ەلوردادا بوگەنباي داڭعىلىنىڭ بويىنداعى كوپىر جوندەلەدى

نۇر-سۇلتان. قازاقپارات - ەلورداداعى بوگەنباي باتىر داڭعىلىنداعى جول قوزعالىسىنا ءىشىنارا شەكتەۋ قويىلدى، دەپ حابارلايدى قازاقپارات اكىمدىك سايتىنا سىلتەمە جاساپ.

«16- قاڭتاردان 1- قازانعا دەيىن تەمىر جول ۇستىنەن وتەتىن كوپىردىڭ تىرەك بولىگىنىڭ كۇردەلى جوندەلۋىنە بايلانىستى بوگەنباي باتىر داڭعىلىنداعى ش. ءۋاليحانوۆ كوشەسىنەن اقجول كوشەسىنە دەيىنگى ۋچاسكەدە كولىكتىڭ بارلىق تۇرىنە قوزعالىس شەكتەلدى»، دەلىنگەن حابارلامادا.

قوزعالىستى ءىشىنارا شەكتەۋگە بايلانىستى ءار باعىتتاعى 4 جولاقتىڭ 2 ءۋى جابىلدى.

اتالعان ۋچاسكەدەگى جۇكتەمەنى ازايتۋ ءۇشىن كوپىردەن تۇسكەن كولىكتەرگە سولعا ش. ءۋاليحانوۆ كوشەسىنە قاراي بۇرىلۋعا ۋاقىتشا تىيىم سالىنعان.

جولداردا كەپتەلىس بولدىرماۋ ءۇشىن تۇرعىندار باراتىن جەرلەرىنە باعىتتى الدىن-الا جوسپارلاۋ قاجەتتىلىگى ەسكەرتىلەدى.