اعىلشىن ءتىلى ەۋرووداقتىڭ رەسمي ءتىلى بولىپ قالا بەرە مە؟ - الەمدىك باسپا سوزگە شولۋ
تايلاندتا قارۋلى سارباز قولىنان 26 ادام قازا تاپتى - Bangkok Post
تايلاندتا قارۋلى سارباز ناكحونراتچاسيما قالاسىنىڭ تۇرعىندارىنا وق جاۋدىرىپ، 26 ادام قازا تاپتى. سوڭعى مالىمەتتەرگە قاراعاندا، 50 دەن استام ادام جاراقات العان، دەپ حابارلايدى Bangkok Post .
باسىلىمنىڭ جازۋىنشا، سارباز ارنايى وپەراتسيا كەزىندە اتىپ ولتىرىلگەن.
«قاقتىعىس جەرگىلىكتى ۋاقىت بويىنشا تۇنگى ساعات 3.30 دا باستالعان. سارباز الدىمەن ءوزىنىڭ كومانديرى مەن تاعى ەكى ادامعا وق جاۋدىرعان. سونىمەن قاتار اسكەري لاگەر اۋماعىندا 63 جاستاعى ايەل مەن ءبىر اسكەري قىزمەتكەر ولتىرىلگەن»، - دەپ جازادى باسىلىم.
وقيعا ورنىنا تايلاندتىڭ پرەمەر-ءمينيسترى پرايۋت چان-وچا باردى جانە مۇنداي جاعداي ەندى قايتالانباۋى كەرەك ەكەنىن ايتتى.
سارباز چاكراپانت تومما ساۋدا ورتالىعىنا تىعىلماق بولعان. پوليتسيا ونى سول جەردە اتىپ ءولتىردى.
سارباز قالاداعى بىرنەشە وبەكتىدە وق جاۋدىرعان. سونىمەن قاتار ول ءوزىنىڭ ارەكەتىن Facebook ارقىلى تىكەلەي ەفيردە كورسەتكەن.
پوليتسيانىڭ حابارلاۋىنشا، ارنايى وپەراتسيا كەزىندە جۇزدەگەن ادام قۇتقارىلىپ، كەپىلگە الىنعان 8 ادام بوساتىلدى.
بريتان ۋنيۆەرسيتەتتەرى وقۋ جىلىن شەگەرگەن ستۋدەنتتەرگە اقشا تولەپ جاتىر - The Times
بريتانيا ۋنيۆەرسيتتەتتەرى وقۋ جىلىن ءبىر جىلعا شەگەرگەن ستۋدەنتتەرگە مىڭ دوللاردان استام قاراجات تولەمەك. مۇنداي شەشىم ۋنيۆەرسيتەتتەرگە تىم كوپ ادام تۇسكەندىكتەن قابىلدانىپ وتىر، دەپ جازادى The Times .
باسىلىمنىڭ جازۋىنشا، ۇلى بريتانياداعى 24 ەليتالى ۋنيۆەرسيتەت وقۋعا بوس ورىن سانىنان دا كوپ ادام قابىلداعاندىقتان وقۋ جىلىن ءبىر جىلعا شەگەرگەن ستۋدەنتتەرگە اقشا تولەيتىنىن مالىمدەگەن.
باسىلىمنىڭ رەسمي ساۋالىنا جاۋاپ بەرگەن ۋنيۆەرسيتتەتتەردىڭ ءبىرى مەديتسينا ماماندىعىنا وقۋعا تۇسكەن 260 ادامنىڭ ءارقايسىسىنا 2 مىڭ دوللاردان استام قاراجات ۇسىنىپ، وقۋ جىلىن شەگەرۋدى سۇراعانىن ايتقان. ال مەدبيكە ءىسى بويىنشا وقۋعا تۇسكەن 59 ابيتۋريەنتكە مىڭ دوللاردان ۇسىنىلعان. دەگەنمەن، ۋنيۆەرسيتەتتەردىڭ مۇنداي ۇسىنىسىن قابىلداپ جاتقاندار از.
2018-جىلى مانچەستەر ۋنيۆەرسيتەتى 190 ادامعا وقۋدى كەيىنگە شەگەرۋى ءۇشىن مىڭ دوللاردان استام اقشا تولەمەك بولعان. بيىل مۇنداي ۇسىنىستى ايتقان ۋنيۆەرسيتەتتەر سانى ارتىپ وتىر.
