الەمدە كوروناۆيرۋس كەسىرىنەن قىتايلاردى كەمسىتۋ كوبەيدى

نۇر-سۇلتان. قازاقپارات - كانادالىق جۋرناليست تۆيتتەرگە جاريالاعان پوستى ءۇشىن جۇمىستان قۋىلدى. ءتىلشى ءوزىنىڭ ازياتتىق شاشتارازشىمەن تۇسكەن فوتوسىن جۇكتەپ، استىنا «بۇگىن شاشىمدى قيدىرعاننان باسقا، ەشتەڭە جۇقتىرماعان شىعارمىن» دەگەن پىكىر قالدىرعان.

ىزىنشە، جۋرناليست قاتاڭ سىنعا قالادى. ينتەرنەتتەن پوستىن وشىرگەنىمەن جۇمىستان قۋىلادى. جالپى كوروناۆيرۋس سالدارىنان قىتايلاردى كەمسىتۋ فرانسيادا ءورشي تۇسكەن. وڭىردە ۆيرۋس جۇقتىرعاندار تۋرالى اقپار تاراعاننان باستاپ، جەرگىلىكتى تۇرعىندار ازياتتىق كەلبەتتەگى ازاماتتارعا كۇدىكپەن قارايتىن كورىنەدى.

سان لاي تان، سۋرەتشى:

- تاڭەرتەڭ جۇمىسقا بارايىن دەپ، مەتروعا ءمىندىم. ورىندىققا وتىرعان ەدىم، قاسىمداعى ازامات تۇرىپ كەتتى. وزگە جولاۋشىلار ماعان قاراپ، بەتتەرىن ورامالمەن بۇركەي باستادى. بۇل ماعان وڭايعا سوقپادى. بۇلاي ىستەۋگە بولا ما؟ بارىپ تۇرعان كسەنوفوبيا بۇل. ىندەت قىتايدان شىقسا، ازياتتىق كەلبەتتىلەردىڭ ءبارى ۆيرۋس تاراتادى دەگەن ءسوز ەمەس!

پاريجدە قىتايلىق ازاماتتارعا قاتىستى كەمسىتۋشىلىك ءتىپتى بيزنەسكە دە اسەر ەتكەن. شىعىس دامدەرىن ۇسىناتىن مەيرامحانا يەلەرى كاسىپتەرىنىڭ توقتاپ قالعانىن ايتادى. ينستاگرامدا بولسا، ناسىلشىلدىككە تاپ بولعانداردىڭ ارنايى حەشتەگى پايدا بولدى. «ءبىز ۆيرۋس ەمەسپىز» دەگەن اتاۋمەن مىڭنان استام فوتو جۇكتەلدى. ودان بولەك كۋاگەرلەردىڭ وقيعاسى دا جازىلعان.

ماسەلەن، قىتايلىق ستۋدەنتكە ساتۋشى كۇدىكپەن قاراپ، كوكونىستەرىن ۇستاماۋىن تالاپ ەتىپتى. پاريج كوشەلەرىندە ورشىگەن بۇل ماسەلەگە بايلانىستى جەرگىلىكتى بيلىك ءوز ازاماتتارىن قاتاڭ سىنعا الدى.

انن يدالگو، پاريج مەرى:

- قىتاي ەلى مەن حالقىنا قيىن شاقتا قولداۋ بىلدىرگىمىز كەلەدى. ءارقاشان دا دوستىق پەن ىنتىماقتاستىق قارىم- قاتىناستا بولايىق.

بۇگىندە كوروناۆيرۋستان كوز جۇمعانداردىڭ سانى 590-نان استى. الەم بويىنشا قاۋىپتى كەسەلدى 28 مىڭنان استام ادام جۇقتىرعان. دۇنيەجۇزىلىك دەنساۋلىق ساقتاۋ ۇيىمى ىندەتتى حالىقارالىق دەڭگەيدەگى توتەنشە جاعداي دەپ جاريالادى. سونداي- اق، ۇيىم الەمدىك قوعامداستىقتان ۆيرۋسپەن كۇرەس ءۇشىن 675 ميلليون ا ق ش دوللارىن ءبولۋدى تالاپ ەتتى. قاراجات ۆاكسينا ويلاپ تاۋىپ، سىناقتاما جۇرگىزۋگە جۇمسالماق. بۇگىندە الەم ەلدەرىنىڭ عالىمدارى كوروناۆيرۋستان ەمدەپ جازاتىن ءدارى ىزدەۋگە كىرىسكەن. دەگەنمەن، ۆاكتسينانى ويلاپ تابۋ ءۇشىن ۋاقىت قاجەت دەيدى ماماندار.

گرەگوري گلەنن، عالىم:

- جالپى جاڭا ۆاكتسينانى ويلاپ تاۋىپ، وعان ليتسەنزيا الۋ ءۇشىن 8-10 جىلداي ۋاقىت كەتەدى. ەبولاعا قارسى ءدارىنى 4 جىل ىشىندە شىعارۋ تاريحتاعى جەتىستىك بولعان. قازىر ۆيرۋستىڭ جىلدام تاراپ جاتقانىن كورىپ، ۋاقىتتىڭ تاپشى ەكەنىن تۇسىنەمىز. دەگەنمەن، تولىقتاي ەمدەپ جازاتىن ءدارى- دارمەك ءۇشىن ۋاقىت قاجەت.

- الەمدىك ەكونوميكاعا ۆيرۋس قالاي اسەر ەتتى دەگەن سۇراق تۋىندايدى؟

- ەۋروپالىق ورتالىق بانك باسشىسى كريستين لاگارد كوروناۆيرۋستان الەم ەكونوميكاسىنا كەلەتىن قاۋىپتى ساۋدا سوعىسىمەن تەڭ دەپ وتىر. ءبىراق رەسمي بەيجىڭ ىندەتتەن ەكونوميكاعا اسا قاۋىپ كەلمەدى دەگەن مالىمدەمە جاسادى.

www.24.kz