىسى پوليتسيا دەپارتامەنتىنىڭ اۋماقتىق بولىمشەلەرى 25 تەن استام قىلمىستىق ءىس قوزعادى. وسى تۇرعىدا جاپپاي تارتىپسىزدىك، جاپپاي تارتىپسىزدىكتى ۇيىمداستىرۋ مەن وعان قاتىسۋ بابى قامتىلعان. سودان كەيىن جاپپاي تارتىپسىزدىككە قاتىسۋعا ۇندەۋ جاساۋ بويىنشا قىلمىستىق ءىس قوزعالدى. التىدان استام ءىس بۇزاقىلىق فاكتىلەرىنە قاتىستى قوزعالدى. ءۇش قىلمىستىق ءىس بوتەننىڭ مۇلكىن زاقىمداۋ بويىنشا، 10 ءىس كىسى ءولتىرۋ فاكتىسىنە، سونداي-اق ەكى ءىس ادام ومىرىنە قاستاندىق جاساۋعا قاتىستى قوزعالدى»، - دەدى ءادىلوۆ ۇكىمەت ۇيىندە تىلشىلەر ساۋالىنا جاۋاپ بەرە وتىرىپ.
ونىڭ سوزىنە قاراعاندا، بۇگىندە باس پروكۋراتۋرانىڭ، ىشكى ىستەر مينيسترلىگىنىڭ جانە باسقا دا قۇقىق قورعاۋ ورگاندارىنىڭ ۆەدومستۆوارالىق تەرگەۋ توبى جاپپاي تارتىپسىزدىك، ادام ءولتىرۋ بويىنشا سوتقا دەيىنگى تەرگەۋدى جۇرگىزۋدە. اتالعان ىستەر بويىنشا قازىرگى ۋاقىتتا قاماۋعا الىنعان ادامدار بار.
«زاڭناما تالاپتارىنا سايكەس، وسى كەزەڭدە الدىن الا تەرگەۋ مالىمەتتەرىن جاريا ەتۋگە بولمايدى. كەزەك كۇتتىرمەيتىن تەرگەۋ امالدارى ءجۇرىپ جاتىر»، - دەدى سانجار ءادىلوۆ.
ەسكە سالايىق، 7- اقپان كۇنى جامبىل وبلىسىنىڭ قورداي اۋدانىنداعى ماسانچي اۋىلىنىڭ تۇرعىندارى اراسىندا جاپپاي توبەلەس بولدى. ق ر پرەزيدەنتى قاسىم-جومارت توقايەۆ بۇزاقىلىق سيپاتتاعى جاپپاي توبەلەستى ارانداتۋشىلار ءوز پايداسىنا قولدانباق بولعانىن مالىمدەدى.
سونداي-اق ۆيتسە-پرەمەر بەردىبەك ساپاربايەۆتىڭ توراعالىعىمەن ۇكىمەتتىك كوميسسيا قۇرىلاتىنىن، قازا بولعانداردى جەرلەۋ، زارداپ شەككەندەرگە كومەكتەسۋ جۇمىستارى ۇيىمداستىرىلاتىنىن، قوعامدىق ءتارتىپتى بۇزعاندار انىقتالىپ، قاتاڭ جاۋاپقا تارتىلاتىنىن ءمالىم ەتتى. باس پروكۋراتۋراعا، ۇلتتىق قاۋىپسىزدىك كوميتەتىنە ءتيىستى تاپسىرما بەرىلدى.
