ساياسات تانۋشى ايدوس سارىم: قوردايداعى قاقتىعىستى مينۋتىنا دەيىن زەرتتەۋ كەرەك

نۇر- سۇلتان. قازاقپارات - بەلگىلى ساياساتتانۋشى، ۇلتتىق قوعامدىق سەنىم كەڭەسىنىڭ مۇشەسى ايدوس سارىم قوردايداعى قايعىلى وقيعاعا قاتىستى پىكىر ءبىلدىردى، دەپ حابارلايدى قازاقپارات.

«ارينە بۇل - قايتالانباۋى ءتيىس وتە قورقىنىشتى وقيعا. بۇل جايت بارلىعىنا ساباق بولۋى ءتيىس. ءبىز كۇردەلى ۋاقىتتا ءومىر ءسۇرىپ جاتىرمىز. ءبىزدىڭ قوعام ۇنەمى قوزعالىستا جانە وندا ارحيتەكتونيكالىق وزگەرىستەر ءجۇرىپ جاتىر. بۇل الەمدە وزگەرمەيتىن، تۇراقتى ەشتەڭە جوق. سوندىقتان، وتكەن جىلداردىڭ شاڭ باسقان لوزۋنگتارىن بۇركەنبەي، ءوز ەلىمىزدى، ءوز قوعامىمىزدى زەرتتەۋىمىز كەرەك»، - دەدى ايدوس سارىم قازاقپارات تىلشىسىنە بەرگەن سۇحباتىندا.

وسىعان بايلانىستى، ىشكى ساياسات قۇرىلىمىن قايتا رەفورمالاپ، شيەلەنىستىڭ قايدان شىققانىن زەرتتەۋ قاجەت.

«ءبىز قولدا باردىڭ بارىنەن ءبىر مەزەتتە- اق اجىراپ قالۋىمىز مۇمكىن ەكەنىن، بۇرىن جاسىرىپ كەلگەن دۇنيەلەرىمىزدىڭ ءبارىنىڭ ءبىر ساتتە بەتى اشىلىپ، ءوزىمىز كورگىمىز كەلمەيتىن دۇنيەنىڭ كۋاسى بولاتىنىمىزدى بايقادىق. سوندىقتان قازىر مەرت بولعانداردى جەرلەپ، جارالىلاردى ەمدەپ، ەڭ باستىسى - بايىپپەن ويلانۋ قاجەت. حالىقتىق ديپلوماتيا قۇرالدارىن عانا ەمەس، گۋمانيتارلىق عىلىمداردى - الەۋمەتتانۋ، پسيحولوگيا، كونفليكتولوگيانى قولدانىپ، قاقتىعىستىڭ ءاربىر مينۋتىن زەرتتەۋ كەرەك. اسسامبلەيا ينستيتۋتتارىن قوسا العاندا، مەملەكەتتىك ورگاندار مەن ىشكى ساياسات قۇرىلىمدارىن رەفورمالاۋ قاجەت»، - دەدى ا. سارىم.

ەسكە سالايىق، 7 - اقپان كۇنى جامبىل وبلىسىنىڭ قورداي اۋدانىنداعى ماسانچي اۋىلىنىڭ تۇرعىندارى اراسىندا جاپپاي توبەلەس بولدى. ق ر پرەزيدەنتى قاسىم- جومارت توقايەۆ بۇزاقىلىق سيپاتتاعى جاپپاي توبەلەستى ارانداتۋشىلار ءوز پايداسىنا قولدانباق بولعانىن مالىمدەدى.

وقيعا تۋرالى تولىق مالىمەتتى ارنايى ايداردان وقۋعا بولادى.