ىبىراي التىنسارين مۋزەيى جادىگەر جيناۋعا ۆولونتەرلەردى جۇمىلدىرماق

قوستاناي. قازاقپارات - قوستانايداعى ى. التىنسارين مۋزەيى ەرىكتىلەردى جادىگەر جيناۋعا جۇمىلدىرماق، دەپ حابارلايدى قازاقپارات ماۋزەيدىڭ باسپا ءسوز قىزمەتىنە سىلتەمە جاساپ.

2020-جىل - ەرىكتىلەر جىلى. وسىعان وراي ىبىراي ءالتىنساريننىڭ قوستاناي وبلىستىق مەموريالدىق مۋزەيى ۆولونتەر جاستارمەن بىرلەسە وتىرىپ، «تۋعان جەر» جوباسى اياسىندا ايماقتا «ۇلى دالا ۇستازى» عىلىمي ەكسپەديتسياسىن وتكىزۋدى قولعا الىپ وتىر.

مۋزەيدە قازاقستاندىق جاستار كۇنىنە ارنالعان ەركىكتىلەرمەن ەركىن كەش ءوتتى.

ماقسات - بيىلعى ەرىكتىلەر جىلىندا وبلىستاعى مادەني شارالاردىڭ اۋقىمىن كەڭەيتۋ، بىرلەسىپ تىڭ باستامالاردى ۇيىمداستىرۋ، مۋزەيلىك قور جيىنتىعىن تولىقتىرۋ.

«بۇل باستاما نەگىزگى 3 باعىتتان تۇرادى. ءبىرىنشىسى - «موبيلدى پوەزيا» جوباسىن قولعا الۋ (بۇل باعىتتا ەرىكتىلەر ى. التىنساريننىڭ ولەڭىن وقىپ، ۇيالى تەلەفوندارىنا ءتۇسىرىپ، مۋزەيگە جولدايدى). ەكىنشىسى - ەرىكتى ەكسكۋرسيا جۇرگىزۋشىلەردى جاساقتاپ شىعارۋ. ءۇشىنشىسى - ۆولونتەرلەردى مۋزەي قورىنا جادىگەر جيناۋعا جۇمىلدىرۋ» دەلىنگەن حابارلامادا.

جيىنعا قوستاناي وبلىستىق مادەنيەت باسقارماسىنىڭ ءبولىم باسشىسى اسەل مۋسينا، قوستاناي وبلىسى جاستار ساياساتى باسقارماسى اقپاراتتىق-ادىستەمەلىك سەكتورىنىڭ جەتەكشىسى جۇپار قوجاحمەت، قوستاناي وبلىسى جاستار رەسۋرستىق ورتالىعى ەرىكتىلەر شتابىنىڭ جاستارى، 2019-جىلعى قوستاناي وبلىسى جاستارى التىن كىتابىنىڭ لاۋرەاتتارى جانە ۇستازدار قاتىستى.