قوردايدا زارداپ شەككەندەردىڭ بارلىعىنا مەديتسينالىق كومەك كورسەتىلەدى

نۇر- سۇلتان. قازاقپارات – ق ر دەنساۋلىق ساقتاۋ مينيسترلىگى قوردايداعى جاپپاي توبەلەس كەزىندە زارداپ شەككەندەردىڭ بارلىعىنا مەديتسينالىق كومەك كورسەتىلەتىنىن مالىمدەدى، دەپ حابارلايدى قازاقپارات.

«قازىر مەملەكەت باسشىسىنىڭ تاپسىرماسى بويىنشا ماسانچي اۋىلىندا ۇكىمەتتىك كوميسسيا جۇمىس ىستەۋدە. جەدەل مەديتسينالىق كومەك كورسەتۋ ءۇشىن وقيعا ورنىنا شۇعىل تۇردە ماماندار توبى جانە شۇعىل مەديتسينالىق كومەك بريگادالارى جىبەرىلدى. 100 دەن استام مەديتسينا قىزمەتكەرى مەن 36 سانيتارلىق كولىك، ونىڭ ىشىندە 2 سانيتارلىق اۆياتسيا تىكۇشاعى تارتىلدى» دەپ حابارلايدى ق ر د س م باسپا ءسوز قىزمەتى.

10 - اقپانداعى مالىمەتكە سايكەس، جاپپاي جانجال سالدارىنان 178 ادام زارداپ شەكتى، 10 ادام قازا تاپتى (8 وقيعا ورنىندا، اۋىر جاراقات العان 2 ادام اۋرۋحانادا) .

مينيسترلىك مالىمەتىنە ساي، مەديتسينالىق كومەككە 170 ادام جۇگىندى. ءوتىنىش بىلدىرگەندەردىڭ: 117سىنە امبۋلاتورلىق كومەك - (102 ق ر، 15 قىرعىز رەسپۋبليكاسىندا) ؛ 53 ادامعا ستاتسيونارلىق كومەك - (43 – ق ر، 10 - قىرعىز رەسپۋبليكاسىندا) كورسەتىلدى.

10.02.2020 -جىلعى ساعات 12.00 دەگى جاعداي بويىنشا ستاتسيونارلىق ەمدەلۋدە 41 ناۋقاس: الماتى قالاسىنىڭ ستاتسيونارلارىندا - 25؛ جامبىل وبلىسىندا - 14؛ قىرعىز رەسپۋبليكاسىنىڭ ستاتسيونارلارىندا - 2. ونىڭ ىشىندە: رەانيماتسيادا 9, بەيىندى بولىمشەلەردە ءتۇرلى جاراقات العان 32 پاتسيەنت بار. 17 ناۋقاسقا وتا جاسالدى.

ايتا كەتۋ كەرەك، بۇگىن، ياعني، 10 - اقپاندا قوردايداعى اۋداندىق ورتالىق اۋرۋحانادا 1 پاتسيەنتتى جانە قىرعىز رەسپۋبليكاسىنان 2 پاتسيەنتتى الماتى قالاسىندا تاسىمالداۋعا دايىندىق جۇرگىزىلۋدە.

پاتسيەنتتەرگە مەديتسينالىق كومەكتىڭ بارلىق ءتۇرى مەن كولەمى ت م ك ك ك شەڭبەرىندە تەگىن كورسەتىلەتىنىن اتاپ ءوتۋ قاجەت.

قازىر ناۋقاستار مامانداردىڭ باقىلاۋىندا جانە قاجەتتى ەم الۋدا.