«ستۋدەنتتەر ۋنيۆەرسيتەتتىڭ ادام قابىلداۋعا شىعىندانىپ، عىلىمي زەرتتەۋ مەن وقۋعا از قارجى ءبولىپ جاتقانىنا نارازى. ال ستۋدەنتتەردىڭ ۇلتتىق كەڭەسى ۋنيۆەرسيتەتتەر ستۋدەنتتى وقۋعا قابىلداعان كەزدە وزدەرىنىڭ رەسۋرسى جەتەتىنىنە كەپىلدىك بەرۋى ءتيىس ەكەنىن ايتتى»، دەپ جازادى باسىلىم.
نەلىكتەن اقشامىز كەلەسى جالاقىعا دەيىن جەتپەي قالادى؟ - Le Figaro
كوپشىلىگىمىزدە جالاقىعا ءبىر اپتا قالعاندا اقشا دەفيتسيتى پايدا بولادى. بۇل نەلىكتەن بولادى؟ وعان كىم كىنالى؟ بيۋجەتتىڭ مۇنداي جاعدايىنا نە اسەر ەتەدى جانە مۇنى قالاي وزگەرتۋگە بولادى؟ Le Figaro وسى سۇراقتارعا جاۋاپ ىزدەدى.
«بيۋجەتتىڭ مۇنداي حاوسى قارجىلىق پروبلەمانى ەمەس، ەموتسيونالدى پروبلەمانى كورسەتەدى. ءبىزدىڭ اقشانى تابۋىمىز جانە جۇمساۋىمىز ويلاۋ قابىلەتىمىزگە بايلانىستى»، دەپ جازادى اۆتور.
ونىڭ ايتۋىنشا، كەز كەلگەن ادامنىڭ اقشاعا دەگەن قارىم-قاتىناسى - پسيحولوگيالىق مۇرانىڭ ناتيجەسى.
«اقشاعا كەلگەندە اتا-انانىڭ ءومىر ءسۇرۋ دەڭگەيىن ەسكەرۋ كەرەك. ولاردىڭ قارجىلىق ارەكەتتەرى مەن تاجىريبەسى بالاعا مىندەتتى تۇردە اسەر ەتەدى»، دەپ جازىلعان ماقالادا.
اۆتورعا سەنسەك، ادامدار باقىلاۋسىز شىعىننىڭ كوزى سانالاتىن ەموتسيالاردان ارىلماي، ەشتەڭە وزگەرمەيدى.
«ەڭ الدىمەن ارەكەتتەرىمىزدىڭ ءتيپىن انىقتاۋ كەرەك. ونىڭ ءتورت ءتۇرى بار. ءبىرىنشىسى - بانك ەسەپشوتتارىنا قارامايتىن، قارجىسىنىڭ جينالۋىنا مۇمكىندىك جاسايتىن، كۆيتانتسيالارىنا قاراماستان ولاردى لاقتىرىپ جىبەرەتىن ادام. ەكىنشىسى - ماتەريالدىق نارسەنى ماڭىزدى سانامايتىن موناح. ول بانك ەسەپشوتىنىڭ ەمەس، ءوزىنىڭ ادامي قاسيەتتەرىنە كوبىرەك الاڭدايدى. ءۇشىنشىسى - ويلانباي ساۋدا جاسايتىن، ءبىر كۇنمەن ءومىر سۇرەتىن ادام. ءتورتىنشىسى - ءار شىعىنىن ەسەپتەپ، كوبىرەك ۇنەمدەپ ءجۇرىپ اقشا جينايتىن ادام»، دەپ جازادى اۆتور.
ونىڭ ايتۋىنشا، وسى ءتورت ءتيپتى ورىندى پايدالانىپ، تەڭ ۇستاۋعا ۇمتىلۋ كەرەك.
«اي سايىن تابىستىڭ 55 پايىزىن مىندەتتى شىعىندارعا، 5-10 پايىزىن سىيلىق پەن قايىرىمدىلىققا جۇمساۋ كەرەك. 10 پايىزىن جيناپ، 5-10 پايىزىن بىلىمگە، تاعى وسىنشا قارجىنى كوڭىل كوتەرۋگە نەمەسە دەمالىسقا ءبولىپ قويۋ كەرەك»، دەپ جازادى اۆتور.
برەكسيتتەن كەيىن اعىلشىن ءتىلى ەۋرووداقتىڭ رەسمي ءتىلى بولىپ قالا بەرە مە؟ - Le Monde
ۇلىبريتانيانىڭ ەۋرووداقتان شىعۋى ەۋرووداقتا اعىلشىن تىلىنەن گورى فرانسۋز ءتىلىنىڭ باسىمدىعىنا الىپ كەلەدى، دەپ جازادى Le Monde باسىلىمى.
