ەڭبەك جولىڭدى اۋىلدان باستاۋدىڭ ەش ارتىقتىعى جوق - جاس دارىگەر

ورال. قازاقپارات - ەڭبەك جولىڭدى اۋىلدىق جەردە باستاۋدىڭ ەش ارتىقتىعى جوق.

بۇل تۋرالى پرەزيدەنتتىك جاستار كادرلىق رەزەرۆىنە ەنگەن ورالداعى №5-قالالىق ەمحانا ديرەكتورى تيمۋر اجىعاليەۆ ءمالىم ەتتى، دەپ حابارلايدى قازاقپارات ءتىلشىسى.

جاس دارىگەردىڭ ايتۋىنشا، ءوزى ورال قالاسىندا تۋىپ-وسكەن.

وتكەن جىلى وتىزعا تولعان تيمۋردىڭ اكەسى - دارىگەر، اناسى - ينجەنەر-تەحنولوگ.

اكەسىنىڭ ءىزىن قۋعان ول 2007 -جىلى مەكتەپ بىتىرگەننەن كەيىن دارىگەرلىك ماماندىقتى تاڭداپ، م. وسپانوۆ اتىنداعى باتىس قازاقستان مەملەكەتتىك مەديتسينا اكادەمياسىنىڭ (قازىر ۋنيۆەرسيتەت) جالپى مەديتسينا فاكۋلتەتىنە تۇسكەن.

الدىمەن بەس جىل بويى وقىپ، باكالاۆرياتتى بىتىرگەننەن كەيىن حيرۋرگيا كافەدراسىندا تاعى ەكى جىل ينتەرناتۋرادان وتكەن. ونى ۇزدىك ءتامامداعان تيمۋر ۋرولوگ بولۋعا تالپىنىپ كورگەن، ءبىراق رەزيدەنتۋراعا تۇسۋگە ءبىر عانا بالل (شەت ەل تىلىنەن) جەتپەي قالدى.

سودان كەيىن ورالعا ورالعان تيمۋر بوكەي ورداسى اۋدانىنا جولداما الدى. بوكەي ورداسى - وبلىس ورتالىعىنان التى جۇزگە جۋىق شاقىرىم شالعاي جاتقان اۋدان.

- مەن ەڭ الىس اۋدانعا بارعانىما ەش وكىنگەن جوقپىن. اۋداندىق اۋرۋحانادا ەكى جىل بويى حيرۋرگ بولىپ، تاجىريبە جينادىم. جۇمىس تا جەتىپ ارتىلاتىن. اسىرەسە، شەشىم قابىلدار كەزدە قيىن. جانىڭدا اقىل- كەڭەس الاتىن تاجىريبەلى مامان، كونسيليۋم شاقىرۋعا مۇمكىندىك جوق، تەك وزىڭە سەنۋگە تۋرا كەلەدى. بۇل جاۋاپكەرشىلىكتى ارتتىرىپ، ءوزىڭدى شىڭداي تۇسەدى ەكەن. سوندىقتان جاس ماماندارعا ەڭبەك جولىن اۋىلدىق جەرلەردە باستاۋعا كەڭەس بەرەر ەدىم، - دەيدى تيمۋر اجىعاليەۆ.

كەيىن زەلەنوۆ (قازىر بايتەرەك) اۋدانىندا دارىگەر- حيرۋرگ مىندەتىن اتقارعان ول كوپ ۇزاماي اۋداندىق اۋرۋحانا ديرەكتورىنىڭ مەديتسينالىق كومەكتى ۇيىمداستىرۋ جونىندەگى ورىنباسارى بولىپ تاعايىندالدى.

2018 -جىلى وبلىستىق ونكولوگيا ديسپانسەرى ديرەكتورىنىڭ مەديتسينالىق قىزمەت ساپاسىن باقىلاۋ جونىندەگى ورىنباسارى بولىپ اۋىسقان جاس مامان بۇگىندە №5-قالالىق ەمحاناعا جەتەكشىلىك ەتىپ كەلەدى.

ءوز ءبىلىم- بىلىگىن ۇدايى جەتىلدىرىپ، كاسىپوداق قىزمەتىمەن دە ۇشتاستىرعان ت. اجىعالييەۆ «جىل كوشباسشىسى - 2019» وبلىستىق جاستار سىيلىعىنىڭ «ۇزدىك جاس دارىگەر» اتاعىن دا جەڭىپ الدى.

پرەزيدەنتتىك كادرلىق رەزەرۆ كونكۋرسىنا قاتىسىپ، 300 ادامنىڭ ىشىنەن جالپى رەيتينگىدە 14-ورىندى يەلەنگەن جاس دارىگەردىڭ ماقساتى دا ايقىن.

«ءبىزدىڭ ماقساتىمىز - تۇرعىندارعا ساپالى مەديتسينالىق كومەك كورسەتۋ. قازىرگى تاڭدا مىندەتتى الەۋمەتتىك مەديتسينالىق ساقتاندىرۋدى تابىستى ەنگىزىپ، ادامدار مەديتسينالىق كومەككە قولى جەتەتىنىن سەزىنەتىندەي، جوعارى تالاپقا ساي قىزمەت اتقارا ءبىلۋىمىز كەرەك»، - دەدى جاس باسشى.

ەسكە سالا كەتەيىك، بۇدان بۇرىن كادر رەزەرۆىنە ەنگەن جاستاردىڭ ءوز قارىم- قابىلەتىن كورسەتە الاتىنىن جازعان بولاتىنبىز.