ءى ءى م: قوردايداعى وقيعا كەزىندە پوليتسيا ەشقانداي قارۋ قولدانعان جوق

نۇر- سۇلتان. قازاقپارات - ىشكى ىستەر ءمينيسترىنىڭ ورىنباسارى الەكسەي كالايچيدي قوردايداعى قاقتىعىس بولعان كۇنى پوليتسيا قارۋ قولدانباعانىن ءمالىم ەتتى، دەپ حابارلايدى قازاقپارات ءتىلشىسى.

«سول كۇنى قورداي اۋدانىنىڭ ماسانچي جانە سورتوبە اۋىلدارىنداعى جاعدايدى تۇراقتاندىرۋ ءۇشىن مەركە، تۇرار رىسقۇلوۆ جانە شۋ اۋداندارىنان قوسىمشا كۇش جۇمىلدىرىلعان. الايدا اگرەسسيۆتى جاستار پوليتسيا قىزمەتكەرلەرىنىڭ زاڭدى تالابىن ورىنداۋدان باس تارتىپ، ولارعا تاس جانە تەمىر زاتتاردى، ءتىپتى قارۋ قولدانىپ، بەلسەندى تۇردە قارسىلىق كورسەتكەن»، - دەدى الەكسەي كالايچيدي و ك ق- دا وتكەن باسپا ءسوز ءماسليحاتىندا.

وسىدان كەيىن وقيعا ورنىنا ۇلتتىق ۇلان ساربازدارى كەلىپ، تۇنگى ەكى شاماسىندا قاقتىعىستىڭ بەتى قايتقان.

«وكىنىشكە قاراي، وسى قاقتىعىس بارىسىندا 10 ادام كوز جۇمدى. 43 ادام اۋرۋحاناعا جەتكىزىلگەن. قازىرگى تاڭدا اۋرۋحانادا ءالى دە 39 ادام جاتىر. زارداپ شەككەندەردىڭ ىشىندە ءبىزدىڭ بەس قىزمەتكەرىمىز بار. ۇشەۋى وقتان جاراقات الدى. ءبىراق پوليتسەيلەر قارۋ قولدانبادى. سەبەبى قاقتىعىس ەلدىمەكەندە ءارى تۇنگى ۋاقىتتا بولىپ جاتقان ەدى. ءورت كەزىندە 25 تۇرعىن ءۇي، 31 كوممەرتسيالىق نىسان مەن 41 اۆتوكولىك زاقىمدالدى»، - دەدى ول.

قازىرگى ۋاقىتتا قاقتىعىسقا قاتىسقانداردىڭ 2 اڭشى قارۋى، 2 پيستولەت پەن ورتەۋشى سۇيىقتىق تولتىرىلعان 54 بوتەلكە تاركىلەنگەن.

اۆتور: ايان بەكەن ۇلى