«ەۋرووداق پەن ەۋروكوميسسيادا قۇجات اينالىمىنىڭ 90 پايىزى اعىلشىن تىلىندە جۇرگىزىلەدى. ال ۇلى بريتانيا ەۋرووداقتان شىققاننان كەيىن بۇل جاعداي قالاي وزگەرەدى؟ برەكسيتتەن كەيىن ەۋرووداق ازاماتتارى سويلەيتىن تىلدەر تىزىمىندە اعىلشىن ءتىلى 17-ورىنعا ءتۇسىپ قالاتىنىن ەسكەرسەك، بۇل جاعداي وزگەرۋسىز قالۋى مۇمكىن بە؟»، دەپ جازادى باسىلىم.
اۆتوردىڭ ايتۋىنشا، اعىلشىن ءتىلى ەۋرووداقتان مۇلدەم جوعالىپ كەتۋى مۇمكىن ەمەس، سەبەبى بۇل ۇلكەن تارتىپسىزدىككە الىپ كەلەدى. سونىمەن قاتار ەۋرووداقتىڭ تۇتاستىعى جويىلىپ، ونىڭ باسقا الەمگە اشىقتىعى دا جوعالادى.
«دەگەنمەن، تىلدەر اراسىندا بالانس بولۋى كەرەك. ياعني، اعىلشىن تىلىنەن مۇلدەم باس تارتپاي، ەۋرووداق حالقىنىڭ 130 ميلليونى سويلەيتىن فرانسۋز تىلىنە دە باسىمدىق بەرىلۋى ءتيىس. سونىمەن قاتار ەۋرووداققا مۇشە 27 مەملەكەتتىڭ 19 ى فرانسۋز ءتىلىن ءبىلۋدى قاجەت ەتەتىنىن دە ەسكەرگەن ءجون»، دەپ جازادى اۆتور.
ونىڭ ايتۋىنشا، ەۋرووداق شەنەۋنىكتەرىنە ءوز تۋعان تىلىنەن بولەك اعىلشىن جانە فرانسۋز ءتىلىن ءبىلۋدى مىندەتتەۋى كەرەك. سونىمەن قاتار رەسمي ماتىندەردى حالىقتىڭ كوپشىلىگى سويلەيتىن تىلدە جاريالاۋ ماسەلەسىن رەتتەگەن ءجون.
ەۋروپادا اقشانى تۇرعىن ۇيگە ەمەس، ساياحاتقا جۇمساعىسى كەلەتىندەر ارتتى - Stern
15 مەملەكەتتە جۇرگىزىلگەن ساۋالناما ناتيجەسى كورسەتكەندەي، دامىعان باتىس ەلدەرىنىڭ كوبىندە ادامدار تۇرعىن ءۇي ساتىپ العىسى كەلمەيدى. ونىڭ ورنىنا ولار اقشاسىن ساياحاتقا جۇمساعاندى ءجون كورەدى، دەپ جازادى Stern جۋرنالى.
Ipsos ماركەتينگتىك زەرتتەۋلەر ينستيتۋتى جۇرگىزگەن ساۋالناماعا 15 مىڭ ادام قاتىسقان.
«13 مەملەكەتتەگى ەۋروپالىقتاردىڭ 70 پايىزى جەر نەمەسە ءۇي ساتىپ الۋدىڭ قيىنداپ كەتكەنىن ايتادى. ا ق ش- تا رەسپوندەنتتەردىڭ 59 پايىزىنان استامى تۇرعىن ءۇي ساتىپ الۋدىڭ قيىندىعىن اتاپ وتكەن. اۋستراليادا بۇل كورسەتكىش - 75 پايىز»، دەپ جازادى باسىلىم.
رەسپوندەتتەر نەشە جاسقا كەلگەندە تۇرعىن ءۇي ساتىپ الاسىزدار دەگەن سۇراققا ولاردىڭ 43 پايىزى ەشقاشان ءۇي المايتىنىن ايتىپ جاۋاپ بەرگەن.
ساۋالناماعا قاتىسقان ادامداردىڭ كوبى جىلجىمايتىن مۇلىك الۋعا باسىمدىق بەرمەيدى. كوپشىلىگى تۇرعىن ءۇي كەرەك ەكەنىن ايتسا دا، بۇل ماقساتتا اقشا جينامايتىنىن ايتقان. ولار مۇنىڭ ورنىنا اقشانى ساياحاتقا، سۇيىكتى ىسىنە، وقۋعا جۇمساۋدى ءجون كورەتىنىن اتاپ وتكەن.
«ەۋروپالىقتاردىڭ 54 پايىزى اقشانى تۇرعىن ۇيگە ەمەس، ساياحاتقا جۇمساعاندى ءجون كورەدى»، دەپ جازادى اۆتور.
اۆتور: ايكۇمىس بولاتبەك
