قازاقستاندىق ستۋدەنت ۋحاندا نەلىكتەن قالىپ قويدى؟
قازاقستاننىڭ باس سانيتارى جانداربەك بەكشين ۋحان قالاسىنان قازاقستاندىقتاردى ەۆاكۋاتسيالاعاندا ءبىر ستۋدەنتتىڭ نە سەبەپتى قالىپ قويعانىن ءتۇسىندىردى، دەپ حابارلايدى Sputnik قازاقستان ءتىلشىسى.
وتكەن دەمالىس كۇندەرى قىتايدىڭ ۋحان قالاسىنان 80 قازاقستاندىق ستۋدەنت ارنايى بورتپەن ەۆاكۋاتسيالانعان بولاتىن. سول كەزدە ءبىر ستۋدەنت قالىپ قويىپتى.
«ونىڭ دەنە قىزۋى ءسال كوتەرىلىپ كەتتى. ءبىر- ەكى ساعات ىشىندە تەمپەراتۋراسى نورماعا كەلدى. ءبىراق ول كەزدە ارنايى بورت ۇشىپ كەتكەن. ءبىز ونى تاستاپ كەتكەن جوقپىز. ول كورشى ەلدەردىڭ ۇشاقتارىمەن كەلدى» ، - دەدى بەكشين جۋرناليستەرگە بەرگەن سۇقباتىندا.
ماماننىڭ ايتۋىنشا، ۋحاندا قالىپ قويعان ستۋدەنت رەسەي نەمەسە وزبەكستان ۇشاعىمەن قالادان شىعارىلدى. الايدا باس سانيتار ونىڭ قايدا ەكەنىن ناقتىلاپ ايتپادى.
«رەسەي فەدەراتسياسىندا ءبىزدىڭ ءۇش ازاماتىمىز جانە وزبەكستاندا بەس ازاماتىمىز بار. ستۋدەنت ەكى ەلدىڭ بىرەۋىندە، ەڭ باستىسى، ول ۋحان قالاسىنان شىعارىلدى. قازىر كارانتيندە جاتىر. 14 كۇننەن كەيىن قازاقستانعا جەتەدى» ، - دەپ اتاپ ءوتتى جانداربەك بەكشين.
ەكىنشى اقپاندا ۋحان قالاسىندا بولعان 83 قازاقستاندىق ەلگە جەتكىزىلگەن بولاتىن، ولاردىڭ 80 ءى - ستۋدەنت.
بۇدان بولەك، قىرعىزستاننىڭ 18 ازاماتى، بەلارۋستىڭ بەس ازاماتى مەن ارمەنيانىڭ ءبىر ازاماتى بار. قىرعىزستاندىقتار بىردەن ءوز ەلىنە ۇشىپ كەتتى.
ۋحان قالاسىنان ارنايى بورتپەن ەلگە جەتكىزىلگەن قازاقستاندىقتار جانە شەتەلدىكتەر نۇر- سۇلتان قالاسىنان جەتى شاقىرىم جەردەگى ارنايى اۋرۋحاناعا جاتقىزىلدى. ولاردان اناليز الىندى، كيىمدەرى مەن جەكە زاتتارى جينالىپ، اۋرۋحانا كيىمى تاراتىلدى.
قازاقستاننىڭ باس سانيتار دارىگەرى جانداربەك بەكشيننىڭ ايتۋىنشا، ازاماتتاردىڭ ەشقايسىسىنان كوروناۆيرۋس تابىلعان جوق. سوعان قاراماستان ولار 16 شى اقپانعا دەيىن كارانتيندە بولادى.
پاتسيەنتتەرگە تۋىستارىمەن كەزدەسۋگە تىيىم سالىنعان. ال اۋرۋحانانىڭ ورنالاسقان جەرى قۇپيا مالىمەت رەتىندە جاريالانعان جوق.
