تۇركمەنستان پرەزيدەنتى ۇلىن مينيستر ەتىپ تاعايىندادى

نۇر-سۇلتان. قازاقپارات - تۇركمەنستان پرەزيدەنتى گۋربانگۋلى بەردىمۇحامەدوۆ ءوز ۇلى سەردار بەردىمۇحامەدوۆتى ەلدىڭ ونەركاسىپ جانە قۇرىلىس ءمينيسترى ەتىپ تاعايىندادى.

بۇل تۋرالى 8 - اقپاندا مەملەكەتتىك ب ا ق حابارلادى.

38 جاستاعى سەردار بەردىمۇحامەدوۆ ءوز اتا-باباسى تۋىپ وسكەن احال ءۋالاياتىنىڭ باسشىسى بولىپ تاعايىندالعانىنا ءبىر جىل تولماي جاتىپ مينيستر قىزمەتىنە اۋىستى. تۇركىمەنستان پرەزيدەنتىنىڭ جالعىز ۇلىنىڭ ساياسي مانسابىنىڭ تەز ءوسۋىن تاۋەلسىز باقىلاۋشىلار 62 جاستاعى گۋربانگۋلى بەردىمۇحامەدوۆ بيلىكتى تاپسىراتىن مۇراگەرىن دايىنداپ جاتىر دەپ تۇسىندىرەدى.

احال ۋالاياتىن باسقارعانعا دەيىن سەردار بەردىمۇحامەدوۆ وسى ايماق جەتەكشىسىنىڭ ورىنباسارى، ونىڭ الدىندا ەلدىڭ سىرتقى ىستەر ءمينيسترىنىڭ ورىنباسارى بولىپ ۇلگەرگەن. 2016-جىلى قاراشادا ەل پارلامەنتىنىڭ دەپۋتاتى بولىپ سايلانعان.

جاڭا قىزمەتىندە سەردار بەردىمۇحامەدوۆ احال ۋالاياتىنىڭ اكىمشىلىك ورتالىعىن سالۋ جوباسىنا جەتەكشىلىك ەتەتىن ءتارىزدى دەيدى باقىلاۋشىلار.

تۇركمەنستان پرەزيدەنتى وتكەن اپتادا جاڭا قالانى سالۋعا قاجەتتى قۇرىلىس ماتەريالدارى مەن قۇرال-جابدىقتى شەتەلدەن ساتىپ الۋعا 1,5 ميلليارد دوللارعا جۋىق قارجى ءبولۋ تۋرالى جارلىققا قول قويعان.

پرەزيدەنتتىڭ بۇل جارلىعى ۇكىمەت يمپورتتى شەكتەۋ ساياساتىن جۇرگىزىپ جاتقان جانە ەلدە شەتەل ۆاليۋتاسى تاپشى بولىپ وتىرعان شاقتا شىقتى. قازىر تۇركىمەنستان ەل ەكسپورتىنىڭ نەگىزگى تابىس كوزى - تابيعي گاز باعاسىنىڭ ارزانداپ كەتۋىنە بايلانىستى ەكونوميكالىق داعدارىسقا تاپ بولىپ وتىر.

61 جاستاعى گۋربانگۋلى بەردىمۇحامەدوۆ ورتالىق ازياداعى تابيعي گازعا باي تۇركىمەنستاندى وزىنە دەيىنگى پرەزيدەنت ساپارمۇرات نيازوۆ قايتىس بولعان 2006-جىلدىڭ جەلتوقسانىنان بەرى باسقارىپ كەلەدى.

تۇركىمەنستان بيلىگىن سىنايتىندار مەن قۇقىق قورعاۋشىلار بەردىمۇحامەدوۆتىڭ بيلىككە كەلگەلى وزگەشە ويلايتىنداردى قۋدالاعانىن جانە ايتارلىقتاي وزگەرىس جاساماعانىن ايتادى. پرەزيدەنت بەردىمۇحامەدوۆتىڭ جالعىز ۇلىنان باسقا ءۇش قىزى بار.

«ازاتتىق»